سیدہ عائشہ رضی اللہ عنہا سے روایت ہے کہ انہوں نے بیان کیا کہ میں نے رسول اللہ صلی اللہ علیہ وسلم سے (حطیم کی) دیوار کے متعلق دریافت کیا کہ کیا وہ بیت اللہ کا حصہ ہے؟ آپ صلی اللہ علیہ وسلم نے فرمایا: ”جی ہاں“، میں نے عرض کی: تو پھر ان لوگوں نے اسے بیت اللہ میں شامل کیوں نہیں کیا؟ آپ صلی اللہ علیہ وسلم نے ارشاد فرمایا: ”تمہاری قوم کے پاس اخراجات کی کمی پڑ گئی تھی“، سیدہ عائشہ رضی اللہ عنہا فرماتی ہیں کہ میں نے آپ صلی اللہ علیہ وسلم سے پوچھا کہ بیت اللہ کا دروازہ اس قدر بلند کیوں ہے؟ آپ صلی اللہ علیہ وسلم نے ارشاد فرمایا: ”تمہاری قوم نے ایسا اس لیے کیا تاکہ وہ جسے چاہیں داخل کریں، اگر تمہاری قوم کا زمانہ جاہلیت ابھی قریب نہ ہوتا اور مجھے یہ اندیشہ نہ ہوتا کہ ان کے دل اس تبدیلی کو ناپسند کریں گے، تو میں ضرور حطیم کو بیت اللہ میں شامل کر دیتا اور اس کے دروازے کو زمین کے برابر کر دیتا“۔ [مسند أبي يعلى الموصلي/مُسْنَدُ عَائِشَةَ/حدیث: 4627]

سیدنا عبداللہ بن زبیر رضی اللہ عنہما، سیدہ عائشہ رضی اللہ عنہا سے روایت کرتے ہیں کہ نبی کریم صلی اللہ علیہ وسلم نے ان سے ارشاد فرمایا: ”اگر تمہاری قوم کا دورِ جاہلیت سے زمانہ ابھی نیا نیا نہ ہوتا تو میں کعبہ کے دروازے کو زمین سے ملا دیتا، اور بیت اللہ میں حطیم کی جانب سے چھ ہاتھ کا اضافہ کر دیتا، اور اس کا ایک مشرقی دروازہ بنا دیتا۔“ [مسند أبي يعلى الموصلي/مُسْنَدُ عَائِشَةَ/حدیث: 4628]

سیدہ عائشہ رضی اللہ عنہا سے روایت ہے کہ سیدہ ام حبیبہ رضی اللہ عنہا اور سیدہ ام سلمہ رضی اللہ عنہا نے حبشہ کے ایک ایسے کلیسا کا ذکر کیا جسے انہوں نے دیکھا تھا اور اس میں تصویریں آویزاں تھیں، جب انہوں نے یہ بات رسول اللہ صلی اللہ علیہ وسلم کو بتائی تو آپ صلی اللہ علیہ وسلم نے ارشاد فرمایا: ”ان لوگوں کا یہ حال تھا کہ جب ان میں کوئی نیک بندہ وفات پا جاتا تو وہ اس کی قبر پر مسجد تعمیر کر لیتے اور اس میں یہ تصویریں بنا دیتے، اللہ کے نزدیک یہ لوگ قیامت کے دن بدترین مخلوق ہوں گے۔“ [مسند أبي يعلى الموصلي/مُسْنَدُ عَائِشَةَ/حدیث: 4629]

سیدہ عائشہ رضی اللہ عنہا سے روایت ہے کہ انہوں نے بیان فرمایا کہ ”جب میں بیدار ہوتی تو نبی کریم صلی اللہ علیہ وسلم مجھ سے گفتگو فرماتے اور جب میں سوئی ہوتی تو آپ صلی اللہ علیہ وسلم لیٹ جاتے“ یعنی یہ اس وقت کا معمول تھا جب نبی کریم صلی اللہ علیہ وسلم وتر کی نماز ادا فرما لیتے۔ [مسند أبي يعلى الموصلي/مُسْنَدُ عَائِشَةَ/حدیث: 4630]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: «مَنْ دَعَا عَلَى مَنْ ظَلَمَهُ فَقَدِ انْتَصَرَ» ”جس نے اس شخص کے خلاف بددعا کی جس نے اس پر ظلم کیا تھا، تو یقیناً اس نے (اپنا) بدلہ لے لیا۔“ [مسند أبي يعلى الموصلي/مُسْنَدُ عَائِشَةَ/حدیث: 4631]

سیدہ عائشہ رضی اللہ عنہا سے روایت ہے کہ انہوں نے بیان فرمایا کہ ”رسول اللہ صلی اللہ علیہ وسلم مسجد میں اعتکاف کی حالت میں ہوتے ہوئے اپنا سرِ مبارک میری طرف (حجرے میں) جھکا دیا کرتے تھے، پس میں آپ صلی اللہ علیہ وسلم کے بالوں میں کنگھی کر دیتی تھی حالانکہ میں حالتِ حیض میں ہوتی تھی۔“ [مسند أبي يعلى الموصلي/مُسْنَدُ عَائِشَةَ/حدیث: 4632]

ابو سلمہ رحمہ اللہ سے روایت ہے کہ میں نے سیدہ عائشہ رضی اللہ عنہا سے رسول اللہ صلی اللہ علیہ وسلم کے روزوں کے متعلق دریافت کیا تو انہوں نے فرمایا: ”آپ صلی اللہ علیہ وسلم (نفلی) روزے رکھنا شروع فرماتے تو ہم (آپس میں) کہتے کہ اب آپ صلی اللہ علیہ وسلم مسلسل روزے ہی رکھیں گے، اور جب روزے چھوڑنا شروع فرماتے تو ہم کہتے کہ اب آپ صلی اللہ علیہ وسلم روزہ نہیں رکھیں گے، اور میں نے آپ صلی اللہ علیہ وسلم کو شعبان سے زیادہ کسی مہینے میں کثرت سے روزے رکھتے نہیں دیکھا؛ آپ صلی اللہ علیہ وسلم (تقریباً) پورا شعبان ہی روزے رکھتے تھے، یعنی آپ صلی اللہ علیہ وسلم شعبان کے چند ایام کے علاوہ تمام ایام میں روزہ رکھا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4633]

مسروق رحمہ اللہ سے روایت ہے کہ سیدہ عائشہ رضی اللہ عنہا نے بیان فرمایا کہ میں نے رسول اللہ صلی اللہ علیہ وسلم سے نماز کے دوران ادھر ادھر دیکھنے (توجہ ہٹانے) کے متعلق دریافت کیا تو آپ صلی اللہ علیہ وسلم نے ارشاد فرمایا: ”یہ ایک طرح کی جھپٹ اور اچک لینا ہے، جس کے ذریعے شیطان بندے کی نماز میں سے (کچھ حصہ) چرا لیتا ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4634]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے ارشاد فرمایا: «الْحُمَّى مِنْ فَيْحِ جَهَنَّمَ فَأَبْرِدُوهَا بِالْمَاءِ» ”بخار جہنم کی تپش کی شدت کا اثر ہے، لہٰذا تم اسے پانی کے ذریعے ٹھنڈا کیا کرو۔“ [مسند أبي يعلى الموصلي/مُسْنَدُ عَائِشَةَ/حدیث: 4635]

سیدہ عائشہ رضی اللہ عنہا سے روایت ہے کہ سیدہ ہند بنت عتبہ رضی اللہ عنہا نے عرض کی: ”اے اللہ کے رسول صلی اللہ علیہ وسلم ! یقیناً سیدنا ابوسفیان رضی اللہ عنہ ایک نہایت بخیل انسان ہیں اور وہ مجھے اتنا مال نہیں دیتے جو میرے اور میرے بچوں کے لیے کافی ہو، اس لیے میں ان کی لاعلمی میں ان کے مال سے کچھ لے لیتی ہوں“، تو رسول اللہ صلی اللہ علیہ وسلم نے ارشاد فرمایا: ”تم معروف (دستور) کے مطابق اتنا مال لے لیا کرو جو تمہاری اور تمہاری اولاد کی ضروریات کے لیے کافی ہو“۔ [مسند أبي يعلى الموصلي/مُسْنَدُ عَائِشَةَ/حدیث: 4636]