سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میں کیسے خوش ہوں، جبکہ سیدنا اسرافیل علیہ السلام صور ہاتھ میں لئے ہوئے ہیں، اپنی پیشانی کو جھکائے ہوئے ہیں، اپنی سماعتوں کو متوجہ کئے ہوئے اس بات کے منتظر ہیں کہ کب حکم ملے اور وہ اس میں پھونکیں۔ ہم نے کہا: یا رسول اللہ صلی اللہ علیہ وسلم تو ہم کیا کہیں؟ آپ صلی اللہ علیہ وسلم نے فرمایا: تم کہا کرو ” ہمیں اللہ کافی ہے، اور وہ بہتر کارساز ہے، ہم نے اللہ پر توکل کیا “۔ ٭٭ امام حاکم کہتے ہیں: ہم نے اعمش کی وہ حدیث صرف اسی اسناد کے ہمراہ نقل کی ہے جو انہوں نے ابوصالح کے واسطے سے ابوسعید سے روایت کی ہے۔ اگر اس کی سند میں ابویحیی تیمی نہ ہوتے تو میں یہ فیصلہ کر دیتا کہ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے۔ اس حدیث کی ایک اصل بھی ہے جو کہ زید بن اسلم نے عطاء بن یسار کے واسطے سے ابوسعید خدری سے روایت کی ہے۔ [المستدرك على الصحيحين/كتاب : الأهوال/حدیث: 8892]