سعید بن جبیر سیدنا ابن عباس رضی اللہ عنہما سے نقل فرماتے ہیں کہ سیدنا صعب بن جثامہ رضی اللہ عنہ نے نبی صلی اللہ علیہ وسلم کو نیل گائے کی پشت والا حصہ تحفہ دیا، جب آپ صلی اللہ علیہ وسلم قدید نامی جگہ پر تھے اور محرم تھے۔ آپ صلی اللہ علیہ وسلم نے اس کو واپس کر دیا اور وہ خون بہا رہا تھا۔
شاید یہی صحیح ہے کہ شعبہ کی حکم سے روایت میں ”گدھے کی پشت کا حصہ“ ہے اور حبیب سے ان کی روایت میں ”نیل گائے“ ہے، جیسا کہ ابوداود نے روایت کیا ہے۔
(ب) سعید بن جبیر سیدنا ابن عباس رضی اللہ عنہما سے نقل فرماتے ہیں کہ سیدنا صعب بن جثامہ رضی اللہ عنہ نے نبی صلی اللہ علیہ وسلم کو تحفہ دیا، ان میں سے ایک کہتے ہیں: ”قدید میں گدھے کی پشت والا حصہ“۔ دوسرے نے کہا: ”نیل گائے، تو آپ صلی اللہ علیہ وسلم نے رد کر دیا۔“
اگر روایت اسی طرح ہو تو شعبہ کی حبیب سے روایت اعمش کی حبیب سے روایت کے موافق ہو جاتی ہے، اور شعبہ کی حکم سے روایت منصور کی حکم سے روایت کے موافق ہو جاتی ہے، چنانچہ گوشت یا اس کے ہم معنی چیز کے ذکر میں حکم منفرد ہیں۔ واللہ اعلم۔ [السنن الكبرى للبيهقي/كتاب الحج/حدیث: 9934]

سعید بن جبیر، ابن عباس رضی اللہ عنہما سے نقل فرماتے ہیں کہ صعب بن جثامہ رضی اللہ عنہ نے رسول اللہ صلی اللہ علیہ وسلم کو نیل گائے کی ایک ٹانگ تحفہ میں دی، آپ صلی اللہ علیہ وسلم قدید نامی جگہ پر تھے۔ آپ صلی اللہ علیہ وسلم نے اسے واپس کر دیا۔ [السنن الكبرى للبيهقي/كتاب الحج/حدیث: 9935]

امام شافعی رحمہ اللہ فرماتے ہیں: اگر صعب بن جثامہ رضی اللہ عنہ نے نبی صلی اللہ علیہ وسلم کو زندہ نیل گائے تحفہ میں دی تھی تو محرم کے لیے زندہ نیل گائے کو ذبح کرنا جائز نہیں، اور اگر انہوں نے گوشت تحفہ میں دیا تھا تو ممکن ہے کہ آپ صلی اللہ علیہ وسلم کو معلوم ہو کہ یہ آپ کے لیے شکار کیا گیا ہے، اس لیے آپ صلی اللہ علیہ وسلم نے اسے واپس کر دیا، جس کی وضاحت جابر بن عبداللہ رضی اللہ عنہما کی حدیث میں ہے۔
امام شافعی رحمہ اللہ فرماتے ہیں: امام مالک رحمہ اللہ کی حدیث کہ صعب رضی اللہ عنہ نے نبی صلی اللہ علیہ وسلم کو گدھا تحفہ میں دیا، یہ زیادہ ثابت ہے اس حدیث سے جس میں بیان ہوا ہے کہ گدھے کا گوشت تحفہ میں دیا۔ واللہ اعلم۔
شیخ رحمہ اللہ فرماتے ہیں کہ صعب رضی اللہ عنہ کی حدیث میں یہ بھی مروی ہے کہ آپ صلی اللہ علیہ وسلم نے اس سے کھایا تھا۔ [السنن الكبرى للبيهقي/كتاب الحج/حدیث: 9936]

جعفر بن عمرو بن امیہ ضمری رحمہ اللہ اپنے والد رضی اللہ عنہ سے نقل فرماتے ہیں کہ صعب بن جثامہ رضی اللہ عنہ نے نبی صلی اللہ علیہ وسلم کو نیل گائے کی پشت والا حصہ تحفہ میں دیا اور آپ صلی اللہ علیہ وسلم جحفہ کے مقام پر تھے۔ آپ صلی اللہ علیہ وسلم نے اس سے کھایا اور لوگوں نے بھی کھایا۔
یہ سند صحیح ہے، اگر یہ محفوظ ہو تو گویا آپ صلی اللہ علیہ وسلم نے زندہ کو تو واپس کر دیا اور گوشت قبول فرما لیا۔ واللہ اعلم۔ [السنن الكبرى للبيهقي/كتاب الحج/حدیث: 9937]

سیدنا ابن عباس رضی اللہ عنہما فرماتے ہیں کہ زید بن ارقم رضی اللہ عنہ آئے تو عبداللہ بن عباس رضی اللہ عنہما نے انہیں یاد دلاتے ہوئے پوچھا: آپ نے مجھے اس شکار کے گوشت کے بارے میں کیسے بتایا تھا جو رسول اللہ صلی اللہ علیہ وسلم کو تحفہ دیا گیا جب آپ صلی اللہ علیہ وسلم محرم تھے؟ تو انہوں نے کہا کہ آپ صلی اللہ علیہ وسلم کو شکار والے گوشت کا ایک حصہ تحفہ میں دیا گیا جو آپ صلی اللہ علیہ وسلم نے واپس کر دیا اور فرمایا: ”ہم اسے نہیں کھاتے، ہم حالتِ احرام میں ہیں۔“
(ب) زید بن ارقم رضی اللہ عنہ آئے تو ابن عباس رضی اللہ عنہما نے ان کے پاس جا کر ان سے شکار کے گوشت کے بارے میں فتویٰ پوچھا تو انہوں نے فرمایا کہ رسول اللہ صلی اللہ علیہ وسلم کے پاس حالتِ احرام میں شکار کا گوشت لایا گیا جو آپ صلی اللہ علیہ وسلم نے واپس کر دیا۔ [السنن الكبرى للبيهقي/كتاب الحج/حدیث: 9938]

اسحاق بن عبداللہ بن حارث اپنے والد سے نقل فرماتے ہیں کہ حارث سیدنا عثمان رضی اللہ عنہ کی جانب سے طائف پر نائب تھے۔ انہوں نے سیدنا عثمان رضی اللہ عنہ کے لیے کھانا بنایا۔ اس میں چکوروں، نر چکوروں اور جنگلی جانوروں کا گوشت شامل کیا، انہوں نے سیدنا علی بن ابی طالب رضی اللہ عنہ کی طرف قاصد بھیجا، قاصد آیا تو وہ اپنے اونٹوں کے لیے پتے جھاڑ رہے تھے، وہ آئے تو اپنے ہاتھوں سے پتے جھاڑ رہے تھے۔ لوگوں نے ان سے کہا: کھائیے۔ انہوں نے فرمایا: حلال لوگوں کو کھلاؤ، ہم تو محرم لوگ ہیں۔ پھر سیدنا علی رضی اللہ عنہ نے فرمایا: میں اشجع قبیلہ کے ہر اس شخص کو اللہ کی قسم دیتا ہوں جو یہاں موجود ہے، کیا تم جانتے ہو کہ ایک آدمی نے رسول اللہ صلی اللہ علیہ وسلم کو نیل گائے تحفہ میں دی جبکہ آپ صلی اللہ علیہ وسلم محرم تھے تو آپ صلی اللہ علیہ وسلم نے اسے کھانے سے انکار کر دیا؟ انہوں نے کہا: ہاں۔
(ب) ان دونوں مسند روایتوں کی توجیہ وہی ہے جو امام شافعی رحمہ اللہ نے صعب بن جثامہ رضی اللہ عنہ کے قصہ میں اس شخص کی حدیث کی توجیہ میں ذکر کی ہے جس نے روایت کیا کہ انہوں نے گدھے کا گوشت تحفہ میں دیا تھا۔ رہے سیدنا علی اور ابن عباس رضی اللہ عنہما تو ان دونوں کا موقف ہے کہ محرم کے لیے اس کا کھانا مطلق طور پر حرام ہے۔ ان دونوں کی مخالفت سیدنا عمر، عثمان، طلحہ اور زبیر رضی اللہ عنہم وغیرہ نے کی ہے اور ان کے ساتھ سیدنا ابوقتادہ اور جابر رضی اللہ عنہما کی حدیث ہے۔ واللہ اعلم۔ [السنن الكبرى للبيهقي/كتاب الحج/حدیث: 9939]

ہشام بن عروہ اپنے والد سے نقل فرماتے ہیں کہ نبی صلی اللہ علیہ وسلم کی زوجہ محترمہ سیدہ عائشہ رضی اللہ عنہا نے ان سے فرمایا: اے بھانجے! یہ صرف دس راتیں ہیں، اگر تمہارے دل میں کوئی چیز کھٹکے تو اس کو چھوڑ دینا۔ (ان کی مراد شکار کا گوشت کھانا تھا)۔ [السنن الكبرى للبيهقي/كتاب الحج/حدیث: 9940]

عبداللہ بن شماسہ رحمہ اللہ فرماتے ہیں کہ میں سیدہ عائشہ رضی اللہ عنہا کے پاس آیا اور شکار کے گوشت کے متعلق سوال کیا جو حلال (غیر محرم) آدمی محرم کو تحفہ دیتا ہے، تو انہوں نے فرمایا کہ رسول اللہ صلی اللہ علیہ وسلم کے صحابہ کا اس میں اختلاف ہے، بعض تو ناپسند کرتے ہیں اور بعض اس میں کوئی حرج محسوس نہیں کرتے، اور اس میں کوئی حرج نہیں۔ [السنن الكبرى للبيهقي/كتاب الحج/حدیث: 9941]

مجاہد، عبداللہ بن عباس رضی اللہ عنہما سے نقل فرماتے ہیں کہ جب آدمی محرم ہو اور اس کے پاس شکار ہو تو وہ اس کو چھوڑ دے۔
(ب) حسن بیان کرتے ہیں کہ وہ شکار کو چھوڑ دے، اگر اس نے ذبح کر دیا تو اس پر بدلہ ہے۔ [السنن الكبرى للبيهقي/كتاب الحج/حدیث: 9942]

حماد بن زید رحمہ اللہ فرماتے ہیں کہ عمرو بن دینار رحمہ اللہ سے اس محرم کے بارے میں سوال کیا گیا جو شکار کو ذبح کر لیتا ہے، انہوں نے فرمایا کہ اسے کھا لے اور اس پر بدلہ ہے اور اس کو پھینک دینا بگاڑ ہے، حماد رحمہ اللہ کہتے ہیں کہ ایوب رحمہ اللہ کو عمرو رحمہ اللہ کا یہ قول اچھا لگتا تھا۔
(ب) حسن بصری رحمہ اللہ فرماتے ہیں: وہ مردار ہے، اسے نہ کھائے۔ حضرت عطاء رحمہ اللہ کہتے ہیں کہ حلال (آدمی) نہ کھائے اور حضرت عطاء رحمہ اللہ ہی سے منقول ہے کہ جب محرم شکار کرے تو اس پر فدیہ ہے، اور جب اس نے اسے کھایا تو جتنا کھایا اس کی قیمت اس پر ہوگی۔
(ج) ابن ابی لیلیٰ کی روایت میں حضرت عطاء رحمہ اللہ سے منقول ہے کہ سیدہ عائشہ رضی اللہ عنہا، سیدنا حسین بن علی رضی اللہ عنہ اور سیدنا عبداللہ بن عمر رضی اللہ عنہما نے مکہ میں ذبح کیے جانے والے شکار کے بارے میں فرمایا کہ اسے کھایا نہیں جائے گا۔ پوچھا گیا: اس کا کیا کیا جائے؟ انہوں نے کہا: اسے مردار کی طرح پھینک دیا جائے گا۔
(د) حجاج بن ارطاۃ کی روایت جو حضرت عطاء رحمہ اللہ، سیدنا عبداللہ بن عمر رضی اللہ عنہما، سیدنا عبداللہ بن عباس رضی اللہ عنہما اور سیدہ عائشہ رضی اللہ عنہا سے منقول ہے، انہوں نے اس بات کو مکروہ جانا کہ حرم سے باہر (حل میں) شکار کیے گئے جانور کو حرم میں ذبح کیا جائے۔
(ح) حجاج کی دوسری روایت میں ہے جو حضرت عطاء رحمہ اللہ بیان کرتے ہیں کہ سیدہ عائشہ رضی اللہ عنہا، سیدنا عبداللہ بن عباس رضی اللہ عنہما اور سیدنا حسن یا سیدنا حسین رضی اللہ عنہ، یہ سب شکار کو مکہ میں ذبح کرنے کو ناپسند کرتے تھے، لیکن اسے ذبح شدہ حالت میں (مکہ میں) لانے میں کوئی حرج نہیں سمجھتے تھے۔
(خ) حضرت عطاء رحمہ اللہ سے روایت ہے کہ جب حلال آدمی حرم میں شکار کرے تو اس کا حکم وہی ہوگا جو محرم کا ہوتا ہے، اور محرم آدمی جب حرم میں شکار کرے تو اس کو ایک کفارہ دینا پڑے گا۔ [السنن الكبرى للبيهقي/كتاب الحج/حدیث: 9943]