سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جو شخص سونے اور چاندی کے برتنوں میں پیتا ہے، وہ درحقیقت اپنے پیٹ میں جہنم کی آگ غٹ غٹ اتارتا ہے۔“
امام طبرانی رحمہ اللہ فرماتے ہیں: ”اس حدیث کو نضر رحمہ اللہ سے سلیم کے سوا کسی نے روایت نہیں کیا، اور اس کی روایت میں محمد بن بحر منفرد ہیں۔“ [المعجم الأوسط/بَابُ الْجِيمِ/حدیث: 3333]

سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اثمد (سرمہ) ضرور لگایا کرو، کیونکہ یہ بال اگاتا ہے، آنکھ کی میل کچیل کو دور کرتا ہے اور بینائی کو صاف و شفاف کرنے والا ہے۔“ [المعجم الأوسط/بَابُ الْجِيمِ/حدیث: 3334]

سیدنا جابر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ”جب تم میں سے کوئی نیند سے بیدار ہو اور وضو کرنے کا ارادہ کرے تو اپنا ہاتھ برتن میں ہرگز نہ ڈالے یہاں تک کہ اسے دھو لے، کیونکہ وہ نہیں جانتا کہ اس کے ہاتھ نے رات کہاں گزاری۔“
امام طبرانی رحمہ اللہ فرماتے ہیں: ”اس حدیث کو عبد الملک سے زیاد کے سوا کسی نے روایت نہیں کیا، اس میں موسیٰ منفرد ہیں، اور سیدنا جابر رضی اللہ عنہما سے یہ روایت صرف اسی سند سے مروی ہے۔“ [المعجم الأوسط/بَابُ الْجِيمِ/حدیث: 3335]

سیدنا عبداللہ بن مسعود رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”سب لوگوں سے بہتر میرے زمانے کے لوگ ہیں، پھر دوسرے زمانے کے، پھر تیسرے زمانے کے، پھر ایسے لوگ آئیں گے جن میں کوئی بھلائی نہیں ہوگی۔“
امام طبرانی رحمہ اللہ فرماتے ہیں: ”اس حدیث کو حسن بن صالح سے یحییٰ کے سوا کسی نے روایت نہیں کیا، اور علقمہ رحمہ اللہ سے یہ روایت صرف اسی طریق سے مروی ہے۔“
دار الحرمین کے نسخے میں اسی طرح ہے، جبکہ درست ”یحییٰ بن موسیٰ“ ہے، جیسا کہ مصنف رحمہ اللہ کے ہاں المعجم الکبیر میں ہے، واللہ اعلم۔ [المعجم الأوسط/بَابُ الْجِيمِ/حدیث: 3336]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم پچھنے لگواتے تھے اور پچھنے لگانے والے کی اجرت میں ذرا بھی کمی نہ فرماتے تھے۔
امام طبرانی رحمہ اللہ فرماتے ہیں: ”اس حدیث کو محمد سے نضر کے سوا کسی نے روایت نہیں کیا۔“ [المعجم الأوسط/بَابُ الْجِيمِ/حدیث: 3337]

سیدنا عبداللہ بن عباس رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ”پہلی صف کو لازم پکڑو، دائیں جانب کو اختیار کرو، اور ستونوں کے درمیان صف بنانے سے بچو۔“
امام طبرانی رحمہ اللہ فرماتے ہیں: ”اس حدیث کو ابو یزید سے اسماعیل کے سوا کسی نے روایت نہیں کیا، اس میں ابن المبارک منفرد ہیں۔“ [المعجم الأوسط/بَابُ الْجِيمِ/حدیث: 3338]

سیدنا جریر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو لوگوں پر رحم نہیں کرتا، اللہ اس پر رحم نہیں فرماتا۔“ اور رسول اللہ صلی اللہ علیہ وسلم نے فرمایا: ”بے شک اللہ تبارک وتعالیٰ نے آسمانوں اور زمین کو پیدا کرنے سے پہلے ام الکتاب (لوحِ محفوظ) میں لکھ دیا: بلاشبہ میں ہی اللہ، رحمن و رحیم ہوں، میں نے رحم (رشتہ داری) کو پیدا کیا اور اس کے لیے اپنے نام سے ایک نام نکالا، پس جو اسے جوڑے گا میں اسے جوڑوں گا، اور جو اسے کاٹے گا میں اسے کاٹ دوں گا۔“
امام طبرانی رحمہ اللہ فرماتے ہیں: ”اس حدیث کو شعبہ رحمہ اللہ سے ابو مطیع کے سوا کسی نے روایت نہیں کیا، اس میں محمد بن یزید منفرد ہیں۔“ [المعجم الأوسط/بَابُ الْجِيمِ/حدیث: 3339]

سیدنا معاذ بن جبل رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”ظلم سے بچو، کیونکہ ظلم قیامت کے دن بہت سی تاریکیوں کا باعث ہوگا، اور بخل و حرص سے بچو، کیونکہ اس نے تم سے پہلے لوگوں کو ہلاک کیا، اس نے انہیں قطع رحمی کا حکم دیا تو انہوں نے اپنے رشتے ناتے توڑ دیے، اور اس نے انہیں خونریزی کا حکم دیا تو انہوں نے آپس میں خون بہایا۔“
پھر ایک آدمی کھڑا ہوا اور عرض کیا: ”اے اللہ کے رسول! اسلام میں سب سے افضل عمل کون سا ہے؟“ تو رسول اللہ صلی اللہ علیہ وسلم نے فرمایا: ”اسلام میں سب سے افضل وہ شخص ہے جس کی زبان اور ہاتھ سے مسلمان محفوظ رہیں۔“
امام طبرانی رحمہ اللہ فرماتے ہیں: ”اس حدیث کو قتادہ رحمہ اللہ سے سعید کے سوا کسی نے روایت نہیں کیا، اس میں ابو مطیع منفرد ہیں، اور سیدنا معاذ رضی اللہ عنہ سے یہ حدیث صرف اسی سند سے مروی ہے۔“ [المعجم الأوسط/بَابُ الْجِيمِ/حدیث: 3340]

سیدہ ام عطیہ رضی اللہ عنہا بیان کرتی ہیں: ”ہمیں جنازوں کے پیچھے چلنے سے منع کیا گیا، لیکن اس میں ہم پر سختی نہیں کی گئی، اور ہمیں عید الفطر اور عید الاضحیٰ کے دن (عیدگاہ کی طرف) نکلنے کا حکم دیا گیا، اور یہ کہ پردہ نشین دوشیزائیں اور حائضہ عورتیں بھی نکلیں، البتہ حائضہ عورتیں لوگوں کی نماز کی جگہ سے الگ رہیں، تاکہ وہ مسلمانوں کی جماعت اور ان کی دعا میں شریک ہوں۔“
امام طبرانی رحمہ اللہ فرماتے ہیں: ”اس حدیث کو صلت رحمہ اللہ سے ہاشم کے سوا کسی نے روایت نہیں کیا، اس میں علی منفرد ہیں۔“ [المعجم الأوسط/بَابُ الْجِيمِ/حدیث: 3341]

سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے ظہر کی نماز پانچ رکعتیں پڑھا دی، تو عرض کیا گیا: ”اے اللہ کے رسول! کیا نماز میں اضافہ کر دیا گیا ہے؟“ آپ صلی اللہ علیہ وسلم نے فرمایا: ”وہ کیا؟“ صحابہ نے عرض کیا: ”آپ نے پانچ رکعتیں پڑھی ہیں۔“ راوی کہتے ہیں: پھر آپ صلی اللہ علیہ وسلم نے دو سجدے (سجدہ سہو) کیے۔
امام طبرانی رحمہ اللہ فرماتے ہیں: ”اس حدیث کو شعبہ رحمہ اللہ سے یزید بن زریع کے سوا کسی نے روایت نہیں کیا، اس میں حسن بن عمرو بن شقیق منفرد ہیں۔“ [المعجم الأوسط/بَابُ الْجِيمِ/حدیث: 3342]