سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس شخص نے بیت المقدس سے احرام باندھا، وہ بخشا بخشایا (اس حال میں کہ اس کی مغفرت ہو چکی ہو) داخل ہوگا۔“
امام طبرانی رحمہ اللہ فرماتے ہیں: ”اس حدیث کو نافع سے صرف غالب بن عبید اللہ نے روایت کیا ہے، اور موسیٰ بن ایوب اس میں منفرد ہیں۔“ [المعجم الأوسط/بَابُ النُّونِ/حدیث: 9236]

سیدنا مستورد بن شداد رضی اللہ عنہ اپنے والد سے روایت کرتے ہیں کہ انہوں نے بیان کیا: ”میں رسول اللہ صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم کا ہاتھ پکڑا تو وہ ریشم سے زیادہ نرم اور برف سے زیادہ ٹھنڈا تھا۔“
امام طبرانی رحمہ اللہ فرماتے ہیں: ”اس حدیث کو اسماعیل بن ابی خالد سے صرف شیبان نے روایت کیا ہے، اور ولید بن مسلم اس میں منفرد ہیں۔“ [المعجم الأوسط/بَابُ النُّونِ/حدیث: 9237]