سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم جب وضو کرنے کے لیے کھڑے ہوتے تو (پانی انڈیلنے کی غرض سے) برتن کو ایک طرف جھکاتے، پھر اللہ کا نام لیتے «بِسْمِ اللّٰہِ» یعنی ”اللہ کے نام سے“، اور اس کے بعد خوب اچھی طرح کامل وضو فرماتے۔“ [مسند أبي يعلى الموصلي/مُسْنَدُ عَائِشَةَ/حدیث: 4687]

سیدہ عائشہ رضی اللہ عنہا سے روایت ہے کہ انہوں نے فرمایا: ”میں نے رسول اللہ صلی اللہ علیہ وسلم کو اس حالت میں دیکھا جب آپ صلی اللہ علیہ وسلم کا وقتِ وصال قریب تھا، آپ صلی اللہ علیہ وسلم کے پاس پانی کا ایک پیالہ رکھا ہوا تھا، آپ صلی اللہ علیہ وسلم اپنا دستِ مبارک اس میں ڈالتے اور اسے اپنے چہرہِ انور پر ملتے تھے، پھر آپ صلی اللہ علیہ وسلم یہ التجا فرما رہے تھے: «اللَّهُمَّ أَعِنِّي عَلَى سَكَرَاتِ الْمَوْتِ» ”اے اللہ! موت کی سختیوں اور اس کی غشیوں پر میری مدد فرما۔““ [مسند أبي يعلى الموصلي/مُسْنَدُ عَائِشَةَ/حدیث: 4688]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے اپنے صحابہ کرام رضی اللہ عنہم سے دریافت فرمایا: ”کیا تم جانتے ہو کہ اللہ کے نزدیک بدترین زنا کیا ہے؟“ صحابہ کرام رضی اللہ عنہم نے عرض کیا کہ اللہ اور اس کا رسول صلی اللہ علیہ وسلم ہی بہتر جانتے ہیں، تو آپ صلی اللہ علیہ وسلم نے ارشاد فرمایا: ”اللہ کے نزدیک سب سے سنگین زنا کسی مسلمان کی عزت و آبرو کو (پامال کرنا یا اسے) حلال سمجھ لینا ہے،“ پھر آپ صلی اللہ علیہ وسلم نے یہ آیت مبارکہ تلاوت فرمائی: ﴿اور جو لوگ مومن مردوں اور مومن عورتوں کو بغیر کسی ایسے گناہ کے جو انہوں نے کیا ہو، اذیت دیتے ہیں﴾ ۔ [مسند أبي يعلى الموصلي/مُسْنَدُ عَائِشَةَ/حدیث: 4689]

عروہ رحمہ اللہ سیدہ عائشہ رضی اللہ عنہا سے روایت کرتے ہیں کہ رسول اللہ صلی اللہ علیہ وسلم یہ دعا فرمایا کرتے تھے: ” «اللَّهُمَّ عَافِنِي فِي جَسَدِي، وَعَافِنِي فِي بَصَرِي وَاجْعَلْهُ الْوَارِثَ مِنِّي. لَا إِلَهَ إِلَّا اللَّهُ الْحَلِيمُ الْكَرِيمُ سُبْحَانَ اللَّهِ رَبِّ الْعَرْشِ الْعَظِيمِ، الْحَمْدُ لِلَّهِ رَبِّ الْعَالَمِينَ» اے اللہ! مجھے میرے بدن میں عافیت عطا فرما، اور مجھے میری بینائی میں عافیت بخش اور اسے میرا وارث بنا (یعنی تا دمِ مرگ اسے سلامت رکھ)؛ اللہ کے سوا کوئی معبودِ برحق نہیں جو نہایت بردبار اور بہت کرم فرمانے والا ہے، پاک ہے وہ اللہ جو عرشِ عظیم کا رب ہے، اور تمام تعریفیں اللہ ہی کے لیے ہیں جو تمام جہانوں کا پروردگار ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4690]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: «صَلَاةٌ فِي مَسْجِدِي خَيْرٌ مِنْ أَلْفِ صَلَاةٍ فِيمَا سِوَاهُ» ”میری اس مسجد میں ایک نماز ادا کرنا، اس کے علاوہ دیگر مساجد میں ادا کی جانے والی ایک ہزار نمازوں سے بہتر ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4691]

سیدہ عائشہ رضی اللہ عنہا اور سیدنا ابن عباس رضی اللہ عنہما سے روایت ہے کہ نبی اکرم صلی اللہ علیہ وسلم نے ارشاد فرمایا: ”ولی (سرپرست) کے بغیر نکاح (منعقد) نہیں ہوتا“ اور عروہ رحمہ اللہ کی (سیدہ عائشہ رضی اللہ عنہا سے مروی) روایت میں یہ اضافہ بھی ہے کہ: ”جس کا کوئی ولی نہ ہو، اس کا ولی حاکمِ وقت ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4692]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے اس امت کے آخری زمانے میں زمین میں دھنسائے جانے، صورتیں مسخ ہونے اور آسمانی پتھراؤ کا تذکرہ فرمایا، تو میں نے عرض کی: ”اے اللہ کے رسول صلی اللہ علیہ وسلم ! کیا ہمیں اس حال میں ہلاک کر دیا جائے گا جبکہ ہمارے درمیان نیک و صالح لوگ بھی موجود ہوں گے؟“ تو آپ صلی اللہ علیہ وسلم نے ارشاد فرمایا: ”ہاں، جب خباثت (گناہ اور بدکاری) غالب آ جائے گی۔“ [مسند أبي يعلى الموصلي/مُسْنَدُ عَائِشَةَ/حدیث: 4693]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم سے ایسے شخص کے بارے میں پوچھا گیا جو خواب میں احتلام دیکھے لیکن بیدار ہونے پر تری نہ پائے۔ آپ صلی اللہ علیہ وسلم نے فرمایا: ”اس پر غسل نہیں۔“ سیدہ ام سلیم رضی اللہ عنہا نے عرض کیا: اللہ کے رسول! اگر عورت ایسا دیکھے؟ آپ صلی اللہ علیہ وسلم نے فرمایا: ”عورتیں مردوں ہی کی مانند ہیں۔“ [مسند أبي يعلى الموصلي/مُسْنَدُ عَائِشَةَ/حدیث: 4694]

سیدنا ابوہریرہ اور سیدہ عائشہ رضی اللہ عنہما سے روایت ہے کہ نبی اکرم صلی اللہ علیہ وسلم نے ” «تَوَضَّأَ ثَلَاثًا ثَلَاثًا» “ یعنی (اعضائے وضو کو) تین تین بار دھو کر وضو فرمایا۔ [مسند أبي يعلى الموصلي/مُسْنَدُ عَائِشَةَ/حدیث: 4695]

سفیان رحمہ اللہ بیان کرتے ہیں کہ میں نے عبد الرحمن بن القاسم رحمہ اللہ سے دریافت کیا کہ کیا آپ نے اپنے والد (القاسم بن محمد رحمہ اللہ) کو سیدہ عائشہ رضی اللہ عنہا کے حوالے سے یہ خبر دیتے ہوئے سنا ہے کہ نبی کریم صلی اللہ علیہ وسلم ”روزے کی حالت میں بوسہ لیا کرتے تھے؟“ تو وہ کچھ دیر مجھ سے خاموش رہے، پھر مجھ سے فرمایا: ”جی ہاں“، گویا انہوں نے (اس نوعیت کا مسئلہ بتانے کے لیے) مجھے اس وقت کم عمر خیال کیا تھا۔ [مسند أبي يعلى الموصلي/مُسْنَدُ عَائِشَةَ/حدیث: 4696]