سیدنا انس بن مالک رضی اللہ عنہ سے روایت ہے، انہوں نے کہا کہ ایک روز رسول اللہ صلی اللہ علیہ وسلم ہنسے یا مسکرائے، پھر رسول اللہ صلی اللہ علیہ وسلم نے فرمایا: ”کیا تم مجھ سے نہیں پوچھو گے کہ میں کس بات پر ہنسا ہوں؟“ پھر آپ صلی اللہ علیہ وسلم نے خود ہی فرمایا: ”مجھے قیامت کے دن بندے کا اپنے رب سے جھگڑنا عجیب لگا، وہ کہے گا: اے میرے رب! کیا تو نے مجھ سے یہ وعدہ نہیں فرمایا تھا کہ تو مجھ پر ظلم نہیں کرے گا؟ اللہ تعالیٰ فرمائے گا: کیوں نہیں! وہ کہے گا: پس میں اپنے خلاف اپنی ذات کے سوا کسی اور کی گواہی ہرگز قبول نہیں کروں گا۔ اللہ تعالیٰ فرمائے گا: کیا میری گواہی اور میرے معزز فرشتے جو اعمال لکھنے والے ہیں کافی نہیں؟ آپ صلی اللہ علیہ وسلم نے فرمایا: وہ بندہ یہ بات کئی بار دہرائے گا، تو اس کے منہ پر مہر لگا دی جائے گی اور اس کے اعضاء اس کے اعمال بول کر بتائیں گے۔ پھر وہ بندہ (اپنے اعضاء سے) کہے گا: تم پر لعنت ہو اور تم برباد ہو جاؤ! میں تو تمہاری ہی خاطر جھگڑ رہا تھا۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب : الأهوال/حدیث: 8992]