اردو حاشہ:
نوٹ:
(حارثہ بن ابی الرجال ضعیف ہیں،
جیسا کہ خود مؤلف نے کلام کیا ہے،
لیکن سابقہ حدیث سے تقویت پا کر یہ صحیح ہے)

776۔ اردو حاشیہ:
علامہ شوکانی رحمہ اللہ فرماتے ہیں کہ نبی کریم صلی اللہ علیہ وسلم سے صحیح اسانید سے ثابت اذکار کا اختیار کرنا ہی اولیٰ اور افضل ہے۔ افتتاح نماز کی دعاؤں میں سب سے صحیح ترین حضرت ابوہریرہ رضی اللہ عنہ کی حدیث ہے: «يعني اللهم باعد بيني و بين . . .» [صحيح بخاري حديث 744۔ وصحيح مسلم حديث 598] اس کے بعد حدیث علی رضی اللہ عنہ یعنی «وجهت وجهي للذي فطر السموات . . . الخ» اور حدیث عائشہ رضی اللہ عنہا اور ابوسعید رضی اللہ عنہ یعنی «سبحانك اللهم . . . الخ» میں کلام ہے۔ [نيل الاوطار 215/2۔ تا 219]
لیکن امام شوکانی رحمہ اللہ نے اگلے باب میں اس حدیث کو بھی شواہد کی وجہ سے قابل عمل قرار دیا ہے۔
شیخ البانی رحمہ اللہ نے اس حدیث کو صحیح قرار دیا ہے۔
علاوہ ازیں ہمارے محقق (شیخ زبیر علی زئی رحمہ اللہ) نے بھی اسے صحیح کہا ہے۔
اس لئے اس دعائے استفتاح کا پڑھنا بھی صحیح ہے، گو درجات حدیث میں اس کا نمبر تیسرا ہے، لیکن یہ بھی صحیح ہے۔

تحقیق دعائے استفتاح
مذکورہ دعائے استفتاح متعدد صحابہ کرام رضی اللہ عنہم سے مرفوعاً و موقوفاً مروی ہے کہ محدثین کرام نے اسے صحیح قرار دیا ہے۔
❀ حضرت عائشہ رضی اللہ عنہا بیان فرماتی ہیں کہ رسول اللہ صلی اللہ علیہ وسلم جب نماز کا آغاز کرتے تو مذکورہ دعا پڑھتے۔
[ابو داؤد، الصلوٰۃ: 776، ترمذی، الصلوٰۃ: 243، ابن ماجہ، اقامۃ الصلوات: 806]
◈ امام حاکم رحمہ اللہ نے اسے روایت کیا ہے اور علامہ ذہبی رحمہ اللہ نے اسے صحیح قرار دیا ہے۔ [مستدرک: 1/235]
لیکن اس کی سند میں ایک راوی حارثہ ہے جس کے متعلق علمائے جرح و تعدیل نے کلام کیا ہے، مگر اس حدیث کی ایک دوسری سند سے اسے تقویت پہنچتی ہے۔ [دارقطنی، حدیث نمبر: 1128]
◈ علامہ البانی رحمہ اللہ لکھتے ہیں کہ یہ سند منقطع ہونے کے باوجود پہلی حدیث کے لیے بہترین مؤید ہے۔
اس بنا پر یہ روایت درجہ حسن تک پہنچ جاتی ہے۔
اگر اس کے ساتھ حضرت ابو سعید خدری رضی اللہ عنہ کی حدیث کو ملا دیا جائے تو درجہ صحت تک پہنچ جاتی ہے۔ [ارواء الغلیل: 2/502]
➊ ❀ حضرت ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم جب رات کے وقت نماز کے لیے کھڑے ہوتے تو اللہ اکبر کہہ کر مذکورہ دعا پڑھتے تھے۔ [نسائی: 2/132، دارمی: 1/282، مسند امام احمد: 3/50]
◈ شیخ احمد شاکر رحمہ اللہ نے اس حدیث کو صحیح کہا ہے۔ [تحقیق ترمذی، ص: 11، ج: 2]
◈ البانی رحمہ اللہ نے اس روایت کو حسن قرار دیا ہے۔
[ارواء الغلیل، ص: 53، ج: 2]
➋ ❀ حضرت انس رضی اللہ عنہ بیان کرتے ہیں کہ رسول اللہ صلی اللہ علیہ وسلم جب نماز شروع کرتے تو اللہ اکبر کہتے، پھر اپنے ہاتھوں کو کانوں تک اٹھاتے اس کے بعد مذکورہ دعا پڑھتے۔ [دارقطنی، حدیث نمبر: 1135]
◈ اس حدیثِ انس رضی اللہ عنہ کو امام طبرانی رحمہ اللہ نے بھی بیان کیا ہے اور اسے صحیح قرار دیا ہے۔
➌ ❀ حضرت جابر رضی اللہ عنہ سے بھی مرفوعاً یہ دعا مروی ہے، لیکن اس کے بعد «وَجَّہْتُ وَجْہِیَ لِلَّذِیْ» کا بھی ذکر ہے۔ [بیہقی: 1/35]
➍ ❀ حضرت عمر رضی اللہ عنہ سے موقوفاً یہ دعا پڑھنا منقول ہے۔ [صحیح مسلم، الصلوٰۃ: 892]
لیکن مسلم کی روایت میں انقطاع ہے، کیونکہ اس میں ایک راوی عبدہ ہے جس نے حضرت عمر رضی اللہ عنہ سے نہیں سنا ہے، لیکن امام دارقطنی رحمہ اللہ نے یہ موقوف روایت متعدد اسانید سے موصولاً بیان کی ہے۔ [دارقطنی: 1130 تا 1133]
◈ دارقطنی رحمہ اللہ نے حضرت عمر رضی اللہ عنہ سے اس روایت کو مرفوعاً بھی بیان کیا ہے، تاہم وضاحت کر دی ہے کہ اس کا موقوف ہونا صحیح ہے۔ [دارقطنی: 1129]
اس روایت کے پیش نظر بہتر ہے کہ صحیحین کی روایت کے مطابق نماز کے آغاز میں «اللّٰہُمَّ بَاعِدْبَیْنِیْ» پڑھی جائے، لیکن اگر کوئی سہولت کے پیش نظر «سُبْحَانَکَ اللّٰھُمَّ وَبِحَمْدِکَ» پڑھتا ہے تو یہ بھی صحیح ہے۔
متعدد محدثین کرام نے مجموعی طور پر مذکورہ بالا روایت کو صحیح اور قابل حجت قرار دیا ہے۔ [واللہ اعلم]
«ھذا ما عندي والله أعلم بالصواب»
[فتاویٰ اصحاب الحدیث، جلد: 2، صفحہ: 151]