سیدنا جابر رضی اللہ عنہ سے روایت ہے کہ میں نے نبی کریم صلی اللہ علیہ وسلم کو یہ فرماتے ہوئے سنا: ”بے شک شیطان اس بات سے مایوس ہو چکا ہے کہ نمازی اس کی پرستش کریں گے، لیکن وہ ان کے درمیان فتنہ و فساد اور باہمی اشتعال انگیزی پیدا کرنے کی تگ و دو میں لگا ہوا ہے۔“ [مسند أبي يعلى الموصلي/مُسْنَدُ جَابِرٍ/حدیث: 2294]

سیدنا جابر رضی اللہ عنہ سے روایت ہے کہ انصار کے ایک شخص، جنہیں سیدنا نعمان بن قوقل رضی اللہ عنہ کہا جاتا تھا، رسول اللہ صلی اللہ علیہ وسلم کی بارگاہ میں حاضر ہوئے اور عرض کی: ”اے اللہ کے رسول! فرمائیے کہ اگر میں فرض نمازیں ادا کروں، حلال کو حلال سمجھوں اور حرام کو حرام جانوں اور اس پر کوئی اضافہ نہ کروں، تو کیا میں جنت میں داخل ہو جاؤں گا؟“ آپ صلی اللہ علیہ وسلم نے ارشاد فرمایا: ”جی ہاں۔“ [مسند أبي يعلى الموصلي/مُسْنَدُ جَابِرٍ/حدیث: 2295]

سیدنا جابر رضی اللہ عنہ سے روایت ہے کہ نبی کریم صلی اللہ علیہ وسلم سے ایک شخص نے دریافت کیا کہ ”کون سی نماز سب سے زیادہ فضیلت کی حامل ہے؟“ تو آپ صلی اللہ علیہ وسلم نے ارشاد فرمایا: «طُولُ الْقُنُوتِ» ”طویل قیام (یعنی نماز میں دیر تک کھڑا رہنا) سب سے افضل ہے۔“ [مسند أبي يعلى الموصلي/مُسْنَدُ جَابِرٍ/حدیث: 2296]

سیدنا جابر رضی اللہ عنہ سے روایت ہے کہ نبی اکرم صلی اللہ علیہ وسلم گھوڑے سے گر گئے جس کی وجہ سے آپ صلی اللہ علیہ وسلم کے پاؤں مبارک میں موچ آگئی، ہم آپ صلی اللہ علیہ وسلم کی خدمت میں حاضر ہوئے تو آپ صلی اللہ علیہ وسلم نماز پڑھ رہے تھے، آپ صلی اللہ علیہ وسلم نے ہمیں اپنے ہاتھ سے اشارہ فرمایا، پھر اگلے روز ہم دوبارہ حاضر ہوئے تو آپ صلی اللہ علیہ وسلم فرض نماز بیٹھ کر ادا فرما رہے تھے، آپ صلی اللہ علیہ وسلم نے ہمیں ہاتھ سے اشارہ فرمایا کہ ”بیٹھ جاؤ“، پھر جب آپ صلی اللہ علیہ وسلم نماز سے فارغ ہوئے تو ارشاد فرمایا: ”جب امام بیٹھ کر نماز پڑھے تو تم سب بھی بیٹھ کر نماز پڑھو، اور جب وہ کھڑے ہو کر نماز پڑھے تو تم بھی کھڑے ہو کر نماز پڑھو۔“ [مسند أبي يعلى الموصلي/مُسْنَدُ جَابِرٍ/حدیث: 2297]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”کوئی بھی مسلمان مرد ہو یا عورت جب رات کو سوتا ہے تو اس کے سر پر ایک بندھی ہوئی رسی (گرہ) ہوتی ہے، پھر اگر وہ بیدار ہو کر اللہ تعالیٰ کا ذکر کرے تو ایک گرہ کھل جاتی ہے، اور اگر وہ اٹھ کر وضو کرے اور نماز پڑھے تو اس کی تمام گرہیں کھل جاتی ہیں اور وہ چست و توانا ہو کر اس حال میں صبح کرتا ہے کہ اسے خیر و بھلائی حاصل ہو چکی ہوتی ہے، لیکن اگر وہ اللہ کا ذکر کیے بغیر سوتا رہے تو وہ ان گرہوں کے بوجھ تلے سستی اور کاہلی کے ساتھ صبح کرتا ہے۔“ [مسند أبي يعلى الموصلي/مُسْنَدُ جَابِرٍ/حدیث: 2298]

سیدنا جابر رضی اللہ عنہ سے روایت ہے کہ انہوں نے فرمایا: ”رسول اللہ صلی اللہ علیہ وسلم نے جھاڑ پھونک سے منع فرمایا، تو میرے ماموں آپ صلی اللہ علیہ وسلم کی خدمت میں حاضر ہوئے، وہ بچھو کے کاٹے پر دم کیا کرتے تھے، انہوں نے عرض کیا: (یا رسول اللہ!) آپ نے جھاڑ پھونک سے منع فرما دیا ہے جبکہ میں بچھو کے ڈنک کے لیے دم کرتا ہوں، تو نبی کریم صلی اللہ علیہ وسلم نے ارشاد فرمایا: «مَنِ اسْتَطَاعَ أَنْ يَنْفَعَ أَخَاهُ فَلْيَفْعَلْ» ”تم میں سے جو شخص اپنے بھائی کو نفع پہنچانے کی استطاعت رکھتا ہو تو اسے چاہیے کہ وہ ایسا ضرور کرے۔““ [مسند أبي يعلى الموصلي/مُسْنَدُ جَابِرٍ/حدیث: 2299]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جب تم میت کو خوشبو کی دھونی دو تو اسے طاق مرتبہ دیا کرو۔“ [مسند أبي يعلى الموصلي/مُسْنَدُ جَابِرٍ/حدیث: 2300]

سیدنا جابر رضی اللہ عنہ سے روایت ہے کہ انہوں نے فرمایا: ”ہم نے نبی اکرم صلی اللہ علیہ وسلم کے دستِ مبارک پر درخت کے نیچے اس عہد پر بیعت کی کہ ہم (دشمن کے مقابلے سے) راہِ فرار اختیار نہیں کریں گے۔“ [مسند أبي يعلى الموصلي/مُسْنَدُ جَابِرٍ/حدیث: 2301]

سیدنا جابر رضی اللہ عنہ سے روایت ہے کہ ہم نبی اکرم صلی اللہ علیہ وسلم کی خدمتِ اقدس میں حاضر ہوئے تو آپ صلی اللہ علیہ وسلم نے (از خود) دریافت فرمایا: ”کیا تم مجھ سے فلاں فلاں معاملے کے متعلق سوال کرنے آئے ہو؟“ ہم نے عرض کیا: جی ہاں (اے اللہ کے رسول صلی اللہ علیہ وسلم !)۔ آپ صلی اللہ علیہ وسلم نے ارشاد فرمایا: ”تم میرے نام پر (اپنا) نام رکھو لیکن میری کنیت اختیار نہ کرو۔“ پھر آپ صلی اللہ علیہ وسلم نے دریافت فرمایا: ”اور کیا تم نے قیامت کا ذکر بھی چھیڑا تھا؟“ ہم نے عرض کیا: جی بالکل، ایسا ہی ہے۔ تو آپ صلی اللہ علیہ وسلم نے فرمایا: ”(آج) جو بھی جاندار نفس پیدا ہو چکا ہے، اس پر سو سال کا عرصہ نہیں گزرے گا (یعنی اس وقت موجود نسل میں سے کوئی بھی سو سال بعد زندہ نہیں رہے گا)۔“ [مسند أبي يعلى الموصلي/مُسْنَدُ جَابِرٍ/حدیث: 2302]

سیدنا جابر رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”اگر ابنِ آدم کے پاس کھجوروں کا ایک باغ ہو تو وہ اس کے ساتھ مزید ویسے ہی ایک اور باغ کی تمنا کرے گا، اور حقیقت یہ ہے کہ انسان کے پیٹ کو مٹی کے سوا کوئی چیز نہیں بھر سکتی۔“ [مسند أبي يعلى الموصلي/مُسْنَدُ جَابِرٍ/حدیث: 2303]