سیدنا عبداللہ بن عباس رضی اللہ عنہما فرماتے ہیں: سیدنا عمر بن خطاب رضی اللہ عنہ نے فرمایا: حاطب بن ابی بلتعہ نے اہل مکہ کی جانب خط لکھا، اللہ تعالیٰ نے اپنے نبی صلی اللہ علیہ وسلم کو اس کی اطلاع عطا فرما دی۔ نبی اکرم صلی اللہ علیہ وسلم نے سیدنا علی رضی اللہ عنہ اور سیدنا زبیر رضی اللہ عنہ کو خط کے تعاقب میں بھیجا، ان دونوں نے ایک عورت کو ایک اونٹ پر جاتے ہوئے پایا، اس کی مینڈھیوں میں سے خط نکال لیا، اور لے کر نبی اکرم صلی اللہ علیہ وسلم کی بارگاہ میں پیش کیا، حضور صلی اللہ علیہ وسلم کی بارگاہ میں یہ خط پڑھ کر سنایا گیا، آپ صلی اللہ علیہ وسلم نے حاطب کو بلوایا اور اس سے فرمایا: اے حاطب! یہ خط تو نے لکھا ہے؟ اس نے کہا: جی ہاں یا رسول اللہ صلی اللہ علیہ وسلم ، نبی اکرم صلی اللہ علیہ وسلم نے فرمایا: تو نے ایسا کیوں کیا؟ اس نے کہا: یا رسول اللہ صلی اللہ علیہ وسلم ، میں اللہ اور اس کے رسول کا خیر خواہ ہوں، لیکن میں اہل مکہ میں اجنبی تھا جبکہ میرے اہل و عیال انہیں لوگوں کے بیچ میں ہیں، مجھے اپنے بچوں کے بارے میں ڈر تھا، اس لئے میں نے ان کی جانب ایک خط لکھ دیا جس کا اللہ اور اس کے رسول کو کسی قسم کا کوئی نقصان نہیں تھا، ہاں البتہ میرے اہل و عیال کے لئے اس میں فائدہ ہو سکتا تھا۔ سیدنا عمر رضی اللہ عنہ فرماتے ہیں: میں نے اپنی تلوار نکالی اور عرض کیا: یا رسول اللہ صلی اللہ علیہ وسلم اسے میرے قبضے میں دیجئے، اس نے کفر کیا ہے، میں اس کو قتل کئے دیتا ہوں۔ رسول اللہ صلی اللہ علیہ وسلم نے فرمایا: اے ابن خطاب! تجھے کیا معلوم، شاید کہ اللہ تعالیٰ نے اہل بدر کی ان کوتاہیوں سے آگاہ ہونے کی بناء پر ہی ان سے فرمایا تھا: تم جو چاہو عمل کرو، میں نے تمہیں بخش دیا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو اس اسناد کے ہمراہ نقل نہیں کیا۔ البتہ دونوں نے عبداللہ بن ابی رافع رضی اللہ عنہ کی سیدنا علی رضی اللہ عنہ سے روایت کردہ حدیث نقل کی ہے جس میں (سیدنا علی رضی اللہ عنہ) کا یہ فرمان ہے کہ رسول اللہ صلی اللہ علیہ وسلم نے مجھے اور ابومرثد اور زبیر کو روضہ خاخ کی جانب بھیجا، اس حدیث کے الفاظ بھی کچھ مختلف ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 7142]