حضرت محمد بن ابومجالد سے روایت ہے، انہوں نے کہا کہ مجھے حضرت ابو بردہ اور عبداللہ بن شداد رضی اللہ عنہما نے حضرت عبدالرحمان بن ابزی اور حضرت عبداللہ بن ابی اوفیٰ رضی اللہ عنہما کے پاس بھیجا، چنانچہ میں نے ان سے بیع سلم کے متعلق دریافت کیا تو انہوں نے فرمایا: ہمیں رسول اللہ صلی اللہ علیہ وسلم کے ہمراہ غنیمت کا مال ملتا تھا اور ہمارے پاس ملک شام کے کاشتکاروں میں سے کچھ لوگ آتے تو ہم ان سے گندم، جو اور منقیٰ کے متعلق معین مدت کی ادائیگی تک بیع سلم کرتے تھے۔ میں نے کہا: ان کی کھیتی ہوتی تھی یا نہیں؟ انہوں نے کہا: اس کے متعلق ہم ان سے دریافت نہیں کیا کرتے تھے۔ [صحيح البخاري/كتاب السلم/حدیث: 2255]

حضرت عبداللہ بن ابومجاہد رحمہ اللہ سے روایت ہے، انہوں نے کہا کہ عبداللہ بن شداد اور حضرت ابوہریرہ رضی اللہ عنہ نے بیع سلم کے متعلق اختلاف کیا تو لوگوں نے مجھے حضرت ابن ابی اوفیٰ رضی اللہ عنہما کے پاس بھیجا۔ میں نے ان سے اس کے متعلق دریافت کیا تو انہوں نے فرمایا: ہم رسول اللہ صلی اللہ علیہ وسلم ، حضرت ابوبکر رضی اللہ عنہ اور حضرت عمر رضی اللہ عنہ کے زمانے میں گندم، جو، منقیٰ اور کھجور میں بیع سلم کرتے تھے۔ پھر میں نے ابن ابزی رضی اللہ عنہما سے اس کے متعلق پوچھا تو انہوں نے بھی یہی جواب دیا۔ [صحيح البخاري/كتاب السلم/حدیث: 2242]

حضرت عبداللہ بن ابو مجاہد سے روایت ہے، انہوں نے کہا کہ عبداللہ بن شداد اور حضرت ابوہریرہ رضی اللہ عنہ نے بیع سلم کے متعلق اختلاف کیا تو لوگوں نے مجھے حضرت عبداللہ بن ابی اوفیٰ رضی اللہ عنہما کے پاس بھیجا۔ میں نے ان سے اس کے متعلق دریافت کیا تو انہوں نے فرمایا کہ ہم رسول اللہ صلی اللہ علیہ وسلم ، حضرت ابوبکر رضی اللہ عنہ اور حضرت عمر رضی اللہ عنہ کے زمانے میں گندم، جو، منقیٰ اور کھجور میں بیع سلم کرتے تھے۔ پھر میں نے حضرت عبداللہ بن ابزی رضی اللہ عنہما سے اس کے متعلق پوچھا تو انہوں نے بھی یہی جواب دیا۔ [صحيح البخاري/كتاب السلم/حدیث: 2243]