´صحابی رسول کا آخرت کو یاد کر کے رونا`
«. . . ‏‏‏‏وَعَن أبي نَضرة أَنَّ رَجُلًا مِنْ أَصْحَابِ النَّبِيِّ صَلَّى اللَّهُ عَلَيْهِ وَسَلَّمَ يُقَالُ لَهُ أَبُو عَبْدِ اللَّهِ دَخَلَ عَلَيْهِ أَصْحَابُهُ يَعُودُونَهُ وَهُوَ يَبْكِي فَقَالُوا لَهُ مَا يُبْكِيكَ أَلَمْ يَقُلْ لَكَ رَسُولُ اللَّهِ صَلَّى اللَّهُ عَلَيْهِ وَسَلَّمَ خُذْ مِنْ شَارِبِكَ ثُمَّ أَقِرَّهُ حَتَّى تَلْقَانِي قَالَ بَلَى وَلَكِنِّي سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ: «إِنَّ اللَّهَ عَزَّ وَجَلَّ قَبَضَ بِيَمِينِهِ قَبْضَةً وَأُخْرَى بِالْيَدِ الْأُخْرَى وَقَالَ هَذِهِ لِهَذِهِ وَهَذِه لهَذِهِ وَلَا أُبَالِي فَلَا أَدْرِي فِي أَيِّ الْقَبْضَتَيْنِ أَنَا» . رَوَاهُ أَحْمَدُ . . .»
”. . . سیدنا ابونضرہ رضی اللہ عنہ سے مروی ہے کہ رسول اللہ صلی اللہ علیہ وسلم کے ایک صحابی بیمار تھے جن کو ابوعبداللہ کہا جاتا تھا ان کی بیمار پرسی کی غرض سے ان کے دوست آئے، وہ رو رہے تھے ان کے دوستوں نے ان سے کہا کہ آپ کیوں روتے ہیں اور کون سی چیز آپ کو رلاتی ہے؟ کیا آپ سے رسول اللہ صلی اللہ علیہ وسلم نے یہ نہیں فرمایا تھا تم اپنی لبیں، تراش لو اور اسی پر جمے رہنا یعنی ہمیشہ تراشتے رہنا، یہاں تک کہ ہم سے ملنا (یعنی آپ کیوں روتے ہیں آپ کو تو رسول اللہ صلی اللہ علیہ وسلم نے اپنے ملنے کی بشارت دی اور یہ بغیر اسلام کے ممکن نہیں تو معلوم ہوا کہ آپ اسلام پر مریں گے اور جنت میں رسول اللہ صلی اللہ علیہ وسلم سے ملاقات نصیب ہو گی، لہٰذا رونے دھونے کی ضرورت نہیں ہے۔) ابوعبداللہ نے کہا: ہاں رسول اللہ صلی اللہ علیہ وسلم نے یہ فرمایا تھا لیکن رسول اللہ صلی اللہ علیہ وسلم کو یہ بھی فرماتے ہوئے سنا ہے کہ اللہ تعالیٰ نے اپنے داہنے ہاتھ کی مٹھی بھری اور دوسری مٹھی دوسرے ہاتھ کی بھری اور فرمایا اس داہنے ہاتھ والوں کو اس جنت کے لئے پیدا کیا ہے اور دوسرے ہاتھ والوں کو دوزخ کے لیے پیدا کیا ہے، اور مجھے اس کی پرواہ نہیں ہے، مجھے نہیں معلوم کہ ان دونوں مٹھیوں میں سے کس مٹھی میں ہوں (داہنے ہاتھ کی مٹھی میں یا دوسرے ہاتھ کی مٹھی میں ہوں) اس لیے اس خوف سے روتا ہوں۔ اس حدیث کو احمد نے روایت کیا ہے۔ . . .“ [مشكوة المصابيح/كِتَاب الْإِيمَانِ: 120]

تحقیق الحدیث:
اس حدیث کی سند صحیح ہے،
اور صحابی کا نام معلوم نہ ہونا ذرا بھی مضر نہیں ہے، کیونکہ تمام صحابہ کرام عدول (سچے) تھے۔ رضی اللہ عنہم اجمعین

فقہ الحدیث:
➊ اس حدیث سے بھی تقدیر کا برحق ہونا ثابت ہوتا ہے۔
➋ یہ حدیث اور سابقہ حدیث ایک دوسرے کی تائید کرتی ہیں۔
➌ چاہے کتنا ہی بڑا نیک انسان ہو، لیکن اپنے نیک اعمال پر کبھی فخر نہیں کرنا چائیے، بلکہ ہر وقت اللہ تعالیٰ سے ڈرتے رہنا چاہیئے۔
➍ اللہ کا ہاتھ اور مٹھی اس کی صفات ہیں جن پر ایمان لانا ضروری ہے اور ان صفات کی کیفیت نامعلوم ہے۔ اللہ تعالیٰ کی صفات کو بعض گمراہ لوگ مخلوق کے ساتھ تشبیہ دیتے ہیں اور بعض گمراہ تاویل وغیرہ کر کے ان صفات کا انکار کر دیتے ہیں، ان دونوں گروہوں کا یہ طرز عمل قرآن و حدیث اور سلف صالحین کے متفقہ فہم کے خلاف ہونے کی وجہ سے باطل و مردود ہے۔
◄ واضح رہے کہ اللہ تعالیٰ کے دونوں ہاتھ دائیں ہیں۔
➎ اصل کامیاب وہ لوگ ہیں جو مرنے کے بعد جنت میں اپنے محبوب اور امام سیدنا رسول اللہ صلی اللہ علیہ و سلم سے ملاقات کریں گے۔ «فداه ابي و امي و روحي»