حضرت ضباعہ بنت زبیر رضی اللہ عنہا نے حضرت مقداد بن عمرو رضی اللہ عنہ سے روایت بیان کی کہ وہ ایک دن قضائے حاجت کے لیے بقیع کے قبرستان کی طرف گئے۔ (اس زمانے میں) لوگوں کی حالت یہ تھی کہ آدمی دو تین دن میں ایک بار قضائے حاجت کے لیے جاتا، (تب بھی) اس طرح مینگنیاں کرتا جس طرح اونٹ مینگنیاں کرتے ہیں۔ وہ ایک کھنڈر میں چلے گئے۔ وہ قضائے حاجت کے لیے بیٹھے ہوئے تھے کہ ایک چوہا نظر آیا، اس نے بل میں سے ایک دینار نکالا، پھر بل میں گیا اور ایک اور دینار نکال لایا حتیٰ کہ اس نے (ایک ایک کر کے) سترہ دینار نکالے، پھر ایک سرخ کپڑے کا ٹکڑا نکال لایا۔ حضرت مقداد رضی اللہ عنہ کہتے ہیں: میں نے کپڑے کو اٹھا کر دیکھا تو مجھے اس میں بھی ایک دینار ملا، یہ سب اٹھارہ دینار ہو گئے۔ میں انہیں لے کر (کھنڈر سے) باہر آ گیا اور انہیں لا کر رسول اللہ صلی اللہ علیہ وسلم کی خدمت میں پیش کر دیا اور ان دیناروں کے ملنے کا واقعہ عرض کیا اور میں نے کہا: ”اے اللہ کے رسول صلی اللہ علیہ وسلم ! ان کی زکاۃ لے لیجیے۔“ رسول اللہ صلی اللہ علیہ وسلم نے فرمایا: ”انہیں لے جاؤ، ان میں کوئی زکاۃ نہیں (کیونکہ بیس دینار کا نصف پورا نہیں ہوا۔) اللہ تجھے ان میں برکت دے۔“ پھر فرمایا: ”شاید تو نے بل میں ہاتھ ڈالا ہو گا؟“ میں نے کہا: ”نہیں، قسم ہے اس ذات کی جس نے آپ کو حق کے ساتھ عزت بخشی!“ راوی نے کہا: ان کی وفات تک وہ دینار ختم نہ ہوئے۔ [سنن ابن ماجه/كتاب اللقطة/حدیث: 2508]