سیدنا عبداللہ بن عباس رضی اللہ عنہ سے روایت ہے کہ رسول اللہ صلی اللہ علیہ وسلم بیت الخلاء سے نکلے تو آپ صلی اللہ علیہ وسلم کو کھانا پیش کیا گیا، صحابہ نے کہا: ”کیا آپ صلی اللہ علیہ وسلم کے لیے وضو کا پانی نہ لے آئیں؟“ آپ صلی اللہ علیہ وسلم نے فرمایا: ”مجھے وضو کا حکم اسی وقت ہے جب میں نماز کے لیے کھڑا ہوں۔“ [سنن ابي داود/كتاب الأطعمة /حدیث: 3760]

ام المؤمنین سیدہ عائشہ رضی اللہ عنہا بیان کرتی ہیں کہ (ایک بار) رسول اللہ صلی اللہ علیہ وسلم نے پیشاب کیا تو سیدنا عمر رضی اللہ عنہ پانی کا لوٹا لیے آپ صلی اللہ علیہ وسلم کے پیچھے کھڑے ہو گئے۔ (بعد از فراغت) آپ صلی اللہ علیہ وسلم نے پوچھا: ”عمر! یہ کیا ہے؟“ انہوں نے کہا: ”یہ پانی ہے کہ آپ اس سے وضو کر لیں۔“ آپ صلی اللہ علیہ وسلم نے فرمایا: ”مجھے یہ حکم نہیں ہے کہ جب بھی پیشاب کروں (تو ساتھ) وضو بھی کروں۔ اگر میں نے ایسے کیا تو (امت کے لیے) سنت بن جائے گی۔“ [سنن ابي داود/كتاب الأطعمة /حدیث: 42]