سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم ایک لشکر کی تیاری میں مصروف رہے یہاں تک کہ آدھی رات بیت گئی یا اس کے قریب وقت ہو گیا، پھر آپ صلی اللہ علیہ وسلم ہمارے پاس تشریف لائے اور ارشاد فرمایا: ”لوگ تو نماز پڑھ کر سو چکے ہیں لیکن تم (اب تک) اس نماز کا انتظار کر رہے ہو، آگاہ رہو! تم جب تک نماز کے انتظار میں رہو گے، تب تک تم مسلسل نماز ہی کی حالت میں شمار ہو گے۔“ [مسند أبي يعلى الموصلي/مُسْنَدُ جَابِرٍ/حدیث: 1936]

سیدنا جابر رضی اللہ عنہ سے روایت ہے کہ میں نے عرض کی: ”اے اللہ کے رسول صلی اللہ علیہ وسلم ! آپ نے کیسی صبح کی؟“ تو آپ صلی اللہ علیہ وسلم نے ارشاد فرمایا: ”میں اس شخص سے بہتر حال میں ہوں جس نے نہ تو روزے کی حالت میں صبح کی ہو اور نہ ہی کسی بیمار کی عیادت کی ہو۔“ [مسند أبي يعلى الموصلي/مُسْنَدُ جَابِرٍ/حدیث: 1937]

سیدنا جابر بن عبد اللہ رضی اللہ عنہما سے روایت ہے کہ ایک دیہاتی نبی کریم صلی اللہ علیہ وسلم کی خدمتِ اقدس میں حاضر ہوا اور عرض کی کہ مجھے عمرہ کے متعلق بتائیے، کیا وہ واجب ہے؟ تو رسول اللہ صلی اللہ علیہ وسلم نے ارشاد فرمایا: ”نہیں، البتہ تمہارا عمرہ کرنا تمہارے لیے بہتر ہے۔“ [مسند أبي يعلى الموصلي/مُسْنَدُ جَابِرٍ/حدیث: 1938]

سیدنا جابر بن عبداللہ رضی اللہ عنہما سے روایت ہے کہ ایک مرتبہ رات کے وقت رسول اللہ صلی اللہ علیہ وسلم اپنے صحابہ رضی اللہ عنہم کے پاس باہر تشریف لائے جبکہ وہ عشاء کی نماز کا انتظار کر رہے تھے، تو آپ صلی اللہ علیہ وسلم نے ارشاد فرمایا: ”لوگوں نے نماز پڑھ لی ہے اور وہ سو چکے ہیں، جبکہ تم جب تک اس نماز کا انتظار کر رہے ہو تو گویا تم نماز ہی کی حالت میں ہو“، پھر آپ صلی اللہ علیہ وسلم نے مزید ارشاد فرمایا: ”اگر ناتوانوں کی کمزوری اور بوڑھوں کے بڑھاپے کی رعایت پیشِ نظر نہ ہوتی تو میں یقیناً اس نماز کو آدھی رات تک مؤخر کر دیتا۔“ [مسند أبي يعلى الموصلي/مُسْنَدُ جَابِرٍ/حدیث: 1939]

سیدنا جابر رضی اللہ عنہ سے روایت ہے کہ سیدنا نعمان بن قوقل رضی اللہ عنہ نبی اکرم صلی اللہ علیہ وسلم کی خدمتِ اقدس میں حاضر ہوئے اور عرض کی: ”اے اللہ کے رسول صلی اللہ علیہ وسلم ! اگر میں حلال کو حلال جانوں، حرام کو حرام ٹھہراؤں اور فرض نمازیں (پابندی سے) ادا کروں، تو کیا میں جنت میں داخل ہو جاؤں گا؟“ آپ صلی اللہ علیہ وسلم نے ارشاد فرمایا: ”جی ہاں۔“ [مسند أبي يعلى الموصلي/مُسْنَدُ جَابِرٍ/حدیث: 1940]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”پانچوں نمازوں کی مثال ایک ایسی رواں اور گہری نہر کی سی ہے جو تم میں سے کسی کے دروازے پر بہتی ہو اور وہ اس میں ہر روز پانچ مرتبہ غسل کرتا ہو۔“ [مسند أبي يعلى الموصلي/مُسْنَدُ جَابِرٍ/حدیث: 1941]

سیدنا جابر رضی اللہ عنہ سے روایت ہے کہ میں نے نبی کریم صلی اللہ علیہ وسلم کو آپ کی وفات سے تین روز قبل یہ ارشاد فرماتے ہوئے سنا: ”تم میں سے کوئی شخص ہرگز اس حالت کے سوا وفات نہ پائے کہ وہ اللہ عزوجل کے بارے میں حسنِ ظن (اچھا گمان) رکھتا ہو۔“ [مسند أبي يعلى الموصلي/مُسْنَدُ جَابِرٍ/حدیث: 1942]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جب تم میں سے کوئی اپنی نماز مسجد میں ادا کر لے تو اسے چاہیے کہ اپنی نماز کا کچھ حصہ اپنے گھر کے لیے بھی مقرر کرے، کیونکہ اللہ تعالیٰ اس کی اس نماز کے باعث اس کے گھر میں خیر و برکت پیدا فرما دیتا ہے۔“ [مسند أبي يعلى الموصلي/مُسْنَدُ جَابِرٍ/حدیث: 1943]

سیدنا جابر رضی اللہ عنہ سے روایت ہے کہ انہوں نے فرمایا: ”رسول اللہ صلی اللہ علیہ وسلم نے صرف حج ہی کا تلبیہ پکارا (یعنی حج ہی کی نیت سے احرام باندھا) تھا۔“ [مسند أبي يعلى الموصلي/مُسْنَدُ جَابِرٍ/حدیث: 1944]

سیدنا جابر بن عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم ایک ایسے شخص کے پاس سے گزرے جو وضو کرتے ہوئے اپنے موزوں کو دھو رہا تھا، تو آپ صلی اللہ علیہ وسلم نے اسے اپنے ہاتھ سے ٹوکا اور ارشاد فرمایا: ”ہمیں اس کا حکم نہیں دیا گیا۔“ راوی کہتے ہیں کہ پھر رسول اللہ صلی اللہ علیہ وسلم نے اسے (صحیح طریقہ) کر کے دکھایا، چنانچہ آپ صلی اللہ علیہ وسلم نے اپنے دستِ مبارک سے موزوں کے سامنے والے حصے سے پنڈلی کی جانب مسح فرمایا اور (مسح کے دوران) اپنی انگلیوں کو کشادہ رکھا، اور یہ عمل ایک ہی مرتبہ کیا۔ [مسند أبي يعلى الموصلي/مُسْنَدُ جَابِرٍ/حدیث: 1945]