سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے اپنی علالت کے دوران لوگوں کو بیٹھ کر نماز پڑھائی تو وہ سب کھڑے ہو گئے، جس پر آپ صلی اللہ علیہ وسلم نے انہیں بیٹھنے کا اشارہ فرمایا تو وہ بیٹھ گئے، پھر آپ صلی اللہ علیہ وسلم نے ارشاد فرمایا: ”امام تو بنایا ہی اس لیے جاتا ہے کہ اس کی اقتدا کی جائے، لہٰذا جب وہ رکوع کرے تو تم بھی رکوع کرو، جب وہ سجدہ کرے تو تم بھی سجدہ کرو اور جب وہ بیٹھ کر نماز پڑھے تو تم سب بھی بیٹھ کر ہی نماز پڑھو۔“ [مسند أبي يعلى الموصلي/مُسْنَدُ عَائِشَةَ/حدیث: 4807]

سیدہ عائشہ رضی اللہ عنہا سے روایت ہے کہ ”سیدہ سودہ رضی اللہ عنہا ایک بھاری بھرکم اور سست رفتار خاتون تھیں، انہوں نے رسول اللہ صلی اللہ علیہ وسلم سے اجازت چاہی کہ وہ رات ہی کو مزدلفہ سے (منیٰ کی طرف) روانہ ہو جائیں، تو آپ صلی اللہ علیہ وسلم نے انہیں اجازت عطا فرما دی،“ سیدہ عائشہ رضی اللہ عنہا فرماتی ہیں: ”کاش میں نے بھی رسول اللہ صلی اللہ علیہ وسلم سے اسی طرح اجازت طلب کر لی ہوتی جیسے سیدہ سودہ رضی اللہ عنہا نے مانگی تھی۔“ ایوب رحمہ اللہ بیان کرتے ہیں کہ سیدہ عائشہ رضی اللہ عنہا (خود اپنی باری پر) امام کے روانہ ہونے سے پہلے وہاں سے نہیں لوٹا کرتی تھیں۔ [مسند أبي يعلى الموصلي/مُسْنَدُ عَائِشَةَ/حدیث: 4808]

سیدہ عائشہ رضی اللہ عنہا سے روایت ہے کہ ایک شخص رسول اللہ صلی اللہ علیہ وسلم کی خدمتِ اقدس میں حاضر ہوا اور عرض کی: ”اے اللہ کے رسول! میں تو جل گیا (یعنی ہلاک ہوگیا)“، آپ صلی اللہ علیہ وسلم نے دریافت فرمایا: ”اسے کیا ہوا ہے؟“ اس نے عرض کی: ”میں نے رمضان میں روزہ توڑ دیا ہے“، پھر وہ شخص وہیں بیٹھ گیا، اسی دوران رسول اللہ صلی اللہ علیہ وسلم کی خدمت میں ایک بڑا ٹوکرہ لایا گیا جسے ’عرق‘ کہا جاتا ہے اور اس میں کھجوریں تھیں، آپ صلی اللہ علیہ وسلم نے دریافت فرمایا: ”وہ جلنے والا شخص کہاں ہے؟“ وہ شخص کھڑا ہوا تو آپ صلی اللہ علیہ وسلم نے ارشاد فرمایا: ”اسے (اپنی طرف سے) صدقہ کر دو“۔ [مسند أبي يعلى الموصلي/مُسْنَدُ عَائِشَةَ/حدیث: 4809]

سیدہ عائشہ رضی اللہ عنہا سے روایت ہے کہ انہوں نے بیان فرمایا: ”نبی کریم صلی اللہ علیہ وسلم ہم میں سے کسی کو بھی ایامِ حیض کے دوران یہ حکم دیتے تھے کہ وہ تہبند (کمر سے نیچے کا لباس) اچھی طرح باندھ لے، پھر آپ صلی اللہ علیہ وسلم اس کے ساتھ (بغیر جماع کے) مباشرت فرمایا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4810]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم جب کسی مریض کے پاس تشریف لے جاتے یا آپ صلی اللہ علیہ وسلم کے پاس کوئی بیمار لایا جاتا تو آپ صلی اللہ علیہ وسلم یہ دعا فرماتے: «أَذْهِبِ الْبَأْسَ رَبَّ النَّاسِ، وَاشْفِ أَنْتَ الشَّافِي، شِفَاءً لَا يُغَادِرُ سَقَمًا» ”اے لوگوں کے پروردگار! اس تکلیف کو دور فرما دے اور شفا عطا کر، تو ہی شفا دینے والا ہے، ایسی کامل شفا عطا فرما جو کسی بیماری کو باقی نہ چھوڑے۔“ [مسند أبي يعلى الموصلي/مُسْنَدُ عَائِشَةَ/حدیث: 4811]

سیدنا عبد اللہ بن زبیر رضی اللہ عنہما سیدہ عائشہ رضی اللہ عنہا سے روایت کرتے ہیں کہ رسول اللہ صلی اللہ علیہ وسلم نے ارشاد فرمایا: ”ایک یا دو مرتبہ دودھ پی لینا (حرمتِ رضاعت کو) ثابت نہیں کرتا۔“ [مسند أبي يعلى الموصلي/مُسْنَدُ عَائِشَةَ/حدیث: 4812]

سیدہ عائشہ رضی اللہ عنہا سے روایت ہے کہ نبی اکرم صلی اللہ علیہ وسلم نے لفظِ عسیلہ (شہد کی معمولی مٹھاس) سے مراد ”نکاح (یعنی جماع و صحبت کی لذت)“ لی ہے۔ [مسند أبي يعلى الموصلي/مُسْنَدُ عَائِشَةَ/حدیث: 4813]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”ایک یا دو مرتبہ دودھ پی لینا (حرمتِ رضاعت کو) ثابت نہیں کرتا۔“ [مسند أبي يعلى الموصلي/مُسْنَدُ عَائِشَةَ/حدیث: 4814]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم اپنے گھر میں لیٹے ہوئے تھے اور آپ صلی اللہ علیہ وسلم کی رانیں مبارک - یا پنڈلیاں - کھلی ہوئی تھیں، اسی اثنا میں سیدنا ابو بکر رضی اللہ عنہ نے حاضر ہونے کی اجازت طلب کی تو آپ صلی اللہ علیہ وسلم نے انہیں اسی حالت میں اجازت دے دی اور انہوں نے گفتگو کی، پھر سیدنا عمر رضی اللہ عنہ نے اجازت مانگی تو آپ صلی اللہ علیہ وسلم نے انہیں بھی اسی حالت میں اجازت عطا فرمائی اور انہوں نے بھی بات چیت کی، پھر سیدنا عثمان رضی اللہ عنہ نے اجازت طلب کی تو رسول اللہ صلی اللہ علیہ وسلم اٹھ کر بیٹھ گئے اور اپنے لباس کو درست فرما لیا - راویِ حدیث محمد بن ابی حرملہ رحمہ اللہ کہتے ہیں کہ میں یہ نہیں کہتا کہ یہ تمام واقعات ایک ہی دن میں پیش آئے - پھر وہ داخل ہوئے اور گفتگو کی۔ جب وہ تشریف لے گئے تو سیدہ عائشہ رضی اللہ عنہا نے عرض کی: یا رسول اللہ! سیدنا ابو بکر رضی اللہ عنہ آئے تو آپ نہ بیٹھے اور نہ ہی ان کی کوئی خاص پروا کی، پھر سیدنا عمر رضی اللہ عنہ آئے تو آپ نے ان کے لیے بھی کوئی اہتمام نہ فرمایا، لیکن جب سیدنا عثمان رضی اللہ عنہ آئے تو آپ اٹھ کر بیٹھ گئے اور اپنے کپڑے درست کر لیے؟ تو آپ صلی اللہ علیہ وسلم نے ارشاد فرمایا: ”کیا میں اس شخص سے حیا نہ کروں جس سے فرشتے بھی حیا کرتے ہیں؟“۔ [مسند أبي يعلى الموصلي/مُسْنَدُ عَائِشَةَ/حدیث: 4815]

ابو سلمہ رحمہ اللہ سے روایت ہے کہ انہوں نے سیدہ عائشہ رضی اللہ عنہا سے ان دو رکعتوں کے متعلق دریافت کیا جو رسول اللہ صلی اللہ علیہ وسلم عصر کے بعد پڑھا کرتے تھے، تو انہوں نے جواب دیا: ”آپ صلی اللہ علیہ وسلم یہ نماز (پہلے سے) پڑھا کرتے تھے، پھر ایک مرتبہ ایسا ہوا کہ آپ صلی اللہ علیہ وسلم کسی کام میں مشغول ہو گئے یا وہ آپ صلی اللہ علیہ وسلم کے ذہن مبارک سے نکل گئی، چنانچہ آپ صلی اللہ علیہ وسلم نے وہ دو رکعتیں عصر کے بعد ادا کیں اور پھر انہیں (اپنے معمول میں) پختہ کر لیا، اور آپ صلی اللہ علیہ وسلم کا دستور تھا کہ جب کوئی نماز پڑھتے تو اسے برقرار رکھتے تھے“؛ امام ابو زکریا رحمہ اللہ بیان کرتے ہیں کہ اسماعیل رحمہ اللہ نے کہا کہ ”لفظ ’أَثْبَتَهَا‘ سے مراد یہ ہے کہ آپ صلی اللہ علیہ وسلم اس پر مداومت اور ہمیشگی اختیار فرماتے تھے“۔ [مسند أبي يعلى الموصلي/مُسْنَدُ عَائِشَةَ/حدیث: 4816]