ابوعبید مولیٰ ابن ازہر رحمہ اللہ فرماتے ہیں کہ میں سیدنا عثمان بن عفان رضی اللہ عنہ کے ساتھ عید میں حاضر ہوا۔ وہ آئے اور نماز پڑھائی، پھر خطبہ میں ارشاد فرمایا کہ جب تمہارے اس دن میں دو عیدیں جمع ہو جائیں تو اگر عوالیِ مدینہ والے جمعہ کا انتظار کرنا چاہیں تو کر لیں اور اگر واپس جانا چاہیں تو چلے جائیں، میں انہیں اجازت دیتا ہوں۔ [السنن الكبرى للبيهقي/كتاب صلاة العيدين/حدیث: 6291]

ابوعبید مولیٰ ابن ازہر فرماتے ہیں کہ وہ عید الاضحی کے موقع پر سیدنا عمر رضی اللہ عنہ کے ساتھ حاضر ہوئے۔ انہوں نے نماز پڑھائی، پھر خطبہ ارشاد فرمایا کہ اے لوگو! رسول اللہ صلی اللہ علیہ وسلم نے ”عیدین میں روزہ رکھنے سے منع فرمایا ہے۔“ ایک تو وہ دن ہے کہ تم اپنے روزوں کو افطار کرتے ہو، یعنی عید الفطر مناتے ہو اور دوسرا وہ دن جس میں تم اپنی قربانیوں کے گوشت کھاتے ہو۔ ابوعبید فرماتے ہیں: پھر میں سیدنا عثمان بن عفان رضی اللہ عنہ کے ساتھ حاضر ہوا تو یہ عید بھی جمعہ کے دن تھی۔ انہوں نے بھی نماز خطبہ سے پہلے پڑھائی، پھر خطبہ ارشاد فرمایا کہ اے لوگو! اس دن تمہارے لیے دو عیدیں جمع ہو گئی ہیں، تو عوالی والوں میں سے جو جمعہ کا انتظار کرنا چاہے وہ انتظار کر سکتا ہے اور جو واپس جانا چاہے جا سکتا ہے، میں اجازت دیتا ہوں۔
ابوعبید فرماتے ہیں: پھر میں سیدنا علی رضی اللہ عنہ کے ساتھ حاضر ہوا تو انہوں نے بھی نمازِ عید خطبہ سے پہلے پڑھائی، پھر خطبہ دیا اور فرمایا کہ رسول اللہ صلی اللہ علیہ وسلم نے فرمایا: ”تم اپنی قربانیوں کے گوشت تین دن سے زیادہ نہ کھاؤ۔“ [السنن الكبرى للبيهقي/كتاب صلاة العيدين/حدیث: 6292]

سیدنا ابو الدرداء رضی اللہ عنہ فرماتے ہیں کہ جس نے عیدین کی راتیں ثواب کی نیت سے عبادت کی اس کا دل مردہ نہیں ہوگا جب دل مردہ ہوجائیں گے۔
امام شافعی رحمہ اللہ فرماتے ہیں: ہمیں یہ بات پہنچی ہے کہ کہا جاتا تھا: دعا پانچ راتوں میں قبول کی جاتی ہے: جمعہ، عید الاضحی، عید الفطر، رجب کی پہلی رات اور نصف شعبان کی رات۔ فرماتے ہیں: اور ہمیں یہ بات پہنچی ہے کہ ابن عمر رضی اللہ عنہما مزدلفہ (جمع) کی رات عبادت میں گزارتے تھے اور جمع کی رات عید کی رات ہے، کیونکہ اس کی صبح قربانی ہوتی ہے۔ [السنن الكبرى للبيهقي/كتاب صلاة العيدين/حدیث: 6293]

خالد بن معدان رحمہ اللہ فرماتے ہیں کہ میں سیدنا واثلہ بن اسقع رضی اللہ عنہ کو عید کے دن ملا، میں نے کہا: «تَقَبَّلَ اللَّهُ مِنَّا وَمِنْكَ» ”کہ اللہ ہماری اور تمہاری جانب سے قبول فرمائے۔“ انہوں نے فرمایا: جی ہاں «تَقَبَّلَ اللَّهُ مِنَّا وَمِنْكَ» اور فرمایا کہ میں رسول اللہ صلی اللہ علیہ وسلم کو عید کے دن ملا، میں نے کہا: «تَقَبَّلَ اللَّهُ مِنَّا وَمِنْكَ» تو آپ صلی اللہ علیہ وسلم نے فرمایا: ”ہاں، «تَقَبَّلَ اللَّهُ مِنَّا وَمِنْكَ» ۔“ [السنن الكبرى للبيهقي/كتاب صلاة العيدين/حدیث: 6294]

خالد بن معدان رحمہ اللہ واثلہ بن اسقع رضی اللہ عنہ سے نقل فرماتے ہیں کہ میں رسول اللہ صلی اللہ علیہ وسلم کو عید کے دن ملا، میں نے کہا: «تَقَبَّلَ اللّٰهُ مِنَّا وَمِنْكَ» ”اللہ ہم سے اور آپ سے قبول فرمائے“، آپ صلی اللہ علیہ وسلم نے فرمایا: ”ہاں! «تَقَبَّلَ اللّٰهُ مِنَّا وَمِنْكَ» ”اللہ ہم سے اور آپ سے قبول فرمائے“۔“
ابن عدی رحمہ اللہ فرماتے ہیں: یہ روایت منکر ہے، میرے علم میں بقیہ سے اسے اس محمد بن ابراہیم کے سوا کوئی روایت نہیں کرتا۔ یہ روایت بقیہ سے ایک دوسری سند کے ساتھ موقوف (غیر مرفوع) بھی دیکھی گئی ہے اور یہ محفوظ نہیں ہے۔ [السنن الكبرى للبيهقي/كتاب صلاة العيدين/حدیث: 6295]

ادہم مولیٰ عمر بن عبدالعزیز رحمہ اللہ فرماتے ہیں کہ ہم نے عمر بن عبدالعزیز رحمہ اللہ کو عید کے دن کہا: «تَقَبَّلَ اللّٰهُ مِنَّا وَمِنْكَ» ”اللہ ہم سے اور آپ سے قبول فرمائے“ اے امیر المؤمنین! آپ جواب دیتے، لیکن انکار نہیں۔
اس کی کراہت کے بارے میں ایک مرفوع حدیث بھی روایت کی گئی ہے، لیکن وہ صحیح نہیں ہے۔ [السنن الكبرى للبيهقي/كتاب صلاة العيدين/حدیث: 6296]

سیدنا عبادہ بن صامت رضی اللہ عنہ فرماتے ہیں: میں نے رسول اللہ صلی اللہ علیہ وسلم سے عیدین میں لوگوں کے قول «تَقَبَّلَ اللهُ مِنَّا وَمِنْكُمْ» ”اللہ ہم سے اور تم سے قبول فرمائے“ کے بارے میں سوال کیا تو آپ صلی اللہ علیہ وسلم نے فرمایا: ”یہ فعل اہل کتاب کا ہے،“ آپ صلی اللہ علیہ وسلم نے اسے ناپسند فرمایا ہے۔
عبدالخالق بن زید منکر الحدیث ہے، یہ بات امام بخاری رحمہ اللہ نے کہی ہے۔ [السنن الكبرى للبيهقي/كتاب صلاة العيدين/حدیث: 6297]