سیدنا ابوبکر و عمر رضی اللہ عنہما کی فضیلت
❀ سیدنا ابوجحیفہ سوائی ؓ بیان کرتے ہیں کہ رسول اللہ صلی اللہ علیہ وسلم نے فرمایا:
«أَبُو بَكْرٍ وَعُمَرُ سَيِّدَا كُهُولِ أَهْلِ الْجَنَّةِ الْأَوَّلِينَ وَالْآخِرِينَ إِلَّا النَّبِيِّينَ وَالْمُرْسَلِينَ .»
”ابوبکر اور عمر بن خطاب نبیوں اور رسولوں کے علاوہ پہلے اور بعد والے تمام ادھیڑ عمر جنتیوں کے سردار ہوں گے۔“ [سنن ابن ماجه: 100]
اس حدیث کو امام ابن حبان ؒ نے اپنی کتاب [صحيح ابن حبان: 4904] میں صحیح قرار دیا ہے۔
سیدنا حسن و حسین رضی اللہ عنہما کی فضیلت
❀ متواتر حدیث ہے:
«الْحَسَنُ وَالْحُسَيْنُ سَيِّدَا شَبَابِ أَهْلِ الْجَنَّةِ .»
”حسن و حسین جنتی نوجوانوں کے سردار ہیں۔“ [سنن التّرمذي: 3781]
اس حدیث کو امام ترمذی نے حسن غریب، امام ابنِ خزیمہ [صحيح ابن خزيمة: 1194] ، امام ابن حبان [صحيح ابن حبان: 7126، 6960] اور امام حاکم [المستدرك على الصحيحين: 3/381، 151] نے صحیح کہا ہے، حافظ ذہبی نے موافقت کی ہے۔
اس حدیث کو حافظ سیوطی [الازهار: 103] نے متواتر قرار دیا ہے۔
امام حاکم ؒ کا تبصرہ
◈ امام حاکم ؒ فرماتے ہیں:
«هٰذَا حَدِيثٌ قَدْ صَحَّ مِنْ أَوْجُهٍ كَثِيرَةٍ .»
”یہ حدیث کئی طرق سے صحیح ہے۔“ [المُستدرك على الصحيحين: 3/167]

اردو حاشیہ:
نبی وہ ہے جس پر وحی اترے اور رسول اس سے خاص ہے۔ بعض نے کہا ہے کہ رسول وہ ہے جو کتاب و شریعت جداگانہ رکھتا ہو اور کسی خاص قوم کی طرف مبعوث ہو اور نبی جو اس کے قدم بقدم ہو، مبلغ ہو۔ وحی دونوں پر آتی ہے۔
مزید تفصیل کے لیے ملاحظہ ہو، حدیث: 95 کے فوائد و مسائل۔