سیدنا ابو موسیٰ اشعری رضی اللہ عنہ سے مرفوعاً روایت ہے کہ نبی کریم صلی اللہ علیہ وسلم نے فرمایا: ”جو شخص بارہ رکعتیں (سنتِ مؤکدہ) پڑھے، اللہ تعالیٰ اس کے لیے جنت میں ایک گھر بنا دیتا ہے۔“
امام طبرانی رحمہ اللہ فرماتے ہیں: ”اس حدیث کو ابو بردہ سے ہارون ابو اسحاق کے سوا کسی نے روایت نہیں کیا، اس میں حماد بن زید منفرد ہیں، اور ابو موسیٰ رضی اللہ عنہ سے یہ حدیث صرف اسی سند سے مروی ہے۔“ [المعجم الأوسط/بَابُ الْهَاءِ/حدیث: 9436]

سیدنا حذیفہ رضی اللہ عنہ سے روایت ہے کہ ایک آدمی نبی کریم صلی اللہ علیہ وسلم کے پاس آیا اور کہنے لگا: ”اے اللہ کے رسول! ہمیں تو قحط سالی نے کھا لیا ہے۔“ تو رسول اللہ صلی اللہ علیہ وسلم نے فرمایا: ”تم پر دنیا (کے دروازے) کھول دیے جائیں گے، پس کاش! میری امت ریشم (کا لباس) نہ پہنے۔“
امام طبرانی رحمہ اللہ فرماتے ہیں: ”اس حدیث کو عبیدہ سے ہشیم کے سوا کسی نے روایت نہیں کیا، اس میں خضر بن محمد منفرد ہیں، اور سیدنا حذیفہ رضی اللہ عنہ سے یہ حدیث صرف اسی سند سے مروی ہے۔“ [المعجم الأوسط/بَابُ الْهَاءِ/حدیث: 9437]

سیدنا ابو ہریرہ رضی اللہ عنہ سے مرفوعاً روایت ہے کہ نبی کریم صلی اللہ علیہ وسلم نے فرمایا: ”آدمی کے پاس اس کی قبر میں (عذاب کے فرشتے) آتے ہیں، چنانچہ جب وہ اس کے سر کی جانب سے آتے ہیں تو تلاوتِ قرآن اسے روک دیتی ہے، اور جب اس کے ہاتھوں کی جانب سے آتے ہیں تو صدقہ اسے ہٹا دیتا ہے، اور جب اس کے پاؤں کی جانب سے آتے ہیں تو مسجدوں کی طرف اس کا چل کر جانا اسے دفع کر دیتا ہے، اور صبر ایک جانب (تیار) کھڑا ہوتا ہے۔“ پھر (صبر) کہتا ہے: ”سنو! اگر میں (ان میں) کوئی کمی دیکھتا تو میں ہی اس (کمی کو پورا کرنے) کا ذمہ دار ہوتا۔“
امام طبرانی رحمہ اللہ فرماتے ہیں: ”اس حدیث کو طلحہ بن مصرف سے مالک بن مغول کے سوا کسی نے روایت نہیں کیا، اور مالک سے سفیان کے سوا کسی نے نہیں، اور سفیان سے محمد بن صلت کے سوا کسی نے نہیں، اس میں ابو حفص منفرد ہیں۔“ [المعجم الأوسط/بَابُ الْهَاءِ/حدیث: 9438]