(نبی کریم صلی اللہ علیہ وسلم نے فرمایا:)
”بیشک اللہ تعالیٰ قیامت کے دن فرمائے گا: اے ابن آدم! میں بیمار ہوا تو تو نے میری عیادت نہیں کی۔ بندہ عرض کرے گا: اے میرے رب! میں تیری عیادت کیسے کرتا جبکہ تو تو تمام جہانوں کا پالنے والا ہے؟ اللہ فرمائے گا: کیا تجھے معلوم نہیں تھا کہ میرا فلاں بندہ بیمار ہوا تھا لیکن تو نے اس کی عیادت نہیں کی؟ کیا تو نہیں جانتا کہ اگر تو اس کی عیادت کے لیے جاتا تو مجھے اس کے پاس پاتا؟ اے ابن آدم! میں نے تجھ سے کھانا مانگا تھا مگر تو نے مجھے کھانا نہیں کھلایا۔ بندہ عرض کرے گا: اے میرے رب! میں تجھے کیسے کھانا کھلاتا جبکہ تو رب العالمین ہے؟ اللہ فرمائے گا: کیا تجھے معلوم نہیں کہ میرے فلاں بندے نے تجھ سے کھانا مانگا تھا لیکن تو نے اسے نہیں کھلایا؟ کیا تو نہیں جانتا کہ اگر تو اسے کھلاتا تو اس کا ثواب میرے پاس پاتا؟ اے ابن آدم! میں نے تجھ سے پانی مانگا تھا مگر تو نے مجھے نہیں پلایا۔ بندہ عرض کرے گا: اے میرے رب! میں تجھے کیسے پلاتا جبکہ تو تمام جہانوں کا رب ہے؟ اللہ فرمائے گا: میرے فلاں بندے نے تجھ سے پانی مانگا تھا مگر تو نے اسے نہیں پلایا، یاد رکھ! اگر تو اسے پانی پلاتا تو اس کا اجر میرے پاس پاتا۔“ [صحيح الجامع الصغير وزيادته/[حرف الألف] -- إن الله/حدیث: 1916]

(نبی کریم صلی اللہ علیہ وسلم نے فرمایا:)
”بیشک اللہ تعالیٰ مہلت دیتا ہے یہاں تک کہ جب آدھی رات یا دو تہائی رات گزر جاتی ہے تو فرماتا ہے: میرے بندے مجھ سے ہی مانگیں کسی اور سے نہیں، جو مجھ سے دعا کرے گا میں اس کی دعا قبول کروں گا، جو مجھ سے مانگے گا میں اسے عطا کروں گا، جو مجھ سے بخشش طلب کرے گا میں اسے بخش دوں گا، اور یہ سلسلہ فجر طلوع ہونے تک جاری رہتا ہے۔“ [صحيح الجامع الصغير وزيادته/[حرف الألف] -- إن الله/حدیث: 1917]

(نبی کریم صلی اللہ علیہ وسلم نے فرمایا:)
”بیشک اللہ تعالیٰ مہلت دیتا ہے یہاں تک کہ جب رات کا آخری تہائی حصہ باقی رہ جاتا ہے تو وہ آسمانِ دنیا کی طرف نزول فرماتا ہے اور ندا دیتا ہے: کیا کوئی بخشش مانگنے والا ہے؟ کیا کوئی توبہ کرنے والا ہے؟ کیا کوئی مانگنے والا ہے؟ کیا کوئی دعا کرنے والا ہے؟ (یہ ندا کا سلسلہ یونہی جاری رہتا ہے) یہاں تک کہ فجر طلوع ہو جاتی ہے۔“ [صحيح الجامع الصغير وزيادته/[حرف الألف] -- إن الله/حدیث: 1918]

(نبی کریم صلی اللہ علیہ وسلم نے فرمایا:)
”بیشک اللہ تعالیٰ اخراجات اور ضروریات کے بقدر مدد نازل فرماتا ہے، اور آزمائش و مصیبت کے بقدر صبر نازل فرماتا ہے۔“ [صحيح الجامع الصغير وزيادته/[حرف الألف] -- إن الله/حدیث: 1919]

(نبی کریم صلی اللہ علیہ وسلم نے فرمایا:)
”بیشک اللہ تعالیٰ بادلوں کو پیدا فرماتا ہے، تو وہ بہترین گفتگو کرتے ہیں (یعنی گرجتے ہیں) اور بہترین انداز میں ہنستے ہیں (یعنی ان میں بجلی چمکتی ہے)۔“ [صحيح الجامع الصغير وزيادته/[حرف الألف] -- إن الله/حدیث: 1920]

(نبی کریم صلی اللہ علیہ وسلم نے فرمایا:)
”بیشک اللہ تعالیٰ تمہیں اس بات سے منع فرماتا ہے کہ تم عورتوں کے پاس ان کی پچھلی شرمگاہوں (دبر) سے آؤ۔“ [صحيح الجامع الصغير وزيادته/[حرف الألف] -- إن الله/حدیث: 1921]

(نبی کریم صلی اللہ علیہ وسلم نے فرمایا:)
”بیشک اللہ تعالیٰ تمہیں اس بات سے منع فرماتا ہے کہ تم اپنے باپ دادا کی قسمیں کھاؤ۔“ [صحيح الجامع الصغير وزيادته/[حرف الألف] -- إن الله/حدیث: 1922]

(نبی کریم صلی اللہ علیہ وسلم نے فرمایا:)
”بیشک اللہ تعالیٰ تمہیں اپنے باپ دادا کی قسمیں کھانے سے منع فرماتا ہے، پس جسے قسم کھانا ہی ہو تو وہ اللہ کی قسم کھائے ورنہ خاموش رہے۔“ [صحيح الجامع الصغير وزيادته/[حرف الألف] -- إن الله/حدیث: 1923]

(نبی کریم صلی اللہ علیہ وسلم نے فرمایا:)
”بیشک اللہ تعالیٰ تمہیں تمہاری ماؤں کے ساتھ حسنِ سلوک کی تاکید فرماتا ہے (یہ تین مرتبہ فرمایا)، بیشک اللہ تعالیٰ تمہیں تمہارے باپوں کے ساتھ حسنِ سلوک کی تاکید فرماتا ہے (یہ دو مرتبہ فرمایا)، بیشک اللہ تعالیٰ تمہیں اپنے قریبی رشتہ داروں اور پھر جو ان کے بعد قریبی ہوں ان کے ساتھ حسنِ سلوک کی تاکید فرماتا ہے۔“ [صحيح الجامع الصغير وزيادته/[حرف الألف] -- إن الله/حدیث: 1924]