عیدین کی نماز میں تکبیرات زوائد پر رفع یدین کرنا
عیدین کی نماز میں تکبیرات زوائد پر رفع یدین کرنا بالکل صحیح ہے، کیونکہ نبی صلی اللہ علیہ وسلم رکوع سے پہلے ہر تکبیر کے ساتھ رفع یدین کرتے تھے۔ [ابوداود ح 722، مسند احمد 2/ 133، 134 ح 6175، منتقی ابن الجارود ص 69 ح 178]
اس حدیث کی سند بالکل صحیح ہے، بعض لوگوں کا عصرِ حاضر میں اس حدیث پر جرح کرنا مردود ہے۔
امام بیہقی اور امام ابن المنذر نے اس حدیث سے ثابت کیا ہے کہ تکبیرات ِ عیدین میں بھی رفع یدین کرنا چاہئے۔ دیکھئے: [التلخيص الحبير ج 1 ص 86 ح 692 والسنن الكبريٰ للبيهقي 3/ 292، 293 والاوسط لابن المنذر 4/ 282]
عید الفطر والی تکبیرات کے بارے میں عطاء بن ابی رباح (تابعی) فرماتے ہیں: «نعم ويرفع الناس أيضًا» جی ہاں! ان تکبیرات میں رفع یدین کرنا چاہئے، اور (تمام) لوگوں کو بھی رفع یدین کرنا چاہئے۔ [مصنف عبدالرزاق 3/ 296 ح 5699، وسندہ صحیح]
امام اہلِ الشام اوزاعی رحمہ اللہ فرماتے ہیں: «نعم ارفع يديك مع كلهن» جی ہاں، ان ساری تکبیروں کے ساتھ رفع یدین کرو۔ [احكام العيدين للفريابي ح 136، وسنده صحيح]
امام دارالہجرۃ مالک بن انس رحمہ اللہ نے فرمایا: «نعم، إرفع يديك مع كل تكبيرة ولم أسمع فيه شيئًا» جی ہاں، ہر تکبیر کے ساتھ رفع یدین کرو اور میں نے اس (کے خلاف) کوئی چیز نہیں سنی۔ [احكام العيدين ح 137، وسنده صحيح]
اس صحیح قول کے خلاف مالکیوں کی غیر مستند کتاب ”مدونہ“ میں ایک بے سند قول مذکور ہے [ج 1 ص 155]
یہ بے سند حوالہ مردود ہے، ”مدونہ“ کے رد کے لئے دیکھئے میری کتاب القول المتین فی الجہر بالتأمین [ص 73]
اسی طرح علامہ نووی کا حوالہ بھی بے سند ہونے کی وجہ سے مردود ہے۔ دیکھئے: [المجموع شرح المهذب ج 5 ص 26]
امام اہلِ مکہ شافعی رحمہ اللہ بھی تکبیراتِ عیدین میں رفع یدین کے قائل تھے۔ دیکھئے: [كتاب الأم ج 1 ص 237]
امام اہلِ سنت احمد بن حنبل فرماتے ہیں: «يرفع يديه فى كل تكبيرة» (عیدین کی) ہر تکبیر کے ساتھ رفع یدین کرنا چاہئے۔ [مسائل احمد رواية ابي داود ص 60 باب التكبير فى صلوٰة العيد]
ان تمام آثار سلف کے مقابلے میں محمد بن الحسن الشیبانی نے لکھا ہے: «ولا يرفع يديه“» اور (عیدین کی تکبیرات میں) رفع یدین نہ کیا جائے۔ [كتاب الاصل ج 1 ص 374، 375 والاوسط لابن المنذر ج 4 ص 282]
یہ قول دو وجہ سے مردود ہے:
محمد بن الحسن الشیبانی سخت مجروح ہے۔
دیکھئے: [كتاب الضعفاء للعقيلي ج 4 ص 52، وسنده صحيح، و جزء رفع اليدين للبخاري بتحقيقي ص 32]
اس کی توثیق کسی معتبر محدث سے، صراحتاً باسند صحیح ثابت نہیں ہے۔ میں نے اس موضوع پر ایک رسالہ ”النصر الربانی“ لکھا ہے جس میں ثابت کیا ہے کہ شیبانی مذکور سخت مجروح ہے۔
محمد بن حسن شیبانی کا قول سلف صالحین کے اجماع و اتفاق کے خلاف ہونے کی وجہ سے بھی مردود ہے۔
. . . اصل مضمون کے لئے دیکھیں . . .
تحقیقی مقالات جلد 1 صفحہ 47

اردو حاشہ:
1؎:
یعنی تکبیر تحریمہ کے ساتھ پانچ،
یعنی پہلی میں چار زائد تکبیریں۔

2؎:
یہ کل سات تکبیریں زائد ہوئیں اس کی سند ابن مسعود رضی اللہ عنہ تک صحیح ہے،
لیکن یہ موقوف ہے خود آپ صلی اللہ علیہ وسلم کا عمل بارہ زوائد تکبیرات پر تھا،
ولنا المرفوع۔

نوٹ:
(سند میں کثیر ضعیف راوی ہیں،
لیکن شواہد کی بناء پر یہ حدیث صحیح ہے،
دیکھئے:
صحیح أبی داود 1045-1046،
والعیدین 26/989)