سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم (مدینہ منورہ کے گرد و نواح میں واقع) ان برساتی نالوں اور نشیبی راستوں کی جانب صحرائی علاقے کی طرف تشریف لے جایا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4747]

سیدہ عائشہ رضی اللہ عنہا سے روایت ہے کہ انہوں نے بیان فرمایا: ”ایک رات میں نے نبی کریم صلی اللہ علیہ وسلم کو (بستر پر) موجود نہ پایا، (تلاش کیا تو) دیکھا کہ آپ صلی اللہ علیہ وسلم جنت البقیع میں تشریف فرما تھے، آپ صلی اللہ علیہ وسلم نے وہاں یہ دعا فرمائی: «سَلَامٌ عَلَيْكُمْ دَارَ قَوْمٍ مُؤْمِنِينَ، أَنْتُمْ لَنَا فَرَطٌ، وَإِنَّا بِكُمْ لَاحِقُونَ، اللَّهُمَّ لَا تَحْرِمْنَا أَجْرَهُمْ وَلَا تَفْتِنَّا بَعْدَهُمْ» ”سلامتی ہو تم پر اے ایمان والی قوم کے گھر والو! تم ہمارے لیے پیش رو ہو اور ہم بھی یقیناً تمہارے ساتھ آ ملنے والے ہیں۔ اے اللہ! ہمیں ان کے اجر سے محروم نہ فرما اور ان کے بعد ہمیں کسی فتنے میں مبتلا نہ کرنا۔““ [مسند أبي يعلى الموصلي/مُسْنَدُ عَائِشَةَ/حدیث: 4748]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”ولی کی سرپرستی کے بغیر نکاح (منعقد) نہیں ہوتا، اور جس کا کوئی ولی نہ ہو، سلطان (حاکمِ وقت) اس کا ولی ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4749]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”کسی عورت کا نکاح اس کے ولی کی اجازت کے بغیر نہیں کیا جائے گا؛ پس اگر اس نے (ولی کی اجازت کے بغیر) نکاح کر لیا تو اس کا نکاح باطل ہے، اور اگر مرد نے اس سے ہم بستری کر لی ہو تو اس قربت کے عوض وہ عورت مہر کی حقدار ہو گی، اور اگر اولیاء کے درمیان (نکاح کے معاملے میں) باہم اختلاف یا نزاع پیدا ہو جائے تو پھر حاکمِ وقت اس کا ولی ہے جس کا کوئی شرعی ولی نہ ہو۔“ [مسند أبي يعلى الموصلي/مُسْنَدُ عَائِشَةَ/حدیث: 4750]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم ”شعبان اور رمضان کے روزے رکھا کرتے تھے اور آپ صلی اللہ علیہ وسلم پیر اور جمعرات کے دن روزہ رکھنے کا خاص طور پر اہتمام فرمایا کرتے تھے“۔ [مسند أبي يعلى الموصلي/مُسْنَدُ عَائِشَةَ/حدیث: 4751]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم ”وتر (کی نماز) ایک رکعت کے ساتھ ادا فرمایا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4752]

سیدہ عائشہ رضی اللہ عنہا سے مروی ہے کہ ان سے بالوں میں پیوند لگانے والی (مصنوعی بال لگانے والی) عورت کے متعلق دریافت کیا گیا تو انہوں نے فرمایا کہ ”رسول اللہ صلی اللہ علیہ وسلم نے بالوں میں جوڑ لگانے والی اور لگوانے والی، دونوں عورتوں پر لعنت فرمائی ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4753]

سیدہ عائشہ رضی اللہ عنہا سے روایت ہے کہ سیدہ ہند بنت عتبہ بن ربیعہ رضی اللہ عنہا رسول اللہ صلی اللہ علیہ وسلم کی خدمت میں بیعت کرنے کے لیے حاضر ہوئیں، آپ صلی اللہ علیہ وسلم نے ان کے ہاتھوں کی طرف دیکھا تو (ان پر مہندی وغیرہ کا اثر نہ پا کر) فرمایا: ”جاؤ اور اپنے ہاتھوں کی حالت (رنگت) تبدیل کرو۔“ چنانچہ وہ گئیں اور مہندی لگا کر ان کی رنگت بدل لی، پھر دوبارہ رسول اللہ صلی اللہ علیہ وسلم کی خدمت میں حاضر ہوئیں تو آپ صلی اللہ علیہ وسلم نے فرمایا: ”میں تم سے اس بات پر بیعت لیتا ہوں کہ تم اللہ کے ساتھ کسی کو شریک نہیں ٹھہراؤ گی، چوری نہیں کرو گی اور نہ ہی بدکاری کرو گی۔“ انہوں نے (حیرت سے) عرض کیا: ”کیا کوئی آزاد عورت بھی بدکاری کر سکتی ہے؟“ آپ صلی اللہ علیہ وسلم نے فرمایا: ”اور اپنی اولاد کو ﴿خَشْيَةَ إِمْلَاقٍ﴾ ”تنگدستی کے خوف سے“ قتل نہ کرنا۔“ انہوں نے عرض کیا: ”کیا آپ نے ہمارے لیے کوئی اولاد چھوڑی ہے جسے ہم قتل کریں؟“ (ان کا اشارہ جنگِ بدر میں اپنے مقتولین کی طرف تھا)، راوی کا بیان ہے کہ پھر انہوں نے آپ صلی اللہ علیہ وسلم سے بیعت کر لی، اس دوران انہوں نے سونے کے دو کنگن پہن رکھے تھے، انہوں نے دریافت کیا کہ ان دونوں کنگنوں کے بارے میں آپ کیا فرماتے ہیں؟ آپ صلی اللہ علیہ وسلم نے ارشاد فرمایا: ”یہ جہنم کے انگاروں میں سے دو انگارے ہیں۔“ [مسند أبي يعلى الموصلي/مُسْنَدُ عَائِشَةَ/حدیث: 4754]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”جو شخص قرآنِ کریم کو خوش الحانی کے ساتھ (سُر لگا کر) نہیں پڑھتا، وہ ہم میں سے نہیں ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4755]

سیدہ عائشہ رضی اللہ عنہا سے روایت ہے کہ انہوں نے اپنے دو ایسے مملوکوں کو آزاد کرنے کا ارادہ فرمایا جو آپس میں میاں بیوی تھے، پس انہوں نے اس بات کا تذکرہ نبی کریم صلی اللہ علیہ وسلم سے کیا تو آپ صلی اللہ علیہ وسلم نے ارشاد فرمایا: ”پہلے مرد سے آغاز کرو۔“ [مسند أبي يعلى الموصلي/مُسْنَدُ عَائِشَةَ/حدیث: 4756]