عائشہ بنت طلحہ رحمہ اللہ سیدہ عائشہ ام المومنین رضی اللہ عنہا سے روایت کرتی ہیں کہ انہوں نے رسول اللہ صلی اللہ علیہ وسلم کی بارگاہ میں عرض کیا کہ ”میں جہاد کو تمام اعمال میں سب سے برتر پاتی ہوں، تو کیا ہم (خواتین) جہاد نہ کریں؟“ تو آپ صلی اللہ علیہ وسلم نے ارشاد فرمایا: ”تمہارے لیے بہترین جہاد حجِ مبرور (یعنی وہ حج جو بارگاہِ الٰہی میں مقبول ہو) ہے“۔ [مسند أبي يعلى الموصلي/مُسْنَدُ عَائِشَةَ/حدیث: 4717]

اسود رحمہ اللہ سے روایت ہے کہ انہوں نے سیدہ عائشہ رضی اللہ عنہا سے روزے دار کے لیے اپنی اہلیہ سے بوس و کنار (مباشرت) کرنے کے متعلق دریافت کیا تو انہوں نے اسے ناپسند فرمایا، میں نے ان سے عرض کیا کہ مجھے یہ خبر پہنچی ہے کہ رسول اللہ صلی اللہ علیہ وسلم بحالتِ روزہ مباشرت فرما لیا کرتے تھے؟ تو انہوں نے ارشاد فرمایا کہ ”بے شک رسول اللہ صلی اللہ علیہ وسلم «أَمْلَكَ لِإِرْبِهِ مِنَ النَّاسِ أَجْمَعِينَ» ”تمام لوگوں کے مقابلے میں اپنی حاجت اور نفسانی خواہش پر سب سے زیادہ قابو رکھنے والے تھے“۔“ [مسند أبي يعلى الموصلي/مُسْنَدُ عَائِشَةَ/حدیث: 4718]

سیدہ عائشہ رضی اللہ عنہا سے روایت ہے کہ انہوں نے فرمایا: ”ہم رسول اللہ صلی اللہ علیہ وسلم کے ہمراہ (مدینہ منورہ سے) نکلے اور ہمارا مقصد صرف حج کی ادائیگی ہی تھا، پھر جب ہم مقامِ سرف پر پہنچے یا اس کے قریب تھے تو مجھے حیض آگیا، چنانچہ رسول اللہ صلی اللہ علیہ وسلم میرے پاس تشریف لائے تو میں (اس غم میں) رو رہی تھی، آپ صلی اللہ علیہ وسلم نے دریافت فرمایا: «مَا لَكِ أَنَفِسْتِ؟» ”تمہیں کیا ہوا؟ کیا تمہیں حیض آگیا ہے؟“ میں نے عرض کی: جی ہاں! آپ صلی اللہ علیہ وسلم نے فرمایا: ”بے شک یہ ایک ایسا معاملہ ہے جسے اللہ تعالیٰ نے آدم کی بیٹیوں کے مقدر میں لکھ دیا ہے، لہٰذا تم وہی تمام مناسک ادا کرو جو ایک حاجی کرتا ہے، سوائے اس کے کہ تم بیت اللہ کا طواف اس وقت تک نہ کرنا جب تک تم غسل کر کے پاک نہ ہو جاؤ۔“ پھر جب ہم مقامِ منیٰ میں موجود تھے تو رسول اللہ صلی اللہ علیہ وسلم نے اپنی ازواجِ مطہرات کی طرف سے گائے کی قربانی فرمائی۔“ [مسند أبي يعلى الموصلي/مُسْنَدُ عَائِشَةَ/حدیث: 4719]

عبداللہ بن ابی الہذیل رحمہ اللہ بیان کرتے ہیں کہ صحابہ کرام رضی اللہ عنہم اس بات کو پسند فرماتے تھے کہ جب آدمی نماز مکمل کر چکے تو یہ کہے: «اللَّهُمَّ أَنْتَ السَّلَامُ وَمِنْكَ السَّلَامُ. تَبَارَكْتَ يَا ذَا الْجِلَالِ وَالْإِكْرَامِ» ”اے اللہ! تو ہی سراپا سلامتی ہے اور تیری ہی طرف سے سلامتی (نصیب ہوتی) ہے، اے صاحبِ جلال و عظمت اور بزرگی و احسان! تو نہایت بابرکت ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4720]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم یہ کلمات ارشاد فرمایا کرتے تھے: [مسند أبي يعلى الموصلي/مُسْنَدُ عَائِشَةَ/حدیث: 4721]

سیدہ عائشہ رضی اللہ عنہا سے روایت ہے کہ انہوں نے بیان فرمایا: ”میں نے رسول اللہ صلی اللہ علیہ وسلم کو کبھی بھی رات کی نماز (تہجد) کا کوئی حصہ بیٹھ کر ادا کرتے ہوئے نہیں دیکھا، یہاں تک کہ جب آپ صلی اللہ علیہ وسلم کبرِ سنی (بڑھاپے) کو پہنچ گئے تو آپ صلی اللہ علیہ وسلم بیٹھ کر نماز پڑھتے اور قرأت فرماتے، پھر جب سورت کی تیس یا چالیس آیات باقی رہ جاتیں تو آپ صلی اللہ علیہ وسلم کھڑے ہو کر بقیہ تلاوت فرماتے اور پھر رکوع فرماتے۔“ [مسند أبي يعلى الموصلي/مُسْنَدُ عَائِشَةَ/حدیث: 4722]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم ایک سفر سے واپس تشریف لائے اور میرے ہاں داخل ہوئے، اس وقت میں نے اپنے گھر کے ایک طاق یا اونچی جگہ پر ایک نقشین پردہ لٹکا رکھا تھا جس میں تصویریں بنی ہوئی تھیں، پس جب آپ صلی اللہ علیہ وسلم نے اسے دیکھا تو اسے اپنے دستِ مبارک سے کھینچ کر پھاڑ ڈالا اور ارشاد فرمایا: ”قیامت کے روز اللہ کے نزدیک لوگوں میں سب سے سخت عذاب ان کو ہوگا جو اللہ کی تخلیق کی مشابہت اختیار کرتے ہیں۔“ سیدہ عائشہ رضی اللہ عنہا بیان کرتی ہیں کہ پھر ہم نے اس کپڑے کو کاٹ کر اس سے ایک یا دو تکیے بنا لیے۔ [مسند أبي يعلى الموصلي/مُسْنَدُ عَائِشَةَ/حدیث: 4723]

ام موسیٰ رحمہا اللہ سے روایت ہے، وہ بیان کرتی ہیں کہ ”میں نے سیدنا علی بن ابی طالب رضی اللہ عنہ کو دیکھا کہ وہ عصر کی نماز کے بعد نماز ادا کر رہے تھے“۔ [مسند أبي يعلى الموصلي/مُسْنَدُ عَائِشَةَ/حدیث: 4724]

ام موسیٰ رحمہا اللہ بیان کرتی ہیں کہ ناجیہ بنت قرظہ نے انہیں سیدہ عائشہ رضی اللہ عنہا کی خدمت میں عصر کے بعد نماز کے بارے میں دریافت کرنے کے لیے بھیجا، وہ کہتی ہیں کہ میں ان کی خدمت میں حاضر ہوئی اور مجھے اس بات کی قطعاً پرواہ نہ تھی کہ وہ کیا فرماتی ہیں کیونکہ میں سیدنا علی رضی اللہ عنہ کو بھی (عصر کے بعد نماز پڑھتے ہوئے) دیکھ چکی تھی، تو سیدہ عائشہ رضی اللہ عنہا نے بتایا کہ ”رسول اللہ صلی اللہ علیہ وسلم عصر کے بعد نماز ادا فرمایا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4725]

سیدہ عائشہ رضی اللہ عنہا سے روایت ہے کہ انہوں نے فرمایا: ”میں اور نبی کریم صلی اللہ علیہ وسلم (ایک ہی برتن سے) غسل کر لیا کرتے تھے، ہم دونوں اسی برتن سے چلو بھر بھر کر پانی لیتے تھے جبکہ ہم دونوں حالتِ جنابت میں ہوتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4726]