´اللہ تعالیٰ کا زریت آدم کے ساتھ گفتگو فرمانا`
«. . . ‏‏‏‏وَعَنِ ابْنِ عَبَّاسٍ عَنِ النَّبِيِّ صَلَّى اللَّهُ عَلَيْهِ وَسَلَّمَ قَالَ: " أَخذ الله الْمِيثَاق من ظهر آدم بنعمان يَعْنِي عَرَفَة فَأخْرج من صلبه كل ذُرِّيَّة ذَرَاهَا فَنَثَرَهُمْ بَيْنَ يَدَيْهِ كَالذَّرِّ ثُمَّ كَلَّمَهُمْ قِبَلًا قَالَ: (أَلَسْتُ بِرَبِّكُمْ قَالُوا بَلَى شَهِدْنَا أَنْ تَقُولُوا يَوْمَ الْقِيَامَةِ إِنَّا كُنَّا عَنْ هَذَا غافلين أَوْ تَقُولُوا إِنَّمَا أَشْرَكَ آبَاؤُنَا مِنْ قَبْلُ وَكُنَّا ذُرِّيَّةً مِنْ بَعْدِهِمْ أَفَتُهْلِكُنَا بِمَا فَعَلَ المبطلون) ‏‏‏‏رَوَاهُ أَحْمد ‏‏‏‏ . . .»
”. . . سیدنا ابن عباس رضی اللہ عنہما سے روایت ہے انہوں نے کہا کہ رسول اللہ صلی اللہ علیہ وسلم نے فرمایا: ”مقام نعمان (جو میدان عرفات کے قریب ہے) اللہ تعالیٰ نے آدم کی اس اولاد سے جو ان کی پشت سے نکلی تھی عہد و اقرار لیا۔ آدم علیہ السلام کی پیٹھ سے ان کی ساری اولاد کو نکال کر ان کے سامنے چیونٹی کی طرح پھیلا دیا۔ پھر اللہ تعالیٰ نے ان لوگوں سے آمنے سامنے اس طرح گفتگو کی کہ کیا میں تمہارا رب نہیں ہوں؟ ان لوگوں نے کہا: ہاں، آپ ہمارے پروردگار ہیں۔ اللہ تعالیٰ نے فرمایا کہ ہم نے تم سے اس لیے گواہی لی ہے کہ تم قیامت کے دن یہ نہ کہو کہ ہم اس سے غافل تھے یا یوں کہو کہ ہمارے باپ دادا نے ہم سے پہلے شرک کیا ہم ان کی اولاد تھے ہم نے ان کی فرمانبرداری کی تو کیا ان باطل پرستوں کے برے عملوں سے ہم کو ہلاک کرے گا۔“ اس حدیث کو احمد نے روایت کیا ہے یعنی اس کا مطلب یہ ہے کہ اللہ تعالیٰ نے ان لوگوں سے اپنی ربوبیت کا اس لیے اقرار کرایا کہ قیامت کے دن یہ نہ کہیں کہ ہم ان چیزوں سے ناواقف تھے یا ہمارے باپ داداؤں نے شرک کیا ہم ان کے پیچھے اولادوں میں تھے تو ان باطل پرستوں کے برے کاموں کی وجہ سے ہم کو عذاب نہ دے۔ . . .“ [مشكوة المصابيح/كِتَاب الْإِيمَانِ: 121]

تحقیق الحدیث:
اس حدیث کی سند حسن لذاتہ ہے۔
کلثوم بن جبر صحیح مسلم کے راوی اور جمہور کے نزدیک موثق ہیں، لہٰذاحسن الحدیث ہیں، جریر بن حازم کو حافظ ابن حجر نے مدلسین کے طبقہ اولیٰ میں ذکر کیا ہے لیکن قولِ راجح میں وہ مدلس نہیں بلکہ تدلیس سے بری ہیں۔ دیکھئے میری کتاب الفتح المبین فی تحقیق طبقات المدلسین [ص21]
ان پر تدلیس کا الزام یحییٰ بن عبدالحمید الحمانی نے لگایا تھا اور یہ یحییٰ الحمانی بذات خود سخت ضعیف بلکہ ساقط العدالت راوی ہے، لہٰذا اس کی جرح مردود ہے۔
اس حدیث کو امام احمد کے علاوہ ابن ابی عاصم [السنة: 202] نسائی [السنن الكبري: 11191، وقال: وكلثوم هذا ليس بالقوي و حديثه ليس بالمحفوظ] حاکم [المستدرك 1؍27، 2؍544] اور بیہقی [الاسماء والصفات ص326، 327] وغیرہم نے بیان کررکھا ہے۔ حاکم اور ذہبی دونوں نے اسے صحیح کہا ہے۔ اس روایت پر امام نسائی کی جرح صحیح نہیں ہے اور قولِ راجح میں یہ حدیث موقوفاً اور مرفوعاً دونوں طرح سے صحیح و حسن ہے۔

فقہ الحدیث:
➊ یہ حدیث سورۃ الاعراف کی آیت (172-173) کی تفسیر ہے۔
➋ موقوف روایت تفسیر ابن جریر الطبری [75/9]
میں صحیح سند کے ساتھ مذکور ہے
➌ اسلام دین فطرت ہے۔