سلیم بن مطیر نے کہا: ”مجھ سے میرے والد ابومطیر نے بیان کیا کہ وہ حج کے لیے روانہ ہوئے، حتیٰ کہ جب مقامِ سویداء میں پہنچے تو میں نے دیکھا کہ ایک آدمی جو گویا کسی دوا کی تلاش میں ہے یا رسوت ڈھونڈ رہا ہے، اس نے کہا: مجھ سے اس شخص نے بیان کیا جس نے رسول اللہ صلی اللہ علیہ وسلم سے حجۃ الوداع میں سنا تھا جبکہ آپ صلی اللہ علیہ وسلم لوگوں کو وعظ فرما رہے تھے، کچھ باتوں کا حکم دے رہے تھے اور کچھ سے منع کر رہے تھے، آپ صلی اللہ علیہ وسلم نے فرمایا: ”لوگو! (بادشاہوں کے) عطیے اور ہدایا جب تک عطیے ہوں قبول کر سکتے ہو لیکن جب قریشی لوگ حکومت کے لیے لڑنے لگیں اور یہ ہدیے تمہارے دین کا عوض بن جائیں تو چھوڑ دینا۔“”امام ابوداؤد رحمہ اللہ فرماتے ہیں: ”اس روایت کو ابن مبارک نے بواسطہ محمد بن یسار، سلیم بن مطیر سے روایت کیا ہے۔“ [سنن ابي داود/كتاب الخراج والفيء والإمارة /حدیث: 2958]

سلیم بن مطیر نے اپنے والد سے بیان کیا اور یہ وادی القریٰ کا رہنے والا تھا۔ اس کے والد نے کہا: میں نے ایک صاحب سے سنا، وہ کہتے تھے کہ میں نے رسول اللہ صلی اللہ علیہ وسلم سے حجۃ الوداع میں سنا، آپ صلی اللہ علیہ وسلم نے لوگوں کو کچھ احکام بیان کیے اور کچھ سے منع فرمایا، پھر فرمایا: «اللَّهُمَّ هَلْ بَلَّغْتُ؟» ”اے اللہ! میں نے پہنچا دیا؟“ لوگوں نے کہا: ”ہاں، اے اللہ! (ہم گواہ ہیں)“ پھر آپ صلی اللہ علیہ وسلم نے فرمایا: ”جب اہل قریش آپس میں حکومت کے لیے جھگڑنے لگیں اور عطیے رشوت بن جائیں تو پھر انہیں چھوڑ دینا۔“ پوچھا گیا کہ یہ بیان کرنے والا کون ہے؟ تو لوگوں نے کہا: ”یہ رسول اللہ صلی اللہ علیہ وسلم کے صحابی ذوالزوائد رضی اللہ عنہ ہیں۔“ [سنن ابي داود/كتاب الخراج والفيء والإمارة /حدیث: 2959]