سیدنا عبداللہ بن مسعود رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا: ”اے ابوبکر! گزشتہ رات میں نے (خواب میں) خود کو دیکھا کہ میں ایک کنویں کے پاس موجود ہوں اور پانی نکال رہا ہوں، پھر تم آئے اور تم نے پانی نکالنا شروع کیا، تمہارے اندر کمزوری تھی، اللہ تعالیٰ تمہاری مغفرت کرے، پھر عمر آیا تو وہ (پانی کا ڈول) ایک بڑا ڈول بن گیا، اور اس نے لوگوں کو بھرپور طریقے سے سیراب کر دیا۔“
یہ روایت امام طبرانی نے نقل کی ہے، اور اس کی سند میں ایک راوی ایوب بن جابر ہے، جسے ثقہ قرار دیا گیا ہے، لیکن ایک سے زیادہ افراد نے اسے ضعیف قرار دیا ہے، اس روایت کے بقیہ رجال کی توثیق کی گئی ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 14446]

سیدنا ابوطفیل رضی اللہ عنہ بیان کرتے ہیں: نبی اکرم صلی اللہ علیہ وسلم نے ارشاد فرمایا: ”میں گزشتہ رات (خواب میں) پانی نکال رہا تھا اسی دوران میرے پاس سیاہ رنگ کی اور خاکستری رنگ کی بکریاں آئیں، پھر ابوبکر آیا، اس نے ایک ڈول یا دو ڈول نکالے، اس کے نکالنے میں کمزوری تھی، اللہ تعالیٰ اس کی مغفرت کرے، پھر عمر آیا، تو وہ ایک بڑا ڈول بن گیا، اس نے حوضوں کو بھر دیا، اور آنے والوں کو سیراب کر دیا، میں نے پانی نکالنے کے کام میں عمر جیسا محنتی شخص نہیں دیکھا، تو میں نے اس کی یہ تعبیر کی کہ سیاہ بکریوں سے مراد عرب ہیں، اور خاکستری بکریوں سے مراد عجم ہیں۔“
یہ روایت امام طبرانی نے نقل کی ہے، اور اس کی سند حسن ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 14447]

ابووائل کے حوالے سے یہ بات منقول ہے، وہ فرماتے ہیں: ”(شاید نبی اکرم صلی اللہ علیہ وسلم نے ارشاد فرمایا:) میں نے جب بھی عمر کو دیکھا، تو اس کی دونوں آنکھوں کے درمیان ایک فرشتہ موجود تھا، جو اسے سیدھی راہ دکھا رہا تھا۔“
یہ روایت امام طبرانی نے مختلف اسانید کے ساتھ نقل کی ہے، ان اسانید میں سے ایک کے رجال ”صحیح“ کے رجال ہیں۔ آگے چل کر سیدنا عمر رضی اللہ عنہ کی وفات کے بارے میں سیدنا عبداللہ بن مسعود رضی اللہ عنہ کا قول آئے گا، جو اس کی مانند ہے۔ [مجمع الزاوئد ومنبع الفوائد/كِتَابُ الْمَنَاقِبِ/حدیث: 14448]