سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے اسی طرح (سابقہ حدیث کے ہم معنی) ارشاد فرمایا، اور راویِ حدیث ہارون رحمہ اللہ بیان کرتے ہیں کہ میں نے سفیان رحمہ اللہ کو یہ فرماتے ہوئے سنا کہ ”الوشيقة“ اس گوشت کو کہتے ہیں جسے پہلے پکایا جائے اور پھر اسے خشک کر لیا جائے۔ [مسند أبي يعلى الموصلي/مُسْنَدُ عَائِشَةَ/حدیث: 4617]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم کی خدمت میں ایک شخص حاضر ہوا تو آپ صلی اللہ علیہ وسلم نے اسے اپنے قریب کیا اور اپنی مجلس میں اسے اپنے پاس جگہ دی، پھر جب وہ شخص وہاں سے چلا گیا تو انہوں نے عرض کی کہ ”اے اللہ کے رسول صلی اللہ علیہ وسلم ! کیا آپ اس شخص کے متعلق (بیزاری کی) شکایت نہیں فرما رہے تھے؟“ تو آپ صلی اللہ علیہ وسلم نے ارشاد فرمایا: ”ہاں! لیکن لوگوں میں بدترین وہ ہیں جن کے شر سے بچنے کے لیے ان کی عزت و تکریم کی جائے۔“ [مسند أبي يعلى الموصلي/مُسْنَدُ عَائِشَةَ/حدیث: 4618]

سیدہ عائشہ رضی اللہ عنہا سے روایت ہے کہ ”نبی صلی اللہ علیہ وسلم ایک رات اپنے بستر مبارک سے اٹھے، میرا گمان ہوا کہ آپ صلی اللہ علیہ وسلم اپنی کسی اور زوجہ مطہرہ کے پاس تشریف لے جانا چاہتے ہیں، چنانچہ میں آپ صلی اللہ علیہ وسلم کے پیچھے پیچھے چل پڑی یہاں تک کہ آپ صلی اللہ علیہ وسلم قبرستان پہنچ کر کھڑے ہو گئے اور فرمایا: «السَّلَامُ عَلَيْكُمْ دَارَ قَوْمٍ مُؤْمِنِينَ، وَإِنَّا بِكُمْ لَاحِقُونَ» ”تم پر سلامتی ہو اے مومن قوم کے گھر والو! اور ہم بھی یقیناً تمہارے ساتھ ملنے والے ہیں“، پھر آپ صلی اللہ علیہ وسلم نے دعا فرمائی: «اللَّهُمَّ لَا تَحْرِمْنَا أَجْرَهُمْ وَلَا تَفْتِنَّا بَعْدَهُمْ» ”اے اللہ! ہمیں ان کے اجر سے محروم نہ فرما اور ان کے بعد ہمیں کسی آزمائش میں نہ ڈال“، سیدہ عائشہ رضی اللہ عنہا فرماتی ہیں کہ پھر آپ صلی اللہ علیہ وسلم مڑے تو آپ صلی اللہ علیہ وسلم کی نظر مجھ پر پڑی اور مجھے پہچان کر فرمایا: ”ہائے اس پر افسوس! اگر یہ خود پر قابو پانے کی ہمت رکھتی تو ایسا نہ کرتی۔““ [مسند أبي يعلى الموصلي/مُسْنَدُ عَائِشَةَ/حدیث: 4619]

سیدہ عائشہ رضی اللہ عنہا سے روایت ہے کہ انہوں نے فرمایا: ”میں نے ایک رات رسول اللہ صلی اللہ علیہ وسلم کو (بستر پر) نہ پایا تو میں آپ کے پیچھے نکلی، اچانک دیکھا کہ آپ بقیع میں موجود ہیں، پس میں نے آپ صلی اللہ علیہ وسلم کو یہ فرماتے ہوئے سنا: «سَلَامٌ عَلَيْكُمْ دَارَ قَوْمٍ مُؤْمِنِينَ. أَنْتُمْ لَنَا فَرَطٌ وَإِنَّا لَاحِقُونَ. اللَّهُمَّ لَا تَحْرِمْنَا أَجْرَهُمْ وَلَا تَفْتِنَّا بَعْدَهُمْ» ”تم پر سلامتی ہو اے مومن قوم کے گھر والو! تم ہمارے پیش رو ہو اور ہم بھی یقیناً تم سے ملنے والے ہیں۔ اے اللہ! ہمیں ان کے اجر سے محروم نہ فرما اور ان کے بعد ہمیں کسی فتنے میں مبتلا نہ کرنا۔“ پھر آپ صلی اللہ علیہ وسلم مڑے اور میری طرف دیکھ کر فرمایا: ”افسوس اس پر! اگر اس کے بس میں ہوتا (یا یہ ضبط کر پاتی) تو ایسا نہ کرتی۔““ (اسے عبداللہ بن عامر بن ربیعہ رحمہ اللہ نے سیدہ عائشہ رضی اللہ عنہا سے روایت کیا ہے)۔ [مسند أبي يعلى الموصلي/مُسْنَدُ عَائِشَةَ/حدیث: 4620]

سیدہ عائشہ رضی اللہ عنہا سے روایت ہے کہ ”سیدہ سودہ رضی اللہ عنہا جب عمر رسیدہ ہوگئیں تو انہوں نے اپنی باری کا دن سیدہ عائشہ رضی اللہ عنہا کو ہبہ کر دیا، آپ فرماتی ہیں کہ رسول اللہ صلی اللہ علیہ وسلم میرے لیے میرے اپنے دن اور ان (سیدہ سودہ رضی اللہ عنہا) کے دن کی تقسیم فرمایا کرتے تھے، اور وہ پہلی خاتون تھیں جن سے آپ صلی اللہ علیہ وسلم نے (سیدہ خدیجہ رضی اللہ عنہا کی وفات کے بعد) نکاح فرمایا تھا۔“ [مسند أبي يعلى الموصلي/مُسْنَدُ عَائِشَةَ/حدیث: 4621]

سیدہ عائشہ رضی اللہ عنہا سے روایت ہے کہ انہوں نے فرمایا: ”رسول اللہ صلی اللہ علیہ وسلم نے مجھے حکم ارشاد فرمایا کہ میں ایک خاتون کو ان کے شوہر کے پاس (رخصتی کے لیے) لے جاؤں، حالانکہ اس وقت تک ان خاتون نے اپنے حقِ مہر میں سے کچھ بھی وصول نہیں کیا تھا“۔ [مسند أبي يعلى الموصلي/مُسْنَدُ عَائِشَةَ/حدیث: 4622]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم کی خدمتِ اقدس میں بچوں کو لایا جاتا تھا، آپ صلی اللہ علیہ وسلم ان کے لیے دعائے خیر فرماتے اور ان کے حق میں برکت کی دعا کرتے تھے، ایک مرتبہ ایک بچہ لایا گیا جس نے آپ صلی اللہ علیہ وسلم کے (لباس مبارک) پر پیشاب کر دیا، تو آپ صلی اللہ علیہ وسلم نے پانی طلب فرمایا اور اسے اس جگہ پر بہا دیا۔“ [مسند أبي يعلى الموصلي/مُسْنَدُ عَائِشَةَ/حدیث: 4623]

سیدہ عائشہ رضی اللہ عنہا سے روایت ہے کہ انہوں نے فرمایا: ”نبی کریم صلی اللہ علیہ وسلم فجر (کی فرض نماز) سے پہلے دو رکعتیں ادا فرماتے تھے اور ان دونوں کو اتنا مختصر کرتے تھے کہ میں گمان کرتی کہ شاید آپ صلی اللہ علیہ وسلم نے ان میں سورہ فاتحہ کے سوا کچھ نہیں پڑھا، یا (ان کے حد درجہ مختصر ہونے کی وجہ سے یہ خیال گزرتا کہ) کیا آپ صلی اللہ علیہ وسلم نے سورہ فاتحہ پڑھی بھی ہے یا نہیں۔“ [مسند أبي يعلى الموصلي/مُسْنَدُ عَائِشَةَ/حدیث: 4624]

بہیہ (رحمہا اللہ) سے روایت ہے کہ انہوں نے ایک خاتون کو سیدہ عائشہ (رضی اللہ عنہا) سے ایسی عورت کے متعلق سوال کرتے ہوئے سنا جس کا حیض فاسد (غیر منظم) ہو گیا تھا اور اسے معلوم نہیں ہو رہا تھا کہ وہ نماز کیسے پڑھے، تو سیدہ عائشہ (رضی اللہ عنہا) نے اس سے فرمایا کہ "میں نے رسول اللہ صلی اللہ علیہ وسلم سے ایسی عورت کے بارے میں دریافت کیا تھا جس کا حیض فاسد ہو گیا ہو اور اسے بکثرت خون بہہ رہا ہو جس کی وجہ سے اسے نماز کی صورت سمجھ نہ آ رہی ہو، تو رسول اللہ صلی اللہ علیہ وسلم نے مجھے حکم دیا تھا کہ میں اسے کہوں کہ ”وہ اس مدت کو دیکھے جو ہر مہینے باقاعدگی کی صورت میں اس کے حیض کی ہوتی تھی، پس وہ اسی کے بقدر دن اور راتیں (نماز سے) رکی رہے اور ان کا اندازہ کرے، پھر (وہ مدت گزرنے پر) طہارت کے لیے غسل کرے، پھر کپڑے کا لنگوٹ باندھ لے اور نماز پڑھے، کیونکہ مجھے امید ہے کہ یہ اثر شیطان کی طرف سے ہے اور ان شاء اللہ، اللہ تعالیٰ اسے اس سے دور فرما دے گا“۔" سیدہ عائشہ (رضی اللہ عنہا) فرماتی ہیں: "چنانچہ میں نے اس خاتون کو اسی کا حکم دیا تو اللہ نے اس کی وہ بیماری دور کر دی، لہٰذا تم بھی اپنی سہیلی کو اسی بات کی ہدایت کرو۔" [مسند أبي يعلى الموصلي/مُسْنَدُ عَائِشَةَ/حدیث: 4625]

سیدہ عائشہ رضی اللہ عنہا سے روایت ہے کہ انہوں نے فرمایا: ”مجھے نو ایسی خصلتیں عطا کی گئی ہیں جو مریم بنت عمران کے سوا کسی عورت کو نہیں دی گئیں: جبریل علیہ السلام میری صورت اپنی ہتھیلی میں لے کر نازل ہوئے یہاں تک کہ انہوں نے رسول اللہ صلی اللہ علیہ وسلم کو مجھ سے نکاح کرنے کا حکم دیا، آپ صلی اللہ علیہ وسلم نے میرے سوا کسی کنواری خاتون سے نکاح نہیں فرمایا، آپ صلی اللہ علیہ وسلم کی روحِ مبارک اس وقت قبض ہوئی جب آپ صلی اللہ علیہ وسلم کا سرِ مبارک میری گود میں تھا، میں نے آپ صلی اللہ علیہ وسلم کو اپنے ہی گھر میں سپردِ خاک کیا، فرشتوں نے میرے گھر کو ڈھانپ لیا، اور بے شک وحی آپ صلی اللہ علیہ وسلم پر اس حال میں بھی نازل ہوتی تھی جب آپ صلی اللہ علیہ وسلم اپنی دیگر ازواج کے پاس ہوتے تو وہ آپ صلی اللہ علیہ وسلم سے جدا ہو جاتیں لیکن جب میں آپ صلی اللہ علیہ وسلم کے ساتھ ایک ہی لحاف میں ہوتی تب بھی وحی نازل ہوتی تھی، میں آپ صلی اللہ علیہ وسلم کے خلیفہ اور آپ صلی اللہ علیہ وسلم کے صدیق کی صاحبزادی ہوں، میری براءت کا حکم آسمان سے نازل ہوا، میں پاکیزہ پیدا کی گئی اور ایک پاکیزہ ہستی کے پاس رہی، اور مجھ سے ﴿مَغْفِرَةٌ وَرِزْقٌ كَرِيمٌ﴾ ”مغفرت اور باعزت رزق“ کا وعدہ کیا گیا ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4626]