سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نمازِ عشاء سے طلوعِ فجر تک گیارہ رکعتیں ادا فرماتے، ہر دو رکعت کے بعد سلام پھیرتے اور ایک رکعت وتر پڑھتے۔ آپ صلی اللہ علیہ وسلم سجدے میں اتنی دیر ٹھہرتے جتنی دیر میں تم میں سے کوئی پچاس آیات پڑھ لے۔ جب فجر کا پہلا مؤذن اذان دے کر خاموش ہوتا تو آپ صلی اللہ علیہ وسلم اٹھ کر دو ہلکی رکعتیں پڑھتے، پھر دائیں کروٹ لیٹ جاتے، یہاں تک کہ مؤذن آپ صلی اللہ علیہ وسلم کے پاس آتا۔ [مسند أبي يعلى الموصلي/مُسْنَدُ عَائِشَةَ/حدیث: 4787]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم رمضان کی ایک رات عشاء کے بعد مسجد کی طرف تشریف لے گئے اور وہاں نماز ادا فرمائی، تو لوگوں نے آپ صلی اللہ علیہ وسلم کو دیکھا اور آپ صلی اللہ علیہ وسلم کی اقتداء میں نماز پڑھی، جب دوسری رات ہوئی تو آپ صلی اللہ علیہ وسلم پھر تشریف لائے، لوگوں نے دیکھا تو وہ کثرت سے جمع ہو گئے، تکبیر کہی اور آپ صلی اللہ علیہ وسلم کے ساتھ نماز ادا کی، پھر جب تیسری رات آئی تو مسجد (لوگوں سے) بھر گئی مگر رسول اللہ صلی اللہ علیہ وسلم ان کے پاس باہر تشریف نہ لائے، چنانچہ لوگ آپ صلی اللہ علیہ وسلم کو متوجہ کرنے لگے تاکہ آپ صلی اللہ علیہ وسلم باہر تشریف لائیں، تو آپ صلی اللہ علیہ وسلم نے دریافت فرمایا: ”اے عائشہ! لوگوں کا کیا حال ہے؟“ میں نے عرض کیا: اے اللہ کے رسول صلی اللہ علیہ وسلم ! انہوں نے گزشتہ دو راتیں آپ کے ساتھ نماز پڑھی تھی، اس لیے وہ چاہتے ہیں کہ آپ صلی اللہ علیہ وسلم ان کی طرف باہر تشریف لائیں، پھر آپ صلی اللہ علیہ وسلم ان کی طرف تشریف لائے اور فرمایا: ”اے لوگو! تم اتنے ہی اعمال اختیار کرو جتنے کی تم میں استطاعت ہو، کیونکہ اللہ تعالیٰ نہیں اکتاتا یہاں تک کہ تم خود اکتا جاؤ، اور اللہ عزوجل کے ہاں پسندیدہ ترین عمل وہ ہے جس پر دوام اختیار کیا جائے اگرچہ وہ مقدار میں کم ہی کیوں نہ ہو۔ تم مسلسل اس (عمل) پر ڈٹے رہے یہاں تک کہ مجھے اندیشہ ہوا کہ کہیں یہ تم پر فرض نہ کر دیا جائے۔“ سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم کھڑے ہو کر گیارہ رکعات اور بیٹھ کر دو رکعات پڑھتے تھے، اور جب آپ صلی اللہ علیہ وسلم رکوع کا ارادہ فرماتے تو کھڑے ہو کر (کچھ) تلاوت کرتے پھر رکوع فرماتے، پھر ایک رکعت کے ساتھ وتر ادا کرتے تھے۔ ابو سلمہ رحمہ اللہ کہتے ہیں کہ میں نے (سیدہ عائشہ رضی اللہ عنہا سے) پوچھا: رمضان المبارک میں آپ صلی اللہ علیہ وسلم کی نماز کیسی ہوتی تھی؟ تو انہوں نے فرمایا: ”آپ صلی اللہ علیہ وسلم رمضان کے مہینے میں بھی ان (رکعات) سے زیادہ نہیں پڑھتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4788]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم نے ریشم اور سونا پہننے، چاندی کے برتنوں میں پینے اور سرخ زین پوش کے استعمال سے منع فرمایا۔“ سیدہ عائشہ رضی اللہ عنہا بیان کرتی ہیں کہ میں نے عرض کی: اے اللہ کے رسول صلی اللہ علیہ وسلم ! سونے کی کوئی نہایت معمولی سی چیز جس سے کنگن کو جوڑا یا باندھا جاتا ہو (کیا وہ استعمال کی جا سکتی ہے)؟ تو آپ صلی اللہ علیہ وسلم نے ارشاد فرمایا: ”تم اسے چاندی کا بنا لیا کرو اور تھوڑی سی زعفران مل کر اسے زرد رنگ کا کر لیا کرو۔“ [مسند أبي يعلى الموصلي/مُسْنَدُ عَائِشَةَ/حدیث: 4789]

سیدہ عائشہ رضی اللہ عنہا سے روایت ہے کہ انہوں نے فرمایا: ”جو شخص تمہیں یہ بتائے کہ نبی کریم صلی اللہ علیہ وسلم کھڑے ہو کر پیشاب فرمایا کرتے تھے، تم اسے جھٹلا دو؛ کیونکہ میں نے آپ صلی اللہ علیہ وسلم کو (ہمیشہ) بیٹھ کر ہی پیشاب کرتے ہوئے دیکھا ہے۔“ [مسند أبي يعلى الموصلي/مُسْنَدُ عَائِشَةَ/حدیث: 4790]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم رات کے وقت نو رکعتیں نماز ادا فرمایا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4791]

سیدہ عائشہ رضی اللہ عنہا سے روایت ہے کہ انہوں نے بیان فرمایا: ”رسول اللہ صلی اللہ علیہ وسلم بسا اوقات روزے کی حالت میں آنکھوں میں سرمہ لگا لیا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4792]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم رات کے وقت (تہجد میں) نو رکعات ادا فرمایا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4793]

اسود رحمہ اللہ سے روایت ہے کہ سیدہ عائشہ رضی اللہ عنہا نے (رسول اللہ صلی اللہ علیہ وسلم کے معمول کے متعلق) فرمایا: ”آپ صلی اللہ علیہ وسلم رات کے ابتدائی حصے میں آرام فرماتے اور آخری حصے میں بیدار ہو کر حسبِ مقدر نماز ادا فرماتے، پھر جب اپنی نماز مکمل فرما لیتے تو اپنے بستر کی طرف لوٹ آتے، پھر اگر آپ صلی اللہ علیہ وسلم کو اپنی اہلیہ کی حاجت ہوتی تو ان کے پاس تشریف لے جاتے، پھر اپنی اسی حالت پر سو جاتے اور پانی کو مس نہ فرماتے، پھر جب پہلی اذان یا پکارنے والے کی آواز سنتے تو بیدار ہو جاتے، پس اگر آپ صلی اللہ علیہ وسلم حالتِ جنابت میں ہوتے تو غسل فرماتے اور اگر غسل کی ضرورت نہ ہوتی تو نماز والا وضو کرتے، پھر دو رکعتیں ادا فرماتے اور اس کے بعد مسجد کی طرف تشریف لے جاتے۔“ [مسند أبي يعلى الموصلي/مُسْنَدُ عَائِشَةَ/حدیث: 4794]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم جب قیام کی حالت میں (کھڑے ہو کر) نماز پڑھتے تو رکوع بھی قیام ہی کی حالت میں کرتے تھے، اور جب بیٹھ کر نماز ادا فرماتے تو رکوع بھی بیٹھ کر ہی فرماتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4795]

سیدہ عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم جب وضو کرنے کے لیے کھڑے ہوتے تو (پانی کے) برتن کو (اپنے ہاتھ کی طرف) جھکا لیتے، پھر اللہ کا نام لیتے اور اس کے بعد نہایت اچھی طرح کامل وضو فرماتے۔“ [مسند أبي يعلى الموصلي/مُسْنَدُ عَائِشَةَ/حدیث: 4796]