حضرت ام خالد بنت خالد رضی اللہ عنہا سے روایت ہے، انہوں نے کہا کہ جب میں سرزمینِ حبشہ سے واپس آئی تو اس وقت میں چھوٹی بچی تھی۔ رسول اللہ صلی اللہ علیہ وسلم نے مجھے اوڑھنے کے لیے ایک چادر عنایت فرمائی جس میں نقوش تھے۔ رسول اللہ صلی اللہ علیہ وسلم اپنا دست مبارک ان نقوش پر پھیرتے ہوئے فرما رہے تھے: ”یہ چادر اچھی ہے، یہ چادر خوبصورت ہے۔“ امام حمیدی رحمہ اللہ نے کہا ہے کہ «سَنَاهْ» کے معنی ”اچھا اور خوبصورت“ کے ہیں۔ [صحيح البخاري/كتاب مناقب الأنصار/حدیث: 3874]

حضرت اُم خالد بنت خالد بن سعید رضی اللہ عنہا سے روایت ہے، انہوں نے کہا: میں اپنے والد گرامی کے ہمراہ رسول اللہ صلی اللہ علیہ وسلم کی خدمت میں حاضر ہوئی، اس وقت میں نے زرد رنگ کی قمیص پہن رکھی تھی تو رسول اللہ صلی اللہ علیہ وسلم نے فرمایا: «سَنَهْ سَنَهْ» ”اچھا، اچھا۔“ حبشی زبان میں اس کے معنیٰ ہیں۔ حضرت اُم خالد رضی اللہ عنہا کہتی ہیں، پھر میں مہر نبوت سے کھیلنے لگی تو میرے والد نے مجھے ڈانٹ پلائی، اس پر رسول اللہ صلی اللہ علیہ وسلم نے فرمایا: ”اس کو چھوڑ دو۔“ پھر فرمایا: ”کرتا پرانا کرو اور اسے پہن کر پھاڑو، پھر کرتا پرانا کرو اور پھاڑو، پھر پرانا کرو اور پھاڑو۔“ (آپ صلی اللہ علیہ وسلم نے درازیِ عمر کی دعا فرمائی۔) حضرت عبداللہ بن مبارک رحمہ اللہ بیان کرتے ہیں کہ وہ قمیص اتنی دیر تک باقی رہی کہ زبانوں پر اس کا چرچا ہونے لگا۔ [صحيح البخاري/كتاب مناقب الأنصار/حدیث: 3071]

حضرت ام خالد بنت خالد رضی اللہ عنہا سے روایت ہے کہ نبی صلی اللہ علیہ وسلم کے پاس کچھ کپڑے لائے گئے، ان میں ایک چھوٹی سی دھاری دار اونی چادر بھی تھی۔ آپ صلی اللہ علیہ وسلم نے فرمایا: ”تمہارا کیا خیال ہے کہ ہم یہ چادر کس کو پہنائیں؟“ صحابہ کرام رضی اللہ عنہم خاموش رہے۔ رسول اللہ صلی اللہ علیہ وسلم نے فرمایا: ”ام خالد رضی اللہ عنہا کو میرے پاس لاؤ۔“ چنانچہ انہیں اٹھا کر لایا گیا تو رسول اللہ صلی اللہ علیہ وسلم نے وہ چادر اپنے ہاتھ میں لی اور انہیں پہنا کر یہ دعا دی: «أَبْلِي وَأَخْلِقِي» ”اللہ کرے تم اسے خوب پہنو اور پرانا کرو۔“ اس چادر میں سبز یا زرد نقش ونگار تھے، آپ صلی اللہ علیہ وسلم نے فرمایا: ”اے ام خالد! یہ نقش ونگار «سَنَهْ» ہیں۔“ حبشی زبان میں لفظ «سَنَهْ» خوبصورت کے معنیٰ میں استعمال ہوتا ہے۔ [صحيح البخاري/كتاب مناقب الأنصار/حدیث: 5823]

حضرت ام خالد بنت خالد رضی اللہ عنہا سے روایت ہے، انہوں نے کہا کہ رسول اللہ صلی اللہ علیہ وسلم کے پاس کچھ کپڑے لائے گئے جن میں ایک سیاہ شال بھی تھی۔ آپ صلی اللہ علیہ وسلم نے فرمایا: ”تمہارے خیال کے مطابق یہ شال کسے دی جائے؟“ صحابہ کرام خاموش رہے تو آپ نے فرمایا: ”ام خالد کو میرے پاس لاؤ۔“ چنانچہ مجھے نبی صلی اللہ علیہ وسلم کی خدمت میں پیش کیا گیا، پھر آپ نے مجھے وہ شال اپنے ہاتھ سے پہنائی اور دعا فرمائی: «أَبْلِي وَأَخْلِقِي» ”اسے پرانا اور بوحضرت کرو۔“ یعنی دیر تک جیتی رہو۔ آپ نے دو مرتبہ دعا فرمائی۔ پھر آپ اس شال کے نقش و نگار دیکھنے لگے اور اپنے ہاتھ سے میری طرف اشارہ کر کے فرمایا: ”اے ام خالد! «سَنَاهْ» “ «سَنَاهْ» یہ حبشی زبان کا لفظ ہے جس کے معنیٰ ”کیا ہی خوبصورت“ کے ہیں (راویِ حدیث) اسحاق نے کہا: میرے اہل خانہ میں سے ایک عورت نے مجھ سے بیان کیا کہ اس نے ام خالد رضی اللہ عنہا پر وہ شال دیکھی تھی۔ [صحيح البخاري/كتاب مناقب الأنصار/حدیث: 5845]

حضرت ام خالد بنت سعید رضی اللہ عنہا سے روایت ہے، انہوں نے کہا: ”میں اپنے والد کے ہمراہ رسول اللہ صلی اللہ علیہ وسلم کی خدمت میں حاضر ہوئی جبکہ میں نے زرد رنگ کی قمیض پہن رکھی تھی۔ رسول اللہ صلی اللہ علیہ وسلم نے «سَنَهْ سَنَهْ» کے الفاظ کہے، (راوئ حدیث) عبداللہ نے کہا کہ یہ حبشی زبان میں ”خوب“ کے معنی میں ہے۔ ام خالد بیان کرتی ہیں کہ میں مہر نبوت سے کھیلنے لگی تو میرے والد گرامی نے مجھے ڈانٹ پلائی لیکن رسول اللہ صلی اللہ علیہ وسلم نے فرمایا: ”اسے کھیلنے دو۔“ پھر رسول اللہ صلی اللہ علیہ وسلم نے فرمایا: ”تو ایک زمانے تک زندہ رہے، اللہ تعالیٰ تیری عمر لمبی کرے، تمہاری زندگی دراز ہو۔“ عبداللہ بن مبارک نے کہا کہ انہوں نے بہت طویل عمر پائی حتیٰ کہ لوگوں میں ان کا چرچا ہونے لگا۔“ [صحيح البخاري/كتاب مناقب الأنصار/حدیث: 5993]