اردو حاشہ:
(1)
اس حدیث سے بظاہر معلوم ہوتا ہے کہ نیند سے وضو نہیں ٹوٹتا جبکہ آگے آنے والی حدیث:
(477)
میں ہے کہ رسول اللہ صلی اللہ علیہ وسلم نے سو جانے والے کو دوبارہ وضو کرنے کا حکم دیا ہے اس لیے اس مسئلہ میں علماء کے مختلف اقوال ہیں۔
زیادہ صحیح یہ معلوم ہوتا ہے کہ بیٹھے بیٹھے سوجانے سے وضو نہیں ٹوٹتا اور لیٹ کر سوجانے سے وضو ٹوٹ جاتا ہے۔
ٹیک لگا کر سونا بھی لیٹ کر سونے کے حکم میں ہے۔
حضرت عائشہ رضی اللہ عنہ کی اس حدیث میں یہ صراحت نہیں کہ آپ صلی اللہ علیہ وسلم جس نیند کے بعد وضو نہیں کرتے تھے وہ بیٹھے بیٹھے ہوتی تھی یا لیٹ کر۔
اگر بیٹھے ہوئے سونا مراد ہوتو کوئی اشکال نہیں۔
اگر لیٹ کر ہو تو کہا جا سکتا ہےکہ یہ نبی صلی اللہ علیہ وسلم کا خاصہ ہے کیونکہ آپ صلی اللہ علیہ وسلم کے حواس نیند میں بھی قائم رہتے تھے۔
آپ صلی اللہ علیہ وسلم کا ارشاد ہے:
(تَنَامُ عَيْنِي وَلَا يَنَامُ قَلْبِي)
ميری آنکھ سوتی ہے اور میرا دل نہیں سوتا۔
 (صحيح البخاري، المناقب، باب كان النبي صلی اللہ علیہ وسلم تنام عینه ولاینام قلبه، حديث: 3569)
امام نووی ؒ نے صحیح مسلم کی شرح میں اسی عنوان سے باب باندھا ہے۔ (بابُ الدَّلَیْلِ اَنَّ نَوْمَ الْجَالِسِ لَايَنْقُضُ الْوُضُوءِ)
 اس بات كی دلیل کہ بیٹھ کر سونے سے وضو نہیں ٹوٹتا،  لیکن یہ قول بھی پہلے قول سے کچھ زیادہ مختلف نہیں ہے کیونکہ نماز کی ہیت میں سونا نہیں اور وضو لیٹ کر سونے سے ٹوٹتا ہے واللہ أعلم۔