سیدنا علی رضی اللہ عنہ سے مروی ہے، انہوں نے کہا کہ رسول اللہ صلی اللہ علیہ وسلم نے ہمیں حکم دیا: ”ہم (قربانی کے جانوروں کی) آنکھیں اور کان غور سے دیکھ لیا کریں اور کوئی ایسی قربانی نہ کریں جو کانی ہو یا اس کا کان آگے یا پیچھے سے کٹا ہوا ہو یا کان چیرا ہوا ہو یا اس میں سوراخ ہو۔“ زہیر کہتے ہیں کہ میں نے ابواسحاق سے پوچھا: کیا «عَضْبَاء» (سینگ ٹوٹی) کا بھی ذکر کیا تھا؟ انہوں نے کہا: ”نہیں۔“ میں نے کہا: «مُقَابَلَة» سے کیا مراد ہے؟ انہوں نے کہا: ”جس کے کان کا کنارا کٹا ہوا ہو۔“ میں نے کہا: «مُدَابَرَة» کیا ہے؟ انہوں نے کہا: ”جس کا کان پیچھے کی طرف سے کٹا ہوا ہو۔“ میں نے پوچھا کہ «شَرْقَاء» کسے کہتے ہیں؟ انہوں نے کہا: ”جس کا کان چیرا ہوا ہو۔“ میں نے کہا: «خَرْقَاء» کسے کہتے ہیں؟ انہوں نے کہا: ”جس کے کان میں علامت کے طور پر سوراخ کر دیا گیا ہو۔“ [سنن ابي داود/كتاب الضحايا /حدیث: 2804]

جناب عبید بن فیروز کہتے ہیں: ”میں نے سیدنا براء بن عازب رضی اللہ عنہ سے سوال کیا کہ قربانی میں کون سا جانور جائز نہیں؟“ تو انہوں نے کہا: ”رسول اللہ صلی اللہ علیہ وسلم ہم میں خطبہ دینے کے لیے کھڑے ہوئے اور میری انگلیاں اور پورے آپ صلی اللہ علیہ وسلم کی انگلیوں اور پوروں سے بہت ہیچ ہیں۔ آپ صلی اللہ علیہ وسلم نے (چار انگلیوں کے اشارہ سے) فرمایا: ”چار قسم کے جانور قربانی میں جائز نہیں ہیں، کانا جس کا کانا پن ظاہر ہو، بیمار جس کی بیماری واضح ہو، لنگڑا جس کا لنگڑا پن ظاہر ہو اور انتہائی کمزور کہ اس کی ہڈی میں گودا نہ ہو۔““ میں (عبید بن فیروز) نے کہا: ”مجھے ایسا جانور بھی ناپسند ہے جس کے دانت میں عیب ہو۔“ سیدنا براء رضی اللہ عنہ نے کہا: ”جو تمہیں ناپسند ہو تو اسے چھوڑ دو مگر دوسروں کے لیے حرام نہ ٹھہراؤ۔“ امام ابوداؤد رحمہ اللہ نے کہا: «لَا تُنْقِي» کے معنی ہیں ”جس (کی ہڈیوں) میں گودا نہ ہو (بالکل لاغر، ہڈیوں کا ڈھانچہ ہو)۔“ [سنن ابي داود/كتاب الضحايا /حدیث: 2802]