ام المؤمنین حضرت ام سلمہ رضی اللہ عنہا سے روایت ہے کہ قبیلہ اسلم کی ایک عورت جسے سبیعہ کہا جاتا تھا، ان کا شوہر فوت ہو گیا جبکہ وہ حمل سے تھیں۔ انہیں حضرت ابو السنابل رضی اللہ عنہ نے پیغامِ نکاح بھیجا تو انہوں نے نکاح سے انکار کر دیا، اور انہوں نے کہا: ”اللہ کی قسم! وہ نکاح کے قابل نہیں ہوگی جب تک دو عدتوں میں سے لمبی عدت پوری نہ کر لے“، چنانچہ وہ چند راتیں ٹھہریں کہ وضعِ حمل ہو گیا۔ پھر وہ نبی صلی اللہ علیہ وسلم کی خدمت میں حاضر ہوئیں تو آپ صلی اللہ علیہ وسلم نے فرمایا: ”تم نکاح کر سکتی ہو۔“ [صحيح البخاري/كتاب الطلاق/حدیث: 5318]

حضرت ابوسلمہ بن عبدالرحمٰن رحمہ اللہ سے روایت ہے، انہوں نے کہا: ایک شخص حضرت عبداللہ بن عباس رضی اللہ عنہما کے پاس آیا جبکہ اس وقت حضرت ابوہریرہ رضی اللہ عنہ بھی ان کے پاس بیٹھے ہوئے تھے۔ آنے والے نے مسئلہ پوچھا: ”آپ مجھے اس عورت کے متعلق بتائیے جس نے اپنے شوہر کی وفات کے چالیس راتیں بعد بچہ جنم دیا ہو؟“ حضرت ابن عباس رضی اللہ عنہما نے فرمایا: ”اس کی عدت دونوں عدتوں میں دور تر، یعنی طویل تر عدت ہے۔“ میں نے کہا: ﴿وَأُولَاتُ الْأَحْمَالِ أَجَلُهُنَّ أَنْ يَضَعْنَ حَمْلَهُنَّ﴾ [سورة الطلاق: 4] ”حمل والی عورتوں کی عدت ان کے وضع حمل تک ہے۔“ حضرت ابوہریرہ رضی اللہ عنہ نے فرمایا: ”میں اپنے بھتیجے (ابوسلمہ) کے ساتھ ہوں۔“ آخر حضرت ابن عباس رضی اللہ عنہما نے اپنے غلام کریب رحمہ اللہ کو ام المومنین حضرت ام سلمہ رضی اللہ عنہا کی خدمت میں یہ مسئلہ دریافت کرنے کے لیے بھیجا، ام المومنین رضی اللہ عنہا نے بتایا کہ حضرت سبیعہ اسلمیہ رضی اللہ عنہا کے شوہر شہید کر دیے گئے تھے جبکہ وہ اس وقت حاملہ تھیں۔ شوہر کی وفات کے چالیس راتوں بعد انہوں نے بچہ جنم دیا، پھر ان کے پاس نکاح کا پیغام بھیجا گیا تو رسول اللہ صلی اللہ علیہ وسلم نے ان کا نکاح کر دیا۔ حضرت ابوسنابل رضی اللہ عنہ بھی انہیں پیغامِ نکاح بھیجنے والوں میں سے تھے۔ [صحيح البخاري/كتاب الطلاق/حدیث: 4909]

حضرت محمد بن سیرین رحمہ اللہ سے روایت ہے، انہوں نے کہا: ”میں ایک ایسی مجلس میں حاضر تھا جہاں حضرت عبدالرحمٰن بن ابی لیلیٰ رحمہ اللہ بھی تھے۔ ان کے شاگرد ان کی بہت عزت کرتے تھے۔ انہوں نے حاملہ کی عدت وفات «أَبْعَدُ الْأَجَلَيْنِ» (طویل تر) بیان کی تو میں نے وہاں سبیعہ بنت حارث رضی اللہ عنہا کی حدیث عبداللہ بن عتبہ رحمہ اللہ کے حوالے سے بیان کر دی۔ ان کے شاگردوں میں سے کسی نے مجھے خاموش رہنے کا اشارہ کیا۔ میں بات سمجھ گیا اور کہا: ”عبداللہ بن عتبہ رحمہ اللہ ابھی کوفہ میں بقید حیات ہیں، اگر میں ان کی طرف کوئی جھوٹی بات منسوب کرتا ہوں تو بڑی جرأت کی بات ہو گی۔“ اس پر مجھے تنبیہ کرنے والے صاحب شرمندہ ہو گئے۔ عبدالرحمٰن بن ابی لیلیٰ رحمہ اللہ کہنے لگے: ”لیکن ان کے چچا (عبداللہ بن مسعود رضی اللہ عنہ) نے تو یہ بات نہیں کہی۔“ پھر میں ابو عطیہ مالک بن عامر رحمہ اللہ سے ملا اور ان سے میں نے یہی مسئلہ پوچھا تو وہ بھی سبیعہ اسلمیہ رضی اللہ عنہا والی حدیث بیان کرنے لگے۔ میں نے ان سے کہا: ”آپ نے حضرت عبداللہ بن مسعود رضی اللہ عنہ سے اس سلسلے میں کچھ سنا ہے؟“ انہوں نے کہا: ”ہم حضرت عبداللہ بن مسعود رضی اللہ عنہ کی خدمت میں حاضر تھے تو انہوں نے فرمایا: ”تم اس پر سختی کرنا چاہتے ہو اور اسے رخصت و سہولت دینے کے لیے تیار نہیں ہو؟ حالانکہ چھوٹی سورہ نساء (سورہ طلاق) بڑی سورہ نساء (سورہ بقرہ) کے بعد نازل ہوئی ہے۔ (اس میں ہے کہ) ﴿وَأُولَاتُ الْأَحْمَالِ أَجَلُهُنَّ أَن يَضَعْنَ حَمْلَهُنَّ﴾ [سورة الطلاق: 4] ”اور حمل والی خواتین کی عدت ان کے حمل کا پیدا ہو جانا ہے۔“““ [صحيح البخاري/كتاب الطلاق/حدیث: 4910]

حضرت عبداللہ بن عتبہ رضی اللہ عنہ سے روایت ہے، انہوں نے ابو بن ارقم کو خط لکھا کہ سبیعہ اسلمیہ رضی اللہ عنہا سے دریافت کریں کہ رسول اللہ صلی اللہ علیہ وسلم نے انہیں کیا فتویٰ دیا تھا؟ انہوں نے بتایا کہ: ”جب میں نے بچہ دے لیا تو رسول اللہ صلی اللہ علیہ وسلم نے مجھے نکاح کر لینے کا فتوی دیا۔“ [صحيح البخاري/كتاب الطلاق/حدیث: 5319]

حضرت مسور بن مخرمہ رضی اللہ عنہ سے روایت ہے کہ ”سبیعہ اسلمیہ رضی اللہ عنہا نے اپنے شوہر کی وفات کے چند روز بعد بچہ جنم دیا۔ پھر وہ نبی صلی اللہ علیہ وسلم کی خدمت میں حاضر ہوئی اور نکاح کی اجازت طلب کی تو آپ صلی اللہ علیہ وسلم نے اسے نکاح کی اجازت دے دی، پھر انہوں نے نکاح کر لیا۔“ [صحيح البخاري/كتاب الطلاق/حدیث: 5320]