سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم کی خدمتِ اقدس میں ہرن کا خشک کیا ہوا گوشت بطور ہدیہ پیش کیا گیا جبکہ آپ صلی اللہ علیہ وسلم حالتِ احرام میں تھے، تو آپ صلی اللہ علیہ وسلم نے اسے واپس لوٹا دیا اور اسے تناول نہیں فرمایا۔“ [مسند أبي يعلى الموصلي/مُسْنَدُ عَائِشَةَ/حدیث: 4827]

سیدہ عائشہ رضی اللہ عنہا سے روایت ہے کہ ”نبی کریم صلی اللہ علیہ وسلم کو تین سحولی (یمنی سفید سوتی) کپڑوں میں کفن دیا گیا، آپ صلی اللہ علیہ وسلم کے لیے لحد (بغلی قبر) تیار کی گئی اور آپ صلی اللہ علیہ وسلم پر کچی اینٹیں باقاعدہ طور پر کھڑی کر کے لگائی گئیں۔“ [مسند أبي يعلى الموصلي/مُسْنَدُ عَائِشَةَ/حدیث: 4828]

سیدہ عائشہ رضی اللہ عنہا سے روایت ہے کہ انہوں نے بیان فرمایا: ”میں نے رسول اللہ صلی اللہ علیہ وسلم کو دیکھا کہ آپ مجھے اپنی چادر سے ڈھانپ رہے تھے اور میں حبشیوں کو کھیلتا ہوا دیکھ رہی تھی، میں اس وقت ایک کم سن لڑکی تھی، پس تم خود ایک ایسی نوعمر لڑکی کی قدر و منزلت اور شوق کا اندازہ کر لو جو کھیل کود کی دلدادہ ہو“؛ نیز انہوں نے فرمایا کہ ”وہ عید کا دن تھا اور سوڈانی لوگ ڈھالوں اور برچھوں کے ساتھ کھیل رہے تھے، تو یا تو میں نے رسول اللہ صلی اللہ علیہ وسلم سے (دیکھنے کی) درخواست کی یا خود آپ صلی اللہ علیہ وسلم نے ہی دریافت فرمایا: ”کیا تم دیکھنا چاہتی ہو؟“ میں نے عرض کیا: جی ہاں! تو آپ صلی اللہ علیہ وسلم نے مجھے اپنے پیچھے اس طرح کھڑا کر لیا کہ میرا رخسار آپ صلی اللہ علیہ وسلم کے رخسارِ مبارک پر تھا اور آپ صلی اللہ علیہ وسلم فرما رہے تھے: ”اے بنو ارفدہ! اپنا کھیل جاری رکھو“، یہاں تک کہ جب میں اکتا گئی تو آپ صلی اللہ علیہ وسلم نے دریافت فرمایا: ”کیا تمہارے لیے اتنا کافی ہے؟“ میں نے عرض کیا: جی ہاں! تو آپ صلی اللہ علیہ وسلم نے فرمایا: ”تو پھر تم جا سکتی ہو۔““ [مسند أبي يعلى الموصلي/مُسْنَدُ عَائِشَةَ/حدیث: 4829]

سیدہ عائشہ رضی اللہ عنہا سے اسی طرح روایت ہے کہ نبی کریم صلی اللہ علیہ وسلم نے فرمایا: «حَسْبُكِ» ”کیا تمہارے لیے (دیکھنا) اتنا ہی کافی ہے؟“ تو میں نے عرض کی: اے اللہ کے رسول صلی اللہ علیہ وسلم ! ابھی جلدی نہ فرمائیے؛ سیدہ عائشہ رضی اللہ عنہا فرماتی ہیں کہ ”مجھے ان (کے کھیل) کو دیکھنے کا کوئی خاص شوق نہ تھا، بلکہ میں نے یہ پسند کیا کہ دوسری عورتوں تک آپ صلی اللہ علیہ وسلم کی (میرے ساتھ) اس شفقت اور آپ صلی اللہ علیہ وسلم کے ہاں میرے اس بلند مقام و مرتبے کی خبر پہنچ جائے۔“ [مسند أبي يعلى الموصلي/مُسْنَدُ عَائِشَةَ/حدیث: 4830]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم کی جب بھی میرے ہاں باری ہوتی تو آپ صلی اللہ علیہ وسلم رات کے آخری پہر بقیع کی طرف تشریف لے جاتے اور فرماتے: «السَّلَامُ عَلَيْكُمْ دَارَ قَوْمٍ مُؤْمِنِينَ وَأَتَاكُمْ مَا تُوعَدُونَ غَدًا مُؤَجَّلُونَ، وَإِنَّا إِنْ شَاءَ اللَّهُ بِكُمْ لَاحِقُونَ. اللَّهُمَّ اغْفِرْ لِأَهْلِ بَقِيعِ الْفَرْقَدِ» ”اے مومن قوم کے گھر والو! تم پر سلامتی ہو، تمہارے پاس وہ (موت) آ پہنچی ہے جس کا تم سے وعدہ کیا گیا تھا، تم کل (قیامت) تک کے لیے مؤخر کیے گئے ہو اور ہم بھی ان شاء اللہ یقیناً تمہارے ساتھ ملنے والے ہیں۔ اے اللہ! بقیعِ غرقد والوں کی مغفرت فرما۔““ [مسند أبي يعلى الموصلي/مُسْنَدُ عَائِشَةَ/حدیث: 4831]

سیدہ عائشہ رضی اللہ عنہا سے روایت ہے کہ ایک شخص نے نبی صلی اللہ علیہ وسلم سے اندر آنے کی اجازت طلب کی تو آپ صلی اللہ علیہ وسلم نے دریافت فرمایا: ”یہ کون ہے؟“ لوگوں نے بتایا کہ فلاں شخص ہے، تو آپ صلی اللہ علیہ وسلم نے فرمایا: ”یہ کتنا برا آدمی ہے اور اپنے قبیلے کا کتنا برا فرد ہے - یا جس طرح آپ صلی اللہ علیہ وسلم نے ارشاد فرمایا - اسے اندر آنے کی اجازت دے دو۔“ پھر جب وہ شخص آپ صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم اس کے ساتھ بڑی خندہ پیشانی اور نرمی سے پیش آئے، جس پر سیدہ عائشہ رضی اللہ عنہا نے عرض کیا کہ آپ نے تو اس کے متعلق پہلے یہ فرمایا تھا کہ یہ کتنا برا شخص اور اپنے قبیلے کا کتنا برا فرد ہے، پھر آپ خود ہی اس کے ساتھ اتنی خوش اخلاقی سے پیش آئے؟ تو آپ صلی اللہ علیہ وسلم نے ارشاد فرمایا: ”اے عائشہ! قیامت کے دن اللہ تعالیٰ کے نزدیک مرتبے کے اعتبار سے بدترین انسان وہ ہوگا جسے لوگ اس کی بدزبانی اور شر کے ڈر سے چھوڑ دیں۔“ [مسند أبي يعلى الموصلي/مُسْنَدُ عَائِشَةَ/حدیث: 4832]

سیدہ عائشہ رضی اللہ عنہا سے روایت ہے کہ انہوں نے فرمایا: ”میں نے رسول اللہ صلی اللہ علیہ وسلم کو ان کے احرام کے وقت خوشبو لگائی، چنانچہ میں نے تین دن گزرنے کے بعد بھی آپ صلی اللہ علیہ وسلم کے سرِ مبارک کی مانگ میں خوشبو کی چمک دیکھی جبکہ آپ صلی اللہ علیہ وسلم حالتِ احرام میں تھے“۔ [مسند أبي يعلى الموصلي/مُسْنَدُ عَائِشَةَ/حدیث: 4833]

سیدہ عائشہ رضی اللہ عنہا سے مروی ہے کہ رسول اللہ صلی اللہ علیہ وسلم ”غسل کر لینے کے بعد (پھر سے) وضو نہیں فرمایا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4834]

سیدہ عائشہ رضی اللہ عنہا سے روایت ہے کہ انہوں نے فرمایا: ”رسول اللہ صلی اللہ علیہ وسلم سحری کے اوقات میں جب کبھی میرے پاس ہوتے، تو میں نے آپ صلی اللہ علیہ وسلم کو ہمیشہ سوتے ہوئے ہی پایا۔“ [مسند أبي يعلى الموصلي/مُسْنَدُ عَائِشَةَ/حدیث: 4835]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے ارشاد فرمایا: ”چور کا ہاتھ چوتھائی دینار یا اس سے زائد (کی مالیت کی چوری) پر کاٹ دیا جائے گا“۔ [مسند أبي يعلى الموصلي/مُسْنَدُ عَائِشَةَ/حدیث: 4836]