حضرت عبدالرحمن بن صفوان یا حضرت صفوان بن عبدالرحمن قرشی رضی اللہ عنہ سے روایت ہے، انہوں نے فرمایا: جس دن مکہ فتح ہوا، وہ اپنے والد کو لے کر حاضر خدمت ہوئے اور عرض کیا: ”اے اللہ کے رسول صلی اللہ علیہ وسلم ! ہجرت میں میرے والد کو بھی شریک کر لیجئے (انہیں مہاجرین میں شمار کر لیجئے)۔“ آپ صلی اللہ علیہ وسلم نے فرمایا: ”(اب) کوئی ہجرت نہیں۔“ وہ حضرت عباس رضی اللہ عنہ کے پاس چلے گئے اور کہا: ”آپ نے مجھے پہچانا؟“ حضرت عباس رضی اللہ عنہ نے کہا: ”ہاں“ (تب انہوں نے اپنا واقعہ بیان کیا) تو حضرت عباس رضی اللہ عنہ صرف قمیص پہنے ہوئے (ان کے ساتھ) چل دیے، چادر بھی نہ اوڑھی اور کہا: ”اے اللہ کے رسول صلی اللہ علیہ وسلم ! آپ فلاں صاحب سے واقف ہیں اور ان سے ہمارے تعلقات ہیں (وہ بھی آپ کو معلوم ہیں)، وہ اپنے والد کو لے کر حاضر ہوئے ہیں کہ آپ ان سے ہجرت کی بیعت لیں“ تو نبی صلی اللہ علیہ وسلم نے فرمایا: ”(اب) کوئی ہجرت نہیں۔“ حضرت عباس رضی اللہ عنہ نے کہا: ”میں آپ کو قسم دیتا ہوں۔“ (اس پر) نبی صلی اللہ علیہ وسلم نے ہاتھ بڑھا کر ان صاحب کا ہاتھ چھو لیا اور فرمایا: ”میں نے اپنے چچا کی قسم پوری کی ہے اور ہجرت کوئی نہیں۔“ [سنن ابن ماجه/كتاب الكفارات/حدیث: 2116]