ام المؤمنین سیدہ صفیہ رضی اللہ عنہا کا بیان ہے کہ رسول اللہ صلی اللہ علیہ وسلم اعتکاف میں تھے اور میں رات کے وقت آپ صلی اللہ علیہ وسلم کی زیارت کے لیے حاضر ہوئی۔ میں آپ صلی اللہ علیہ وسلم سے باتیں کرتی رہی، پھر میں واپس آنے کے لیے اٹھی تو آپ صلی اللہ علیہ وسلم بھی مجھے واپس چھوڑنے کے لیے کھڑے ہو گئے جبکہ میری رہائش سیدنا اسامہ بن زید رضی اللہ عنہ کے احاطے میں تھی۔ تو (ہمارے پاس سے) دو انصاری گزرے، جب انہوں نے نبی کریم صلی اللہ علیہ وسلم کو دیکھا تو جلدی جلدی چلنے لگے، نبی کریم صلی اللہ علیہ وسلم نے انہیں فرمایا: ”رک جاؤ! یہ میرے ساتھ (میری اہلیہ) صفیہ بنت حیی ہے۔“ ان دونوں نے کہا: «سُبْحَانَ اللّٰهِ» ”اللہ پاک ہے“، اے اللہ کے رسول! (آپ کو کسی قسم کی وضاحت کرنے کی ضرورت ہی نہیں) آپ نے فرمایا: ”بلاشبہ شیطان انسان کے جسم میں ایسے چلتا ہے جیسے خون، مجھے اندیشہ ہوا کہ کہیں وہ تمہارے دلوں میں کچھ ڈال نہ دے۔“ یا فرمایا: ”برائی نہ ڈال دے۔“ [سنن ابي داود/كتاب الصيام /حدیث: 2470]

سیدنا انس بن مالک رضی اللہ عنہ کا بیان ہے کہ رسول اللہ صلی اللہ علیہ وسلم نے فرمایا: ”بلاشبہ شیطان ابن آدم کے جسم میں اس طرح گردش کرتا ہے جیسے خون۔“ [سنن ابي داود/كتاب الصيام /حدیث: 4719]

ام المؤمنین سیدہ صفیہ رضی اللہ عنہا نے بیان کیا کہ رسول اللہ صلی اللہ علیہ وسلم اعتکاف میں تھے اور میں رات کے وقت آپ صلی اللہ علیہ وسلم کی زیارت کے لیے حاضر ہوئی، میں آپ صلی اللہ علیہ وسلم سے باتیں کرتی رہی، پھر اٹھ کر واپس جانے لگی تو آپ صلی اللہ علیہ وسلم بھی میرے ساتھ اٹھے تاکہ مجھے واپس پہنچا آئیں اور میری رہائش سیدنا اسامہ بن زید رضی اللہ عنہ کے احاطہ میں تھی۔ تو انصاریوں کے دو آدمی گزرے، انہوں نے جب رسول اللہ صلی اللہ علیہ وسلم کو دیکھا تو ذرا تیزی سے چلنے لگے۔ تو نبی کریم صلی اللہ علیہ وسلم نے فرمایا: ”ٹھہر جاؤ! یہ (میرے ساتھ) صفیہ بنت حیی ہے۔“ ان دونوں نے کہا: «سُبْحَانَ اللّٰهِ» ”اللہ پاک ہے“ اے اللہ کے رسول! آپ صلی اللہ علیہ وسلم نے فرمایا: ”بلاشبہ شیطان انسان کے جسم میں ایسے گردش کرتا ہے جیسے خون۔ مجھے اندیشہ ہوا کہ کہیں وہ تمہارے دلوں میں کچھ ڈال نہ دے۔“ یا فرمایا: ”کوئی بری بات نہ ڈال دے۔“ [سنن ابي داود/كتاب الصيام /حدیث: 4994]