´اللہ تعالیٰ کا زریت آدم کے ساتھ گفتگو فرمانا`
«. . . عَن أبي بن كَعْب فِي قَوْلِ اللَّهِ عَزَّ وَجَلَّ (وَإِذْ أَخَذَ رَبُّكَ مِنْ بَنِي آدَمَ مِنْ ظُهُورهمْ ذرياتهم وأشهدهم على أنفسهم) ‏‏‏‏الْآيَة قَالَ جمعهم فجعلهم أرواحا ثُمَّ صَوَّرَهُمْ فَاسْتَنْطَقَهُمْ فَتَكَلَّمُوا ثُمَّ أَخَذَ - [44] - عَلَيْهِمُ الْعَهْدَ وَالْمِيثَاقَ وَأَشْهَدَهُمْ عَلَى أَنْفُسِهِمْ أَلَسْتُ بِرَبِّكُمْ قَالَ فَإِنِّي أشهد عَلَيْكُم السَّمَوَات السَّبْعَ وَالْأَرَضِينَ السَّبْعَ وَأُشْهِدُ عَلَيْكُمْ أَبَاكُمْ آدَمَ عَلَيْهِ السَّلَام أَنْ تَقُولُوا يَوْمَ الْقِيَامَةِ لَمْ نَعْلَمْ بِهَذَا اعْلَمُوا أَنَّهُ لَا إِلَهَ غَيْرِي وَلَا رَبَّ غَيْرِي فَلَا تُشْرِكُوا بِي شَيْئا وَإِنِّي سَأُرْسِلُ إِلَيْكُمْ رُسُلِي يُذَكِّرُونَكُمْ عَهْدِي وَمِيثَاقِي وَأُنْزِلُ عَلَيْكُمْ كُتُبِي قَالُوا شَهِدْنَا بِأَنَّكَ رَبُّنَا وَإِلَهُنَا لَا رب لَنَا غَيْرُكَ فَأَقَرُّوا بِذَلِكَ وَرُفِعَ عَلَيْهِمْ آدَمُ يَنْظُرُ إِلَيْهِمْ فَرَأَى الْغَنِيَّ وَالْفَقِيرَ وَحَسَنَ الصُّورَةِ وَدُونَ ذَلِكَ فَقَالَ رَبِّ لَوْلَا سَوَّيْتَ بَيْنَ عِبَادِكَ قَالَ إِنِّي أَحْبَبْتُ أَنْ أَشْكُرَ وَرَأَى الْأَنْبِيَاءَ فِيهِمْ مِثْلَ السُّرُجِ عَلَيْهِمُ النُّورُ خُصُّوا بِمِيثَاقٍ آخَرَ فِي الرِّسَالَةِ وَالنُّبُوَّةِ وَهُوَ قَوْلُهُ تَعَالَى (وَإِذ أَخذنَا من النَّبِيين ميثاقهم) ‏‏‏‏إِلَى قَوْله (عِيسَى ابْن مَرْيَم) ‏‏‏‏كَانَ فِي تِلْكَ الْأَرْوَاحِ فَأَرْسَلَهُ إِلَى مَرْيَمَ فَحُدِّثَ عَنْ أُبَيٍّ أَنَّهُ دَخَلَ مِنْ فِيهَا. رَوَاهُ أَحْمد ‏‏‏‏ . . .»
”. . . سیدنا ابی بن کعب رضی اللہ عنہ سے اس آیت کریمہ «وَإِذْ أَخَذَ رَبُّكَ مِن بَنِي آدَمَ مِن ظُهُورِهِمْ ذُرِّيَّتَهُمْ» [۷-الأعراف:۱۷۲] الایۃ کی تفسیر میں منقول ہے کہ اللہ تعالیٰ نے آدم علیہ السلام کی اولاد کو اکٹھا جمع کیا پھر ان کو قسم قسم کے بنایا یعنی کسی کو غنی، کسی کو فقیر پھر ہر ایک کو صورت بخشی اور گویائی عطا فرمائی پھر انہوں نے باتیں کیں، پھر اللہ تعالیٰ نے ان سے عہد و اقرار لیا۔ اور ان کو انہیں کے نفسوں پر گواہ بنایا «أَلَسْتُ بِرَبِّكُمْ» کیا میں تمہارا پروردگار نہیں ہوں؟ ان لوگوں نے کہا: بےشک آپ ہمارے پروردگار ہیں۔ اللہ تعالیٰ نے فرمایا کہ میں ساتوں آسمانوں کو اور ساتوں زمینوں کو تم پر گواہ بناتا ہوں اور تمہارے باپ آدم کو بھی شاہد بناتا ہوں اس لیے کہ کہیں تم قیامت کے روز یہ نہ کہنے لگو کہ ہم نہیں جانتے تھے۔ اب جان لو کہ تحقیق میرے سوا کوئی معبود نہیں اور نہ میرے سوا کوئی رب ہے اور نہ تم میرے ساتھ کسی کو شریک بنانا۔ میں آئندہ تمہاری طرف رسولوں کو بھیجوں گا، جو میرے اس عہد و اقرار کو یاد دلائیں گے اور میں اپنی کتابیں بھی تم پر اتاروں گا (یہ سن کر سب لوگوں نے کہا) ہم گواہی دیتے ہیں کہ تو ہی ہمارا پروردگار ہے اور تو ہی ہمارا معبود ہے تیرے سوا کوئی ہمارا رب نہیں ہے اور نہ تیرے سوا کوئی ہمارا معبود ہے، آدم علیہ السلام کی ساری اولاد نے اس کا قول و اقرار کیا، اور آدم علیہ السلام کو اونچے مقام پر کھڑا کر کے ان کے ساتھ پیش کیا گیا تاکہ وہ اپنی اولاد کو دیکھیں چنانچہ آدم علیہ السلام نے دیکھا تو اپنی اولاد میں سے کسی کو مالدار اور کسی کو محتاج اور کسی کو خوبصورت اور کسی کو بدصورت دیکھا یہ دیکھ کر آدم علیہ السلام نے عرض کیا کہ اے میرے پروردگار! تو نے اپنے سب بندوں کو برابر کیوں نہ پیدا کیا یعنی سب کو امیر، غنی، خوبصورت بناتا، اللہ تعالیٰ نے فرمایا کہ میں چاہتا ہوں کہ میں شکر کیا جاؤں یعنی مخطلف قسم کے لوگوں کو اس لیے پیدا کیا تاکہ لوگ ایک دوسرے کی حالت کو دیکھ کر میرے شکر گزار ہوں، اور اگر سب کو برابر پیدا کر دیتا تو کوئی شکر گزار نہ ہوتا، پھر آدم علیہ السلام نے نبیوں کو انہیں لوگوں میں دیکھا جو چراغوں کی طرح تھے ان پر روشنی تھی اور نور ان پر جلوہ گر تھا ان سے خصوصیت کے ساتھ رسالت و نبوت کا عہد و اقرار لیا گیا تھا، جیسا کہ اللہ تعالیٰ فرماتا ہے: «وَإِذْ أَخَذْنَا مِنَ النَّبِيِّينَ مِيثَاقَهُمْ وَمِنكَ وَمِن نُّوحٍ وَإِبْرَاهِيمَ وَمُوسَىٰ وَعِيسَى ابْنِ مَرْيَمَ وَأَخَذْنَا مِنْهُم مِّيثَاقًا غَلِيظًا» [۳۳-الأحزاب:۶] انبیاء کے اس گروہ میں عیسٰی علیہ الصلوٰۃ و السلام بھی تھے اللہ تعالیٰ نے ان کی روح کو مریم علیہا السلام کے پاس بھیجا، ابی ابن کعب رضی اللہ عنہ سے بیان کیا گیا ہے کہ یہ روح مریم علیہ السلام کے منہ کی طرف سے ان کے بدن میں ڈالی گئی تھی۔ اس حدیث کو احمد نے روایت کیا ہے۔ . . .“ [مشكوة المصابيح/كِتَاب الْإِيمَانِ: 122]

تحقیق الحدیث:
اس روایت کی سند ضعیف ہے۔
◄ اس کے راوی سلیمان بن طرخان التیمی ثقہ امام ہونے کے ساتھ مدلس بھی تھے۔
◈ امام یحییٰ بن معین نے فرمایا:
”سلیمان التیمی تدلیس کرتے تھے۔“ [تاريخ ابن معين، رواية الدوري: 3600]
◈ حافظ ابن حجر العسقلانی رحمہ اللہ نے انہیں مدلسین کے طبقہ ثانیہ میں ذکر کیا ہے، لیکن راجح یہی ہے کہ وہ طبقہ ثالثہ کے مدلس ہیں۔ دیکھیے: الفتح المبین [ص42]
◈ المستدرک للحاکم [323/2۔ 324] وغیرہ میں اس کی دوسری سند بھی ہے، لیکن وہ سند بھی ضعیف ہے۔ اس کے راویوں میں سے ابوجعفر الرازی اور ربیع بن انس دونوں جمہور کے نزدیک موثق ہیں، لہٰذا دونوں حسن الحدیث ہیں، لیکن ابوجعفر الرازی جب ربیع بن انس سے روایت کریں تو وہ روایت ضعیف ہوتی ہے۔ دیکھئے: کتاب الثقات لابن حبان [228/4]
◈ ربیع بن انس اور مغیری بن مقسم الضبی کے علاوہ دوسرے ثقہ و صدوق راویوں سے ابوجعفر الرازی کی روایت حسن ہوتی ہے اور اسی طرح ابوجعفر کے علاوہ اگر کوئی دوسرا ثقہ و صدوق راوی ربیع بن انس سے روایت بیان کرے تو وہ حسن لذاتہ ہوتی ہے۔ «والحمد للّٰه»