حضرت عباس بن عبدالمطلب رضی اللہ عنہ سے روایت ہے، انہوں نے فرمایا: ”میں بطحاء مقام پر ایک جماعت میں تھا۔ مجلس میں رسول اللہ صلی اللہ علیہ وسلم بھی تشریف فرما تھے۔ ایک بدلی گزری تو آپ صلی اللہ علیہ وسلم نے اس کی طرف دیکھا اور فرمایا: ”تم لوگ اسے کیا کہتے ہو؟“ انہوں نے کہا: «السَّحَابُ» ”سحاب“۔ فرمایا: ”اور «الْمُزْنُ» ”بادل“ بھی (کہتے ہو۔)“ انہوں نے کہا: اور بادل بھی۔ فرمایا: ”اور «الْعَنَانُ» ”ابر“ بھی۔“ انہوں نے کہا: اور ابر بھی۔ فرمایا: ”تمہارے خیال میں تم سے آسمان کا فاصلہ کس قدر ہے؟“ انہوں نے کہا: ہمیں تو معلوم نہیں۔ فرمایا: ”تم سے اس کا فاصلہ اکہتر یا بہتر یا تہتر سال کا ہے۔ اس سے اوپر آسمان (کی موٹائی) بھی اسی قدر ہے۔“ حتیٰ کہ آپ صلی اللہ علیہ وسلم نے سات آسمان (اس انداز سے) شمار فرمائے۔ پھر فرمایا: ”پھر ساتویں آسمان کے اوپر ایک سمندر ہے اس کے اوپر کے حصے اور نیچے کے حصے کے درمیان اتنا فاصلہ ہے جتنا ایک آسمان سے دوسرے آسمان تک ہے۔ اس سے اوپر آٹھ مینڈھے ہیں (عرش اٹھانے والے فرشتے، جن کی صورت مینڈھوں کی سی ہے۔) ان کے کھروں اور گھٹنوں کے درمیان اتنا فاصلہ ہے جتنا ایک آسمان سے دوسرے آسمان تک ہے۔ پھر ان کی پشتوں پر عرشِ الٰہی ہے، اس کے اوپر کے حصے اور نیچے کے حصے کے درمیان اتنا فاصلہ ہے جتنا ایک آسمان سے دوسرے آسمان تک ہے۔ پھر اللہ تبارک و تعالیٰ اس سے بھی اوپر ہے، وہ برکتوں والا اور بلندیوں والا ہے۔““ [سنن ابن ماجه/(أبواب كتاب السنة)/حدیث: 193]