حضرت بسرہ رضی اللہ عنہا سے روایت ہے، رسول اللہ صلی اللہ علیہ وسلم نے فرمایا: ”جو شخص اپنی شرم گاہ کو ہاتھ لگائے تو چاہیے کہ وہ وضو کرے۔“ [سنن نسائي/كتاب الغسل والتيمم/حدیث: 445]

حضرت عمرو بن زبیر رحمہ اللہ سے مروی ہے، انہوں نے کہا: ”میں مروان بن حکم رحمہ اللہ کے پاس گیا، چنانچہ ہم نے آپس میں ان چیزوں کا ذکر کیا جن سے وضو واجب ہوتا ہے۔ مروان نے کہا: ”شرم گاہ کو چھونے سے بھی وضو واجب ہو جاتا ہے۔“ میں نے کہا: ”مجھے تو اس بات کا علم نہیں۔“ مروان نے کہا: ”مجھے حضرت بسرہ بنت صفوان رضی اللہ عنہا نے بتایا کہ انہوں نے اللہ کے رسول صلی اللہ علیہ وسلم کو فرماتے سنا: ”جب تم میں سے کوئی اپنی شرم گاہ (عضو) کو چھو بیٹھے تو اسے چاہیے کہ وضو کرے۔“”“ [سنن نسائي/كتاب الغسل والتيمم/حدیث: 163]

حضرت عروہ بن زبیر رضی اللہ عنہ سے منقول ہے، انہوں نے کہا کہ مروان نے مدینہ کی امارت (گورنری) کے دوران ذکر کیا کہ ”جب آدمی اپنا ہاتھ عضو مخصوص کو لگائے تو اسے اس کے بعد وضو کرنا چاہیے۔“ میں نے اس کا انکار کیا اور کہا: ”جس نے اپنے عضو مخصوص کو ہاتھ لگایا اس پر کوئی وضو نہیں ہے۔“ تو مروان نے کہا کہ مجھے حضرت بسرہ بنت صفوان رضی اللہ عنہا نے بیان کیا کہ انہوں نے اللہ کے رسول صلی اللہ علیہ وسلم کو ان چیزوں کا ذکر کرتے ہوئے سنا جن سے وضو کرنا پڑتا ہے، چنانچہ رسول اللہ صلی اللہ علیہ وسلم نے فرمایا: ”عضو مخصوص کو چھونے سے بھی وضو کرے۔“ عروہ نے کہا کہ میں مروان سے بحث کرتا رہا حتیٰ کہ اس نے اپنے محافظ دستے سے ایک آدمی بلایا اور اسے حضرت بسرہ رضی اللہ عنہا کے پاس بھیجا۔ اس نے ان سے اس روایت کے بارے میں سوال کیا جو انہوں نے مروان کو بیان کی تھی تو حضرت بسرہ رضی اللہ عنہا نے وہی روایت سنا کر بھیجی جو مروان نے مجھے ان کے نام سے بیان کی تھی۔ [سنن نسائي/كتاب الغسل والتيمم/حدیث: 164]

حضرت بسرہ بنت صفوان رضی اللہ عنہا سے منقول ہے، نبی کریم صلی اللہ علیہ وسلم نے فرمایا: ”جب تم میں سے کوئی اپنا ہاتھ اپنی شرم گاہ کو لگائے تو وضو کرے۔“ [سنن نسائي/كتاب الغسل والتيمم/حدیث: 446]

حضرت عروہ بن زبیر رحمہ اللہ سے روایت ہے کہ مروان بن حکم نے کہا: ”عضو مخصوص چھونے سے وضو واجب ہوجاتا ہے۔“ مروان نے کہا: ”مجھے یہ بات بسرہ بنت صفوان رضی اللہ عنہا نے بتائی۔“ عروہ رحمہ اللہ نے ان (بسرہ) کو پیغام بھیجا تو انہوں نے فرمایا: ”ایک دفعہ اللہ کے رسول صلی اللہ علیہ وسلم نے ان چیزوں کا ذکر فرمایا جن سے وضو واجب ہوتا ہے، تو آپ صلی اللہ علیہ وسلم نے فرمایا: ”عضو کو چھونے سے بھی۔“” [سنن نسائي/كتاب الغسل والتيمم/حدیث: 447]

حضرت بسرہ بنت صفوان رضی اللہ عنہا سے منقول ہے کہ نبی صلی اللہ علیہ وسلم نے فرمایا: ”جو آدمی اپنے عضو کو ہاتھ لگائے تو وہ وضو کیے بغیر نماز نہ پڑھے۔“ امام ابوعبدالرحمن رحمہ اللہ (نسائی) بیان کرتے ہیں کہ ہشام بن عروہ نے یہ حدیث اپنے باپ (حضرت عروہ رحمہ اللہ) سے نہیں سنی۔ [سنن نسائي/كتاب الغسل والتيمم/حدیث: 448]