باب۔

اللہ تعالیٰ کے اس ارشادِ گرامی کے بیان میں کہ ”اے لوگو! اپنے پروردگار (کی ناراضی) سے بچو، یقیناً قیامت کا زلزلہ ایک نہایت ہولناک چیز ہے۔ جس روز تم اس کا مشاہدہ کرو گے، ہر دودھ پلانے والی اپنے شیر خوار سے غافل ہو جائے گی اور ہر حاملہ اپنا حمل گرا دے گی، اور تمہیں لوگ مدہوشی کے عالم میں دکھائی دیں گے حالانکہ وہ نشے میں نہیں ہوں گے، بلکہ اللہ کا عذاب ہی نہایت سخت ہو گا (جس کے باعث ان کے حواس ٹھکانے نہیں رہیں گے)۔“

اللہ تبارک و تعالیٰ کے اس ارشادِ گرامی کے بیان میں کہ ”اے لوگو! اگر تم دوبارہ جی اٹھنے کے متعلق کسی شک و شبہ میں مبتلا ہو تو (غور کرو کہ) ہم نے تمہیں مٹی سے پیدا کیا، پھر نطفے سے، پھر خون کے لوتھڑے سے، پھر گوشت کی ایسی بوٹی سے جس کی جسمانی ساخت مکمل بھی ہوتی ہے اور غیر مکمل بھی، تاکہ ہم تمہارے لیے (اپنی قدرت و حکمت) واضح کر دیں، اور ہم رحمِ مادر میں جسے چاہتے ہیں ایک مدتِ معین تک ٹھہرائے رکھتے ہیں، پھر تمہیں ایک بچے کی صورت میں باہر نکال لاتے ہیں، پھر (تمہاری پرورش کرتے ہیں) تاکہ تم اپنی بھرپور جوانی کی عمر کو پہنچ جاؤ، اور تم میں سے کوئی تو (پہلے ہی) وفات پا جاتا ہے اور کوئی تم میں سے وہ ہے جو بدترین عمر (انتہائی بڑھاپے) کی طرف لوٹا دیا جاتا ہے تاکہ وہ علم حاصل کر لینے کے بعد (دوبارہ) کچھ بھی نہ جان سکے، اور تم زمین کو مردہ اور خشک دیکھتے ہو، پھر جب ہم اس پر پانی برسا دیتے ہیں تو وہ حرکت میں آ جاتی ہے اور ابھرنے لگتی ہے اور ہر قسم کی خوش منظر و خوشنما نباتات کے جوڑے اگاتی ہے“۔

”اور لوگوں میں سے کوئی ایسا ہے جو اللہ کی عبادت ایک کنارے پر رہ کر (یعنی شک و تذبذب کے ساتھ) کرتا ہے، پس اگر اسے کوئی بھلائی پہنچ جائے تو وہ اس پر مطمئن ہو جاتا ہے اور اگر اسے کوئی آزمائش پہنچے تو وہ اپنے منہ کے بل پھر جاتا ہے، اس نے دنیا اور آخرت دونوں کھو دیں، یہی تو صریح اور کھلا نقصان ہے“۔