حضرت (عبداللہ) ابن زبیر رضی اللہ عنہ بیان کرتے ہیں کہ میں نے حضرت عائشہ رضی اللہ عنہا کو فرماتے سنا کہ رسول اللہ صلی اللہ علیہ وسلم نے فرمایا: ”اگر یہ بات نہ ہوتی کہ لوگوں (نو مسلموں) کا دورِ کفر ابھی تازہ ہے اور میرے پاس اتنے اخراجات بھی نہیں جس سے میں بیت اللہ کی تعمیر اصل بنیادوں پر کر سکوں تو میں حجر میں سے پانچ ہاتھ بیت اللہ میں داخل کر دیتا اور اس کے دو دروازے بناتا؛ ایک سے لوگ داخل ہوں، دوسرے سے نکلیں گے۔“ [سنن نسائي/كتاب مناسك الحج/حدیث: 2913]

حضرت عائشہ رضی اللہ عنہا سے منقول ہے کہ رسول اللہ صلی اللہ علیہ وسلم نے فرمایا: ”کیا تجھے علم نہیں کہ جب تیری قوم (قریش) نے کعبہ کی تعمیر کی تو حضرت ابراہیم علیہ السلام کی بنیادوں سے کمی کر دی؟“ میں نے عرض کیا: اے اللہ کے رسول! کیا آپ اسے حضرت ابراہیم علیہ السلام کی بنیادوں کے مطابق تعمیر نہیں فرمائیں گے؟ آپ صلی اللہ علیہ وسلم نے فرمایا: ”اگر تیری قوم کا زمانہ کفر تازہ نہ ہوتا (تو میں تعمیر کر دیتا)۔“ حضرت عبداللہ بن عمر رضی اللہ عنہما بیان کرتے ہیں کہ اگر حضرت عائشہ رضی اللہ عنہا نے یہ بات رسول اللہ صلی اللہ علیہ وسلم سے سنی ہے تو میرا خیال ہے کہ حطیم کی طرف سے دو کونوں کا استلام چھوڑنا اسی بنا پر ہوگا کہ بیت اللہ حضرت ابراہیم علیہ السلام کی بنیادوں پر نہیں بنایا گیا۔ [سنن نسائي/كتاب مناسك الحج/حدیث: 2903]

حضرت عائشہ رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: ”اگر تیری قوم (قریش) کا دورِ کفر تازہ نہ ہوتا تو میں بیت اللہ کی عمارت کو توڑ کر اسے ابراہیم علیہ السلام کی بنیادوں پر تعمیر کر دیتا اور اس کا ایک دروازہ پچھلی جانب بنا دیتا کیونکہ قریش نے جب بیت اللہ تعمیر کیا تو انہوں نے اس کی عمارت کو چھوٹا کر دیا تھا۔“ [سنن نسائي/كتاب مناسك الحج/حدیث: 2904]

ام المومنین (حضرت عائشہ رضی اللہ عنہا) سے منقول ہے کہ رسول اللہ صلی اللہ علیہ وسلم نے فرمایا: ”اگر میری یا تیری قوم کا دورِ جاہلیت قریب نہ ہوتا تو میں کعبے کو گرانے کا حکم دیتا اور اس کے دو دروازے بنا دیتا۔“ جب حضرت عبداللہ بن زبیر رضی اللہ عنہ کو اقتدار ملا تو انہوں نے اس کے دو دروازے بنا دیے۔ [سنن نسائي/كتاب مناسك الحج/حدیث: 2905]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ان سے فرمایا: ”اے عائشہ! اگر یہ بات نہ ہوتی کہ تیری قوم کا دورِ جاہلیت ابھی قریب ہے تو میں کعبہ کو گرانے کا حکم دیتا اور اس میں وہ حصہ بھی داخل کر دیتا جو اس سے نکال دیا گیا ہے، اور میں اس کا دروازہ زمین کے برابر لگا دیتا اور اس کے (دو) دروازے بنا دیتا، ایک مشرقی اور ایک مغربی، کیونکہ قریشِ مکہ اس کی مکمل تعمیر سے عاجز آ گئے تھے (کہ ان کا حلال مال ختم ہو گیا تھا)، اور میں اسے حضرت ابراہیم علیہ السلام کی صحیح بنیادوں پر تعمیر کرتا۔“ عروہ رحمہ اللہ نے کہا: یہی وجہ ہے جس نے حضرت عبداللہ بن زبیر رضی اللہ عنہما کو آمادہ کیا کہ کعبہ کو گرا کر (رسول اللہ صلی اللہ علیہ وسلم کی خواہش کے مطابق) تعمیر کریں۔ (راویِ حدیث) یزید نے کہا: جب حضرت عبداللہ بن زبیر رضی اللہ عنہما نے کعبہ کو گرایا اور پھر بنایا تو میں حاضر تھا، آپ نے اس میں حجر کا کچھ حصہ داخل کر دیا تھا، نیز میں نے حضرت ابراہیم علیہ السلام کی بنیادیں بھی دیکھیں، وہ پتھر تھے اونٹوں کی کوہانوں جیسے، جنہیں ایک دوسرے میں پیوست کر دیا گیا تھا۔ [سنن نسائي/كتاب مناسك الحج/حدیث: 2906]

حضرت عائشہ رضی اللہ عنہا فرماتی ہیں: میری خواہش تھی کہ میں بیت اللہ میں داخل ہو کر نماز پڑھوں، رسول اللہ صلی اللہ علیہ وسلم نے میرا ہاتھ پکڑ کر مجھے حجر میں داخل کر دیا اور فرمایا: ”جب تمہارا دل بیت اللہ میں داخل ہونے کو چاہے تو یہیں (حجر میں) نماز پڑھ لیا کرو، یہ بھی تو بیت اللہ ہی کا ایک حصہ ہے، لیکن تیری قوم (قریش) نے جب بیت اللہ تعمیر کیا تو اسے چھوٹا کر دیا۔“ [سنن نسائي/كتاب مناسك الحج/حدیث: 2915]