حضرت ابوالاسود رحمہ اللہ سے روایت ہے، انہوں نے کہا: میں ایک دفعہ مدینہ طیبہ آیا تو وہاں ایک وبائی مرض پھیلا ہوا تھا جس میں لوگ بڑی تیزی سے فوت ہو رہے تھے۔ میں حضرت عمر رضی اللہ عنہ کے پاس بیٹھا ہوا تھا کہ اتنے میں ایک جنازہ گزرا، اس کی تعریف کی گئی تو حضرت عمر رضی اللہ عنہ نے کہا: «وَجَبَتْ» ”واجب ہو گئی۔“ پھر دوسرا جنازہ گزرا، اس کی بھی تعریف کی گئی تو اس کے متعلق بھی حضرت عمر رضی اللہ عنہ نے فرمایا: «وَجَبَتْ» ”واجب ہو گئی۔“ پھر تیسرا جنازہ نکلا اور اس کی برائی بیان کی گئی تو حضرت عمر رضی اللہ عنہ نے فرمایا: «وَجَبَتْ» ”واجب ہو گئی۔“ میں نے عرض کیا: امیر المومنین! کیا چیز واجب ہو گئی؟ انہوں نے فرمایا: میں نے وہی کہا جو نبی صلی اللہ علیہ وسلم نے فرمایا تھا: ”جس مسلمان کے لیے چار آدمی اس کی نیک سیرتی کی گواہی دیں اللہ تعالیٰ اسے جنت میں داخل فرمائے گا۔“ ہم نے عرض کیا: اگر تین آدمی گواہی دیں تو؟ فرمایا: ”تین بھی۔“ ہم نے عرض کیا: اگر صرف دو آدمی گواہی دیں تو؟ آپ نے فرمایا: ”دو دیں تب بھی۔“ پھر ہم نے یہ نہ پوچھا کہ اگر ایک شخص گواہی دے تو کیا ہو گا؟ [صحيح البخاري/كتاب الشهادات/حدیث: 2643]

حضرت ابوالاسود رحمہ اللہ سے روایت ہے، انہوں نے فرمایا: میں ایک دفعہ مدینہ طیبہ آیا جب کہ وہاں وبا پھیلی ہوئی تھی۔ میں حضرت عمر رضی اللہ عنہ کے پاس بیٹھ گیا۔ ان کے پاس سے ایک جنازہ گزرا تو اس کی میت کی اچھی تعریف کی گئی۔ اس پر حضرت عمر رضی اللہ عنہ نے فرمایا: «وَجَبَتْ» ”واجب ہوگئی۔“ پھر دوسرا جنازہ گزرا تو اس کی بھی تعریف کی گئی، تو حضرت عمر رضی اللہ عنہ نے فرمایا: «وَجَبَتْ» ”واجب ہوگئی۔“ پھر تیسرا جنازہ گزرا تو اس کی برائی بیان کی گئی، اس پر آپ نے فرمایا: «وَجَبَتْ» ”واجب ہوگئی۔“ ابوالاسود رحمہ اللہ کہتے ہیں: میں نے کہا: امیر المؤمنین! کیا واجب ہوگئی؟ انہوں نے فرمایا: میں نے وہی کہا ہے جو نبی کریم صلی اللہ علیہ وسلم نے فرمایا: ”جس مسلمان کے لیے چار آدمی اچھی گواہی دیں تو اللہ تعالیٰ اسے جنت میں داخل کرے گا۔“ ہم نے عرض کیا: اگر تین آدمی گواہی دیں تو؟ آپ صلی اللہ علیہ وسلم نے فرمایا: ”تین بھی۔“ پھر ہم نے عرض کیا: دو آدمی بھی؟ آپ صلی اللہ علیہ وسلم نے فرمایا: ”دو آدمی بھی۔“ پھر ہم نے ایک شخص کی گواہی کے متعلق سوال نہیں کیا۔ [صحيح البخاري/كتاب الشهادات/حدیث: 1368]