حضرت ابوسعید خدری رضی اللہ عنہ سے روایت ہے کہ ایک آدمی رسول اللہ صلی اللہ علیہ وسلم کے پاس آیا اور کہنے لگا: اے اللہ کے رسول! سب لوگوں میں سے کون افضل ہے؟ آپ صلی اللہ علیہ وسلم نے فرمایا: ”جو شخص اپنے نفس ومال کے ساتھ اللہ تعالیٰ کے راستے میں جہاد کرے۔“ اس نے کہا: اللہ کے رسول! پھر کون؟ آپ صلی اللہ علیہ وسلم نے فرمایا: ”پھر وہ مومن جو کسی پہاڑی وادی میں فروکش ہو گیا ہو، اللہ تعالیٰ سے ڈرتا ہو اور لوگوں کو اپنے شر سے محفوظ رکھتا ہو۔“ [سنن نسائي/كتاب الجهاد/حدیث: 3107]

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”کیا میں تمہیں نہ بتاؤں کہ لوگوں میں سے بہترین رتبے والا کون شخص ہے؟“ ہم نے عرض کیا: کیوں نہیں، اے اللہ کے رسول! (ضرور بتائیں!) آپ صلی اللہ علیہ وسلم نے فرمایا: ”وہ آدمی جو اللہ تعالیٰ کے راستے میں اپنا گھوڑا لیے پھرتا ہے یہاں تک کہ اسے موت آجاتی ہے یا وہ شہید ہو جاتا ہے، اور کیا میں تمہیں وہ شخص بتاؤں جو رتبے میں اس کے قریب ہے؟“ ہم نے عرض کیا: جی ہاں، اے اللہ کے رسول! آپ صلی اللہ علیہ وسلم نے فرمایا: ”وہ شخص جو کسی پہاڑ کی گھاٹی میں علیحدہ رہتا ہے، نماز قائم کرتا ہے، زکاۃ ادا کرتا ہے اور لوگوں کے شر سے دور رہتا ہے، اور کیا میں تمہیں بتاؤں کہ بدترین شخص کون ہے؟“ ہم نے عرض کیا: جی ہاں، اے اللہ کے رسول! آپ صلی اللہ علیہ وسلم نے فرمایا: ”وہ شخص جو اللہ کے نام پر (لوگوں سے) مانگے، لیکن اللہ کے نام پر (کسی کو) نہ دے۔“ [سنن نسائي/كتاب الجهاد/حدیث: 2570]

حضرت ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم غزوہ تبوک والے سال لوگوں کو خطبہ ارشاد فرما رہے تھے، آپ نے اپنی سواری سے ٹیک لگا رکھی تھی، آپ صلی اللہ علیہ وسلم نے فرمایا: ”کیا میں تمہیں بہترین اور بدترین انسان کے بارے میں نہ بتاؤں؟ بلاشبہ بہترین انسان وہ ہے جو اللہ تعالیٰ کے راستے میں گھوڑے پر سوار ہو کر یا اونٹ پر سوار ہو کر یا پیدل کام کرتا رہے حتیٰ کہ اسے موت آ جائے۔ اور بے شک لوگوں میں سب سے برا وہ فاجر شخص ہے جو اللہ کی کتاب پڑھتا ہے اور اس کی کچھ پرواہ نہیں کرتا۔“ [سنن نسائي/كتاب الجهاد/حدیث: 3108]