اردو حاشہ:
فوائد و مسائل:
(1)
شیعہ فرقے کے خود ساختہ مسائل میں سے ایک مسئلہ یہ بھی ہے کہ رسول اللہ صلی اللہ علیہ وسلم نے اپنی زندگی میں حضرت علی رضی اللہ تعالیٰ عنہ کو اپنا جانشین نامزد فرما دیا تھا۔
لیکن اس دعوے کی کوئی مضبوط دلیل نہیں۔
اگر رسول اللہ صلی اللہ علیہ وسلم نے کسی کا تعین فرمایا ہوتا تو صحابہ کرام رضوان اللہ عنہم اجمعین کو مشورہ کرنے کی ضرورت پیش نہ آتی۔
بلکہ رسول اللہ صلی اللہ علیہ وسلم کی نظر میں حضرت ابو بکر رضی اللہ تعالیٰ عنہ ہی جانشینی کے زیادہ لائق تھے۔
خود حضرت علی رضی اللہ تعالیٰ عنہ نے بھی سقیفہ بنو ساعدہ میں یہ نہیں فرمایا کہ تمھیں مشورہ کرنے کی ضرورت نہیں کیونکہ مجھے نامزد کیا جا چکا ہے۔
حضرت عمر رضی اللہ تعالیٰ عنہ اور حضرت عثمان رضی اللہ تعالیٰ عنہ کے دور حکومت میں بھی حضرت علی رضی اللہ تعالیٰ عنہ نے اس امر کا اظہار نہیں فرمایا۔
بلکہ حضرت عثمان رضی اللہ تعالیٰ عنہ کی شہادت کے بعد بھی انھیں خلافت کی ذمہ داری اٹھانے میں تامل تھا۔
بعض لوگوں کے اصرار پر انھوں نے یہ منصب قبول فرمایا تھا۔
تفصیلات تاریخ کی کتابوں میں ملاحظہ کی جا سکتی ہیں۔

(2)
موت کی سختی کا ایک جسمانی اثر ہے۔
جو نیک لوگوں پر بھی ظاہر ہوجاتا ہے۔
ایک روحانی سختی ہے۔
جس کا تعلق فرشتوں کے روح قبض کرنے سے ہے۔
یہ نیک مومن افراد پر نہیں ہوتی۔
رسول اللہ صلی اللہ علیہ وسلم نے روح پرواز کرنے سے پہلے کچھ گھبراہٹ محسوس کی لیکن جسم سے روح کی جُدائی اس قدر غیر محسوس طریقے پر عمل میں آئی کہ حضرت عائشہ رضی اللہ تعالیٰ عنہا کو احسان تب ہوا جب روح اقدس عالم بالا میں پرواز کرچکی تھی۔

(3)
رسول اللہ صلی اللہ علیہ وسلم شدت ضعف کی وجہ سے پیشاب کی حاجت کےلئے بستر سے اترنے میں مشکل محسوس کررہے تھےاس لئے برتن طلب فرمایا تاکہ اس حاجت سے فارغ ہو جایئں اور جسم اطہر اور لباس مبارک بھی قطرات سے محفوظ رہیں۔
اس سے معلوم ہوتا ہے کہ نبی کریم صلی اللہ علیہ وسلم کی نظر میں جسمانی طہارت وصفائی کی اہمیت کس قدر زیادہ تھی۔

(4)
نبی کریم صلی اللہ علیہ وسلم نے برتن طلب فرمایا لیکن یہ حاجت پوری کرنے کی نوبت نہ آئی۔
اس سے علم غیب کے عقیدے کی نفی ہوتی ہے۔
اگر نبی کریم صلی اللہ علیہ وسلم کوعلم ہوتا کہ برتن کے استعمال کی ضرورت نہیں پڑے گی تو طلب نہ فرماتے۔