حضرت علی رضی اللہ عنہ سے منقول ہے کہ (جب میرے والد ابو طالب فوت ہوئے تو) میں نے نبی صلی اللہ علیہ وسلم سے گزارش کی کہ آپ کے گم کردہ راہ چچا فوت ہو گئے ہیں۔ اب انھیں کون (زمین میں) چھپائے (دفن کرے) گا؟ آپ صلی اللہ علیہ وسلم نے فرمایا: ”جاؤ، اپنے والد کو (زمین میں) چھپاؤ (دفن کرو) اور میرے پاس واپس آنے سے پہلے کوئی اور کام نہ کرنا۔“ میں ان کو دفنانے کے بعد آپ صلی اللہ علیہ وسلم کے پاس حاضر ہوا تو آپ صلی اللہ علیہ وسلم نے مجھے غسل کرنے کا حکم دیا۔ میں نے غسل کیا تو آپ صلی اللہ علیہ وسلم نے میرے لیے (صبر و تحمل کی) دعا کی لیکن وہ دعا مجھے یاد نہیں۔ [سنن نسائي/كتاب الجنائز/حدیث: 2008]

حضرت علی رضی اللہ عنہ سے روایت ہے کہ میں نبی صلی اللہ علیہ وسلم کے پاس گیا اور کہا: ”ابو طالب فوت ہو گئے ہیں۔“ آپ صلی اللہ علیہ وسلم نے فرمایا: ”جاؤ اسے دبا آؤ۔“ حضرت علی رضی اللہ عنہ نے کہا: ”بلاشبہ وہ مشرک فوت ہوئے ہیں۔“ آپ صلی اللہ علیہ وسلم نے فرمایا: ”جاؤ اسے دبا آؤ۔“ جب میں نے انہیں دبا دیا تو میں آپ صلی اللہ علیہ وسلم کے پاس آیا، آپ صلی اللہ علیہ وسلم نے مجھ سے فرمایا: ”غسل کرو۔“ [سنن نسائي/كتاب الجنائز/حدیث: 190]