سیدنا ابو سعید خدری رضی اللہ عنہ سے مروی ہے کہ رسول اللہ صلی اللہ علیہ وسلم نے ایک حدیث بیان فرمائی، اس میں جبرائیل اور میکال کا ذکر تھا تو آپ صلی اللہ علیہ وسلم نے (ان کے تلفظ میں) ” «جِبْرَائِلَ» اور «مِيْكَائِلَ» “ فرمایا۔ [سنن ابي داود/كتاب الحروف والقراءات /حدیث: 3998]

محمد بن خازم نے بیان کیا کہ جناب اعمش کی مجلس میں «جِبْرَائِيلُ» اور «مِيكَائِيلُ» کے تلفظ کی بحث چل پڑی تو اعمش نے بسند سعد طائی، عطیہ عوفی سے، انہوں نے سیدنا ابو سعید خدری رضی اللہ عنہ سے روایت کیا کہ رسول اللہ صلی اللہ علیہ وسلم نے صور پھونکنے والے فرشتے (اسرافیل) کا ذکر کیا اور فرمایا: ”اس کی دائیں جانب «جِبْرَائِيلُ» ”جبرائیل“ اور اس کی بائیں جانب «مِيكَائِيلُ» ”میکائل“ ہیں۔“ امام ابوداؤد رحمہ اللہ نے بیان کیا کہ «خَلَفٌ» کہتے ہیں: ”چالیس سال ہونے کو آئے ہیں کہ میں نے لکھنے سے قلم نہیں اٹھایا ہے مگر مجھے جو الجھن «جِبْرَائِيلُ» اور «مِيكَائِيلُ» کے ضبط میں ہوئی ہے کسی اور کلمہ میں نہیں ہوئی۔“ [سنن ابي داود/كتاب الحروف والقراءات /حدیث: 3999]