حضرت ثابت بنانی رحمہ اللہ سے روایت ہے، انہوں نے کہا کہ میں حضرت انس بن مالک رضی اللہ عنہ کے پاس موجود تھا، ان کے پاس ان کی صاحبزادی بھی تھی، حضرت انس رضی اللہ عنہ نے فرمایا: ”رسول اللہ صلی اللہ علیہ وسلم کے پاس ایک عورت آئی اور اس نے آپ صلی اللہ علیہ وسلم کو اپنے نفس کی پیش کش کی اور کہا: ”اللہ کے رسول! کیا آپ کو میری ضرورت ہے؟““ حضرت انس رضی اللہ عنہ کی صاحبزادی نے کہا: ”وہ عورت بہت کم حیا والی تھی، وائے رسوائی! ہائے بے شرمی!“ حضرت انس رضی اللہ عنہ نے فرمایا: ”یہ عورت تجھ سے بہتر تھی کہ اس نے نبی صلی اللہ علیہ وسلم کے متعلق اپنی رغبت کا اظہار کیا اور آپ کو اپنی ذات کے متعلق پیش کش کی۔“ [صحيح البخاري/كتاب النكاح/حدیث: 5120]

حضرت انس رضی اللہ عنہ سے روایت ہے، انہوں نے کہا کہ ایک خاتون نبی صلی اللہ علیہ وسلم کی خدمت میں حاضر ہوئی اور خود کو آپ صلی اللہ علیہ وسلم سے نکاح کے لیے پیش کرتے ہوئے کہا: ”کیا آپ کو میری ضرورت ہے؟“ اس پر حضرت انس رضی اللہ عنہ کی بیٹی نے کہا: ”وہ عورت کس قدر بے حیا تھی!“ حضرت انس رضی اللہ عنہ نے فرمایا: ”وہ خاتون تم سے بہت اچھی تھی۔ اس نے خود کو رسول اللہ صلی اللہ علیہ وسلم سے نکاح کے لیے پیش کیا تھا۔“ [صحيح البخاري/كتاب النكاح/حدیث: 6123]