سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”تین باتیں ایسی ہیں جن پر میں قسم کھاتا ہوں، اور چوتھی بات ایسی ہے کہ اگر میں اس پر بھی قسم کھاؤں تو مجھے امید ہے کہ میں گناہ گار نہیں ہوں گا: اللہ تعالیٰ ایسے بندے کو جس کا اسلام میں کوئی حصہ ہو اس شخص کی طرح نہیں کرے گا جس کا اسلام میں کوئی حصہ نہ ہو، اور اللہ تعالیٰ جس بندے کا دنیا میں سرپرست بن جائے، قیامت کے دن اسے کسی اور کے حوالے نہیں کرے گا، اور کوئی شخص جس قوم سے محبت کرتا ہے وہ انہی کے ساتھ یا انہی میں سے ہو گا، اور چوتھی بات جس پر اگر میں قسم کھاؤں تو امید ہے کہ گناہ گار نہیں ہوں گا وہ یہ ہے کہ: اللہ تعالیٰ دنیا میں جس بندے کی پردہ پوشی فرماتا ہے، آخرت میں بھی اس کی پردہ پوشی فرمائے گا۔“ راوی کہتے ہیں کہ میں نے یہ حدیث عمر بن عبدالعزیز کو سنائی تو انہوں نے فرمایا: جب تم عروہ کے واسطے سے سیدہ عائشہ رضی اللہ عنہا سے رسول اللہ صلی اللہ علیہ وسلم کی ایسی حدیث سنو تو اسے حفظ کر لو اور اس کی حفاظت کرو۔ [المستدرك على الصحيحين/كتاب الحدود/حدیث: 8360]