حضرت سلمہ بن اکوع رضی اللہ عنہ سے روایت ہے، انہوں نے کہا کہ ایک دفعہ لوگوں کا سامانِ خورد و نوش ختم ہو گیا اور وہ محتاج ہو گئے تو نبی صلی اللہ علیہ وسلم کی خدمت میں حاضر ہوئے اور اپنے اونٹ ذبح کرنے کی اجازت طلب کی۔ آپ صلی اللہ علیہ وسلم نے انہیں اجازت مرحمت فرمائی۔ پھر ان لوگوں سے حضرت عمر رضی اللہ عنہ ملے تو انہوں نے ان سے ماجرا بیان کیا۔ حضرت عمر رضی اللہ عنہ نے فرمایا: اونٹوں کے بعد تمہاری زندگی کا انحصار کس پر ہوگا؟ اس کے بعد حضرت عمر رضی اللہ عنہ نبی صلی اللہ علیہ وسلم کی خدمت میں حاضر ہوئے اور کہا: اللہ کے رسول صلی اللہ علیہ وسلم ! اونٹ ذبح کرنے کے بعد ان کی زندگی کیسے گزرے گی؟ آپ صلی اللہ علیہ وسلم نے فرمایا: ”لوگوں میں اعلان کرو کہ وہ اپنا اپنا کھانے پینے کا بقیہ سامان لے کر میرے پاس حاضر ہوں۔“ پھر چمڑے کا ایک دسترخوان بچھا دیا گیا اور تمام سامان اس پر ڈال دیا گیا، اس کے بعد رسول اللہ صلی اللہ علیہ وسلم کھڑے ہوئے اور خیر و برکت کی دعا فرمائی۔ پھر آپ صلی اللہ علیہ وسلم نے تمام لوگوں کو برتنوں سمیت بلایا۔ چنانچہ لوگوں نے دونوں ہاتھوں سے خوب بھر بھر کر لینا شروع کیا۔ جب سب لوگ فارغ ہو گئے تو رسول اللہ صلی اللہ علیہ وسلم نے فرمایا: ”میں گواہی دیتا ہوں کہ اللہ تعالیٰ کے سوا کوئی معبودِ حقیقی نہیں، نیز گواہی دیتا ہوں کہ میں اللہ تعالیٰ کا رسول ہوں۔“ [صحيح البخاري/كتاب الشركة/حدیث: 2484]

حضرت سلمہ رضی اللہ عنہ سے روایت ہے، انہوں نے بیان کیا کہ ایک مرتبہ دورانِ سفر میں صحابہ کرام رضی اللہ عنہم کا سفری کھانا کم ہو گیا جس سے وہ قلاش ہو گئے۔ انہوں نے نبی صلی اللہ علیہ وسلم کی خدمت میں حاضر ہو کر اونٹ ذبح کرنے کی اجازت طلب کی، آپ صلی اللہ علیہ وسلم نے انہیں اجازت دے دی۔ اتنے میں حضرت عمر رضی اللہ عنہ سے ان کی ملاقات ہو گئی تو انہوں نے اس اجازت کی اطلاع انہیں دی۔ انہوں نے فرمایا: ان اونٹوں کے بعد پھر تمہارے پاس کیا باقی رہ جائے گا؟ اس کے بعد حضرت عمر رضی اللہ عنہ نبی صلی اللہ علیہ وسلم کی خدمت میں حاضر ہوئے اور عرض کیا: اے اللہ کے رسول صلی اللہ علیہ وسلم ! لوگ اگر اپنے اونٹ ذبح کر دیں تو پھر ان کے پاس باقی کیا رہ جائے گا؟ رسول اللہ صلی اللہ علیہ وسلم نے فرمایا: ”لوگوں میں اعلان کر دو کہ وہ اپنا بچا ہوا زادِ سفر میرے پاس لائیں۔“ چنانچہ آپ صلی اللہ علیہ وسلم نے اس پر برکت کی دعا فرمائی۔ پھر آپ صلی اللہ علیہ وسلم نے سب لوگوں کو ان کے برتنوں سمیت بلایا۔ سب نے بھر بھر کر کھانا لیا۔ جب فارغ ہو گئے تو رسول اللہ صلی اللہ علیہ وسلم نے فرمایا: ”میں گواہی دیتا ہوں کہ اللہ کے سوا کوئی معبودِ برحق نہیں اور میں اللہ کا رسول ہوں۔“ [صحيح البخاري/كتاب الشركة/حدیث: 2982]