جو قربانی کا استخفاف و توہین کرتے ہوئے استطاعت کے باوجود قربانی نہ کرے
سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«من كان له سعة ولم يضحّ فلا يقر بنّ مصلانا»
جس آدمی کے پاس طاقت ہو اور وہ قربانی نہ کرے تو ہماری عیدگاہ کے قریب بھی نہ آئے۔ [سنن ابن ماجه: 3123 وسنده حسن، وصححه الحاكم 4/ 232 ووافقه الذهبي ورواه احمد 2 / 321]
اس روایت میں عبداللہ بن عیاش المصری مختلف فیہ راوی ہیں جن پر کبار علماء وغیرہم نے جرح کی اور جمہور نے توثیق کی، تقریباًً پانچ اور چھ کا مقابلہ ہے۔!
روایتِ مذکورہ کا مطلب یہ ہے کہ جو شخص قربانی کا استخفاف و توہین کرتے ہوئے استطاعت کے باوجود قربانی نہ کرے تو اسے مسلمانوں کی عیدگاہ سے دور رہنا چاہئے یعنی یہ روایت قربانی کے استحباب وسُنیت پر محمول اور منکرینِ حدیث کا رد ہے۔
اصل مضمون کے لئے دیکھئے . . .
ماہنامہ الحدیث حضرو، شمارہ 122، صفحہ 17 تا 25

جو استطاعت کے باوجود قربانی نہ کرے، التمهید لابن عبد البر: 23/191، وسندہ صحیح
❀ سیدنا ابو ہریرہ رضی اللہ عنہ فرماتے ہیں:
«مَنْ قَدَرَ عَلَى سَعَةٍ فَلَمْ يُضَحِّ فَلَا يَقْرَبَنَّ مُصَلَّانَا .»
”جو استطاعت کے باوجود قربانی نہ کرے، وہ ہماری عید گاہ کے قریب بھی نہ پھٹکے۔“ [التمهید لابن عبد البر: 23/191، وسندہ صحیح]
اس سے قربانی کا واجب ہونا ثابت نہیں ہوتا۔
مرفوع روایت:
اس بارے میں کوئی مرفوع روایت ثابت نہیں۔
❀ سیدنا ابو ہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا:
«مَنْ كَانَ لَهُ سَعَةٌ فَلَمْ يُضَحِّ فَلَا يَقْرَبَنَّ مُصَلَّانَا .»
”استطاعت و قدرت کے باوجود قربانی نہ کرنے والا ہماری عید گاہوں کے قریب نہ پھٹکے۔“ [مسند احمد: 2/321، سنن ابن ماجہ: 3123، المستدرک للحاکم: 2/390]
یہ روایت مرفوعاً ضعیف و منکر ہے۔
عبد اللہ بن عیاش قتبانی ضعیف ہے۔
◈ امام ابو حاتم رازی رحمہ اللہ فرماتے ہیں:
«لَيْسَ بِالْمَتِينِ .»
”یہ پختہ کار راوی نہیں، (منکر روایات بیان کر دیتا ہے)۔“ [الجرح والتعدیل لابن أبي حاتم: 5/126]
◈ امام ابن یونس رحمہ اللہ نے ”منکر الحدیث“ کہا ہے۔ [الإكمال لابن ماکولا: 6/72، تہذیب التہذیب: 5/351]
◈ علامہ ابن حزم رحمہ اللہ فرماتے ہیں:
«لَيْسَ مَعْرُوفًا بِالثِّقَةِ .»
”یہ ثقہ نہیں ہے۔“ [المحلّٰى بالآثار: 6/8]
◈ اس روایت کو امام احمد بن حنبل رحمہ اللہ نے ”منکر“ کہا ہے۔ [الفروسیۃ لابن القیم، ص 200، کتاب الفروع لابن مفلح: 2/309]
◈ علامہ ابن حزم رحمہ اللہ نے اس روایت پر جرح کی ہے۔ [المحلّٰى بالآثار: 6/7]
◈ حافظ ابن حجر رحمہ اللہ فرماتے ہیں:
«اُخْتُلِفَ فِي رَفْعِهِ وَوَقْفِهِ وَالْمَوْقُوفُ أَشْبَهُ بِالصَّوَابِ قَالَهُ الطَّحَاوِيُّ وَغَيْرُهُ وَمَعَ ذَلِكَ فَلَيْسَ صَرِيحًا فِي الْإِيجَابِ .»
”اس حدیث کے مرفوع اور موقوف ہونے میں اختلاف ہے، اس کا موقوف ہونا راجح ہے، جیسا کہ امام طحاوی وغیرہ رحمہ اللہ نے بیان کیا ہے۔ اس کے ساتھ ساتھ یہ قربانی کے وجوب پر صراحت نہیں کرتی۔“
◈ امام دارقطنی رحمہ اللہ نے اس روایت کا موقوف ہونا ہی صحیح قرار دیا ہے۔ [عِلَل الدارقطني: 2023]
◈ حافظ ابن عبدالبر رحمہ اللہ فرماتے ہیں:
«الْأَغْلَبُ عِنْدِي فِي هَذَا الْحَدِيثِ أَنَّهُ مَوْقُوفٌ عَلَى أَبِي هُرَيْرَةَ .»
”میرے نزدیک صواب یہی ہے کہ یہ سیدنا ابو ہریرہ رضی اللہ عنہ کی موقوف روایت ہے۔“ [التمہید لما في المؤطا من المعاني والأسانید: 23/191]

فوائد و مسائل:
➊ اس حدیث سے بظاہر قربانی کا وجوب ثابت ہوتا ہے لیکن دوسرے دلائل سے اس کا استحباب واستنان معلوم ہوتا ہے اس لیے محدثین نے ان سارے دلائل کو سامنے رکھتے ہوئے یہ فیصلہ کیا ہے کہ قربانی سنت مؤکدہ ہے۔
یعنی ایک اہم اور مؤکد حکم ہے۔
فرض نہیں تاہم استطاعت کے باوجود اس سنت مؤکدہ سے گریز کسی طرح بھی صحیح نہیں۔
➋ قربانی مسلمانوں کی اجتماعیت کا مظہر ہے اور اس سے آپس کے تعلقات بہتر ہوتے ہیں۔
➌ قربانی نہ کرنے والا مسلمانوں کی خوشیوں میں شریک ہونے کا حق نہیں رکھتا تاہم اس کا یہ مطلب نہیں کہ اسے نماز عید پڑھنے کی ضرورت نہیں بلکہ مقصد اسے تنبیہ کرنا ہے تاکہ وہ قربانی ترک نہ کرے۔