ابوزید انصاری رضی اللہ عنہ فرماتے ہیں: رسول اللہ صلی اللہ علیہ وسلم نے ہمیں فجر کی نماز پڑھائی، پھر ظہر تک خطبہ دیا، پھر منبر سے نیچے تشریف لائے اور ظہر کی نماز پڑھائی، نماز سے فارغ ہو کر نماز عصر تک پھر خطبہ دیا، پھر عصر کے لئے نیچے تشریف لائے، نماز پڑھا کر، پھر منبر پر تشریف لے گئے اور مغرب تک آپ خطبہ دیتے رہے، اس دن حضور صلی اللہ علیہ وسلم نے ہمیں بعد میں آنے والے تمام واقعات بیان کر دیے، چنانچہ جس نے اس دن کی باتیں جتنی زیادہ یاد رکھیں، وہ اتنا ہی بڑا عالم ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8708]